ZAWBÂ 13 - Mara Bible RV (BSI)

Zawbâ bie a reih pazao: Khazohpa liata ei hnabeiseih pyly aw

¹ “Moh teh u, cha zydua cha ei mo ta hmô ta, Ei nah ta a thei; A zydua ta ei pahno khai.

² Nama pahnopa maih ei pahno hra, Nâmo hlâta nawh via va na.

³ Chatahrasala Atotaotheipa chho aw na ta, Khazohpa liata ei thâtih tlao ei duakhei aw.

⁴ Nâmo deikua cha, Nama bie liata haipa rôh hnia thlu ei chi ta; Nama zydua ta, Hmâ tlâh leipa dawhtyzy nama châ.

⁵ Phie a chalih ha u la cha, Chyhsa sopa nama châ awpa tlai!

⁶ Tahmâ ei bie thei u la, Ei hiapa he nathlie tua u.

⁷ Khazohpa châta bie doleipa chhopa ta, Ano châta haipa bie nama reih aw ma?

⁸ Ano nama khokhei via aw ma? Khazohpa châta namâ duah aw ma?

⁹ Khazohpa ta châ chu pasia ei sala, Nama châta a pha aw ma? Chyhsa ta chyhsa hropa a dôveipa hawhta, Khazohpa cha nama dôvei thei aw ma?

¹⁰ Arulâta khokheina nama hnei khiahta la, A cha ra thlyu aw ei.

¹¹ A rônahna ta cha pachisa aw ei ta, A chichhihna ta cha tla thlu aw veih ei ma?

¹² Nama biesozy cha, Buchâh hawhpa biesozy châ ei ta; Namâ vainazy cha, Beihlei ta sapa avainazy hawh dei a châ.

¹³ “A chalih u la, bie na pareisa tua u, Ei chô liata khâpa hmo rai vaw tlô lah vâ.

¹⁴ Khati taih ma a châ aw tly, Ei sapa he ei hâh ta sie aw na ta, Ei hrona he ei ku liata ei so aw i?.

¹⁵ Eina thie hapa chhao ta, Ano liata hnabeiseihna hnei aw na ta, A hmiakô liata ei thâtih ei duakhei pyly aw.

¹⁶ He he ei pachhana cha a châ, Khazoh pahno leipazy cha, A hmiakô liata a vy thei aw veih ei.

¹⁷ Ei biezy he a phapa ta nathlie u la, Ei phuahpa he nama nah liata a ngia mawh sy.

¹⁸ Tahmâ nathlie teh u, Ei thâtih rei awpa a chhuanoh khai ha na ta, Thai ei châ aw tahpa ei pahno.

¹⁹ Ahy ma nâ leihtuhpa cha? Eina leihna â do khiahta cha, A chalih aw na ta ei thi aw.

²⁰ Hy Khazohpa, hmo miano na pasaih mah y, Chatanachata na hmia tawhta a nyu aw va na:

²¹ Kei tawhta na ku la la, Na chichhihna ta na pachisa khah sy.

²² Chatanachata na aw la, Ei châ chhy aw; A châ vei khiah, Kei na pareisa la, Nâ ta nâ chhy mah y.

²³ Ei paraonazy nata ei moleinazy khatlu ta ma a hluh tly? Ei taopasina nata ei moleina cha na pahnosa mah y.

²⁴ Khazia na hmia nyu chi ta, Na chariahpa ta eina pachâ chi tly?

²⁵ Chhohna thlih ta a phaopa pachhiparypa ta, Sâh kô raohpa ma nâ chadai aw?

²⁶ Ruchhôna biezy na ro thlu chi ta, Ei thyutlia moleina ryu eina patosa chi.

²⁷ Ei pheizy keihrai dai chi ta, Ei lâpi zydua mohpasia chi ta; Ei pheihniezy na ngia khai.

²⁸ Chyhsapa cha hmo thupa hawhta zaotla ta, Chhoma-u niepa chysia hmypa hawhta a zaotla tyh.”