ZAWBÂ 15 - Mara Bible RV (BSI)

Eliphâ ta Zawbâ a maochhie: Zawbâ Khazohpa chi vei

¹ Temani chyhsa Eliphâ ta a chhy ta:

² “Chyhsa sopa ta ziza liata pahnona rakha ta bie a chhypa ta, Nochhi thlih ta a py a pabie aw ma?

³ Bie chaopopa reipa ta, Bie phahnai leipa hmâpa ta bie a ei aw ma?

⁴ Khazohpa china pahlei chi ta, Khazohpa achhyna na pakhâ ha he zaw.

⁵ Na moleina ta na pakah liata biehnei ta, Piehpiena paleih na hmâ he zaw.

⁶ Kei ta thailei cha pachâ va na; Nâma pakah tlai ta thailei cha pachâ ta, Nâma hmao tlai ta a cha sei.

⁷ “Nâ he chyhsa a pih tuachaipa na châ ma? Tlâhthlôhzy y hlâta taopa na châ ma?

⁸ Khazohpa ryureina bie na nathlie ma? Nâma sona ma â daih na tah haw?

⁹ Keimo pahno leipa khâpa ma na pahno hlei? Keimo liata a sia leipa khâpa ma na no a vâh via hlei?

¹⁰ Eima hry liata luh pawhpa nata machâpazy y ei ta, Na paw hlâta uhthei viapazy ama y.

¹¹ Khazohpa thlapalôhna cha na châta chyh tupa ta, Reih naipa ta cha chhopa cha a chyh tu ha ma?

¹² Khazia na palôh ta cha paviasa ta, Na mo ta châ chhi chheipa ta,

¹³ Na thlahpa ta Khazohpa chakhia chi ta, Cha hawhpa bie cha na pakah tawhta a pua tly?

¹⁴ Chyhsapa cha khâpa châ ta ma, A pathaih thei aw tly? Chanô sapa cha khâpa châ ta ma, A siapaki thei aw tly?

¹⁵ Moh teh, Khazohpa cha a vâlyuhchâpazy chô lia hmahta ngâna pahnieh leipa ta, A mohmô liata cha avâzy chhao pathaih leipa châ ta;

¹⁶ Chyhsa pasichhihpa nata avyuhpa, Ti hawhta adoleina a dohpa chhochhi cha, A mohmô liata a tloh lei pachai aw dia!

¹⁷ “Ei cha pahmô aw, na nathlie teh; Ei hmôpa cha ei phuah aw.

¹⁸ Cha cha chyhsa sopazy biereipa châ ta, Pathlatuhzy daihti tawhta nyu leipa bie a châ.

¹⁹ Âmo hnoh deita ta râh cha piepa châ ta, Chihropazy chapia leina râh a châ.

²⁰ Moleipa cha a hro chhôh zydua ta pasa taopa ta a rôh ta, Nôchhiepa châta raopa kô chhôh zydua â rôh lymâ.

²¹ Chichhihpa pyuzy a nah ta thei ta, A phasa hai nota paraotuhpa ta â vyhnao aw.

²² Zohna tawhta a kua heih a pangiasa vei, Ano cha zaozi châta ngia hapa a châ.

²³ Viahchhâ vâta viavipa ta, ‘Khataih lia a y,’ tah ta. Zohna noh ta â vaw hnia haw tahpa pahno ta,

²⁴ Nôpona nata pachârôhna ta pachisa ta, Adyuhna a pahniepa bei hawhta, Ano cha ama pahnie haw,

²⁵ Khazohpa chô liata a ku hy ta, Atotaotheipa hmia liata thatlô kawpa hawhta â hmô ta,

²⁶ Vyhphao chhapa nata ahlôpa chabapa ta, Thlahsana rai hnei leipa ta Khazohpa a râhnaopa vâta.

²⁷ “A thaw ta a hmia pahly hra sala, A chai liata a thaw patoh hra sala,

²⁸ A rao awpa khihpizy liata pahrâ aw ta, Hnaihny apathluna o a châ awpa, Pahrâ tlâh lei nawpa ozy liata a pahrâ aw.

²⁹ Hneirôh khao leipa aw ta, A dyhphana y ngâ thlâh ha leipa aw ta, A hneina ta râh tlai aw vei.

³⁰ Zohna tawhta pua leipa aw ta, Meipaleih ta a chiahzy paraoh aw ta, Khazohpa pakah hu ta a phaoh syulyu ha aw.

³¹ Anosasyh a dôveipa ta aruapa liata a pahnieh khah sy, A hlao awpa cha aruapa deita châ tlôh ta.

³² A daihti a tlô hlâta uah aw ta, A chiah hro aw vei.

³³ Kre zôh hawhta a kre thei heipa chatho pathlah aw ta, Ôli kô hawhta a paw a chakhyh aw.

³⁴ Khazohpa a pachâ leipa hlaozy cha choh ei ta, Panaopapana poh ozy cha mei ta a kâ tyh.

³⁵ Nôpona saw phaopa ta, Moleina saw sa ei ta, Ama chhi ta dôveina a papua tyh,” tah ta.