ZAWBÂ 16 - Mara Bible RV (BSI)

Zawbâ achhyna: Thlapalôhtuh pachâchhiechhihpazy nama châ

¹ Zawbâ ta a chhy ta:

² “Cha hawhpa hmo cha ei hluhpi ei thei haw, Nama zydua ta thlapalôhtuh pachâchhiechhihpa nama châ khai.

³ Ziza biezy ta chhâna a hnei aw ma? Khâpa ta cha pareisa ta ma cha hawhta nâ chhy tly?

⁴ Ei duahmo liana he nâmo y u la, Kei chhao nâmo hawhta ei rei thei thlâh ha hra mâh tâh; Biezy ta cha tla thlu aw ei na ta, Ei luh ei cha chahuah thlu thei thlâh ha hra ei mâh tâh.

⁵ Châhrasala ei pakah ta tlao tha cha patlô aw ei na ta, Ei hmao hnapangâhna ta nama pasana tlao a pahua aw.

⁶ “Ei reipa chhao ta, Ei pasana a hua via hlei leipa ta; Maoh ei ohpa chhao ta, Ei pasana na siesai hlei vei.

⁷ Hy Khazohpa, ei tha pachha ha chi ta, Ei lailâhzy na pamua khai ha he zaw.

⁸ Na pazaoh khai ha chi ta, Ei zaohna cha ei châna pahnokheituhpa châ ta; Ei chaohna ta na thyuhnao ta, Hmiadaisâ ta eina leih hih.

⁹ Hiehâhpa ta Khazohpa ta na hriechheihpa ta na taola ta, A hâh na charieh chie ta, Ei khakhaipa ta eina mochakhi.

¹⁰ Ama pakah na pakawh chiepa ta, Sâlâ kawpa ta ei baih na chabaih ei ta, A paraoh ei ta eina tei ei.

¹¹ Khazohpa ta moleipazy ku liata na hlâ ta, Hmoparaopazy ku liata eina thy.

¹² Thadâhpa ta y na ta, Ano ta eina pakeichheih khai haw; Ei rao ta na patupa ta na taikhy ta, Châka anuana châta na hmâh ta,

¹³ A likathaipazy ta eina chadô ei. Ei lôpozy chado leipa ta patlawchheih ta, Ei hmôkhaw alei liata a leihtha.

¹⁴ Raona nata raona a pathopa ta na parao ta, Pasaipha hawhta einâ râ thlu.

¹⁵ Ei vo chô liata latho poh bieh na ta, Dohlei liata ei tha ei soh.

¹⁶ Ei chana ta ei hmia saih khai ha ta, Ei mo vo liata thina nohpahli a y,

¹⁷ Ei kuzy ta thachahra hmâh leipa ta, Ei thlahchhâna a pathaih thlâh hapa chhao ta.

¹⁸ “Hy leilô y, ei thisaih khu leipa la, Ei chana ta apahâna su hmô khah sy.

¹⁹ Tahmâ chhao he moh teh u, Nâ pahnokheituhpa cha avâ liata y ta, Ei châta a duahpa cha su sâhpa liata a y.

²⁰ Ei viasazy ta na zakhei ei ta, Ei mozy ta Khazohpa lâ mothlih ama pathla.

²¹ Chyhsa hmia liata bie a duakheipa hawhta, Ano ta Khazohpa hmia liata chyhsapa he a duakhei se ei tah kaw dia!

²² Kô chyhta a khô tawhta, Heih lei râh lâ sie aw na ta, Vaw kua khao aw va na.