ZAWBÂ 14 - Mara Bible RV (BSI)

Zawbâ bie a reih pazao: Thina he â vaw hnia kaw

¹ “Chanô sapa chyhsa châta la, Noh chyhta dei hnei ta, Cha chhao cha ngiarohna ta a bie.

² Pawpi hawhta vaw pawh ta, Thlai a uah heih tyh; Nohpahlipa hawhta a zaw ta, Y khao vei.

³ Cha hawhpa chyhsa chô liata mo padeihpa ta, Ryureina liata na hnohta einâ chhi chi?

⁴ Ahy ma hmo pathaih leipa tawhta hmo pathaihpa a papua thei aw? Pakha hmah y veih ei.

⁵ A nohzy rao chiehpa châ ta, A thlazy na hnohta y ta, A khô thei lei awpa râhri na tao ha tawhta cha,

⁶ A heihsai la, pahâsa mah y, Chatanachata ahlaopa hawhta, A noh â ly thei aw.

⁷ “Tho châta la hnabeiseihna a y, Thlu hra ei sala, A chhyh thao hei aw ta, A chiah thiehpa chhâ aw vei.

⁸ Alei liata a thari machâ hra sala, Chhaohlei liata a tho chuahmi thi hra sala,

⁹ Ti roh ta a chhyh kaw thao aw ta, Thody hawhta a chiahzy a pachiah heih aw.

¹⁰ Chyhsapa deikua cha thi ta, zaotla ta; A hu chhâ ta, y khao vei.

¹¹ Tipo tawhta tizy chhâ ta, Chavah kua ta a chawhkaraipa hawhta,

¹² Chyhsapa cha a zia ta thyu khao vei; Avâzy a lei hlâlei cha a hra khao leipa aw ta, Â môpa pathyupa châ aw vei.

¹³ Athihkhih liata na nyu la, Na hiehâhna a pai hlâlei na nyu la, Kei châta daihti na raopa la, Cha daihti liata nâ thei la ei tah kaw dia!

¹⁴ Chyhsapa cha thi sala, a hroh hei aw ma? Ei chakao daihti chhôh zydua hâ aw na ta, Nâ thlatuhpa a vaw tlô hlâlei ei hâ aw.

¹⁵ Na aw aw chi ta, Ei châ chhy aw; Na kuzô he na vâ kaw aw.

¹⁶ Cha tita cha ei keih chakâpazy paki aw chi ta, Ei moleina deikua a laichadai khao aw va chi.

¹⁷ Ei taopasina cha sykhao chhôh liata hraipa ta y ta, Ei paraona chhao na khu ha aw.

¹⁸ “Tlâhpi chopa ta lei ta, Lôpanô chhao a yna tawhta pasiepa a châ;

¹⁹ Tizy ta alôzy patlô ta, Tily chahrapazy ta alei a siekhei; Cha hawhna chata chyhsapa hnabeiseihna chhao na pahlei tyh.

²⁰ Ano cha chhâzaw ta pahnie chi ta, A leidia haw; A hmia panano chi ta, Na pasiesa haw.

²¹ A sawchapawzy palyupalihpa châ ei ta, Châhrasala pahno khao vei; Panawhpa châ ei ta, Hmô khao hra vei.

²² Ano pôhpa pasana dei pahno ta, Ano châ deita ta mâchhie â sa,” tah ta.