ZAWBÂ 11 - Mara Bible RV (BSI)

Zôpha biereipa: Chhiena a tyh tlâh na châ

¹ Nâmâ chyhsa Zôpha ta Zawbâ cha a chhy ta:

² “Cha bie zyzie cha a chhy leipa ta ypa ta, Chyhsa reih hluhpa maih thai ama châ aw ma?

³ Nâ palaina bie ta, Chyhsa a chalihsa aw ma? Pasipasawhna bie na rei nota, Ahy hmah cha ra aw veih ei ma?

⁴ ‘Ei biezyhpa a do ta, Na mohmô liata ei pathaih,’ tah chi ta.

⁵ Khazohpa ta bie reih sala, A pakah duah cha â thlu sala,

⁶ Sona bieru cha chho sala ei tah kaw dia! Ano cha pahnona ta a biepa châ tlôh ta. Chavâta he he pahno mah y, Khazohpa ta na paraona hlâta nai viapa ta, Na chô liata a taopa tlao a châ hih.

⁷ “Khazohpa bienyupazy na pahno thei ma? Atotaotheipa chhâna na hmô thei ma?

⁸ Avâ hlâta a sâh via ta, Nâ khâpa ma na tao thei? Athihkhih hlâta a thu via ta, Nâ khâpa ma na pahno?

⁹ Alei hlâta seih via ta, Tilaipi hlâta a kawh via.

¹⁰ A vaw chapia khiahta tlyma, Patâhna o liata a cha khô khiahta tlyma, Ryureina a aw khiahta tlyma, Ahy a pakhâ thei aw?

¹¹ Chyhsa leilôpa cha pahno ta, Paraona a hmô tita, Pachâ aw vei ma?

¹² Alâ dawpa hrie leipa chyhsapa lâta a pi tita, Chyhsa hrupa cha pahnona a hnei aw.

¹³ “Na palôh a chhuahdy la, Ano lâ na kuzy pazawh la,

¹⁴ Na ku liata moleina a ypa thypa ta, Na poh o liata paraona na pahrâsa leipa khiahta cha,

¹⁵ Noza leipa ta na hmia pachhua aw chi ta, Chi leipa ta â ipa ta nâ duah aw.

¹⁶ Na nôpona my aw chi ta, Na moleina cha, Ti a loh pathlah hapa hawh dei nâ thei aw.

¹⁷ Hrona cha nohchhô hlâta khaih via aw ta, Zohna chhao my hawh a châ aw.

¹⁸ Hnabeiseihna a ypa vâta, Thlalôhpa ta y aw chi ta; Mohmia pasaih aw chi ta, Abohna liata nâ pahâ aw.

¹⁹ A zia awh chi ta, Ahy hmahta cha pachisa leipa aw ei ta, Chyhsa hluhpi ta na khokheina ama tlua aw.

²⁰ Moleipazy mo deikua cha zoh aw ta, Amâ râ nawpa lâpi zydua lei khai aw ta, Ama kho chaipa cha, Ama hu chhâ awpa a châ aw,” tah ta.