ZAWBÂ 10 - Mara Bible RV (BSI)

Zawbâ ta bie a reih pazao: Khazohpa lâta ahawna

¹ “Ei hro he eina ai ngaita; Thata paphôh aw na ta, Ei palôh pasana ei reih tua aw.

² Khazohpa hnohta, Thailei na pachâ khah y, Tah aw na ta, Khazia eina chakhia chi, Na chho teh, ei tah aw.

³ Tlybaipa pha tah chi ta, Nâma ku tlai ta na taopa mohnaopa ta, Moleipa ryhraona ma tlao pha na tah via haw?

⁴ Sapa mokhaoh ma na hnei? Chyhsapa hmôpa hawhta ma na hmô hra?

⁵ Na nohzy chyhsapa nohzy hawh châ ta, Na kôzy chyhsapa kôzy hawh ta ma a châ?

⁶ Khazia ei paraona a laichadai chi ta, Ei moleina na tlua tly?

⁷ Thaileina ei hnei leizie pahno chi ta, Na ku tawhta nâ pachha awpa y veih ei tahpa Na pahno thlâh ha vei ma?

⁸ “Na kuzy ta na pasuah chi ta eina tao chi, Châhrasala tahmâ cha, Nâma lilaw ta eina parao ha chi he zaw.

⁹ Ngiachhiepa ta pachâ tua rai, Beihlei hawhta na tao chi ta, Dohlei lâ ma eina pakuasa heih aw chi?

¹⁰ Sâhpiti hawhta na patlaipa ta, Sâhpiti pakuapa hawhta ma eina pakua aw chi?

¹¹ Vo nata sapa ta na tobi chi ta, Ru nata thari ta eina phieh pakaoh chi.

¹² Hrona nata khokheina na pie chi ta, Na mohôhna ta ei thlahpa a pabohsa.

¹³ Chatahrasala hezy he na palôh liata nyu chi ta, He he nâ chhuahna a châpa ei pahno:

¹⁴ Ei molei khiahta cha, Na moh chi ta, Ei paraona nâ ngiahthai khoh va chi.

¹⁵ Thailei ei châ khiahta cha, Hupopa ta ei y. Adopa ei châpa chhao ta, Ei luh pachhua ngâh va na. Nozana ta bie na ta, Nôpona liata ei pamôh hih.

¹⁶ Ei luh ei pachhua khiahta cha, Chakeibarôhneipa hawhta nâ byh chi ta, Na thatlôna eina hmâ thlu chi.

¹⁷ Eina leihna chi pathieh chi ta, Ei chô liata na ruchhôna paru viapa ta, Pheisaihzy a hri hri ta eina tua thlu chi.

¹⁸ “Khazia ma chhi tawhta eina vaw papua chi tly i? Ahy hmô hlâta vaw thi ha aw sah la, A pha via awpa tlai!

¹⁹ A y leipa hawhta châpa ta, Chhi tawhta thlâ lâ vaw sie ha aw sah la, A pha via awpa tlai!

²⁰ Noh chyhta dei ei hnei bâ hih. Nâ pasiesai chy la, Buakhata chhâ alyna hnei hra tua sah,

²¹ Zohna nata thina nohpahli râh, Heih lei râh lâ ei sie hlâta,

²² Zâ zoh chaina râh, A thlâzi thai leina thina nohpahli râh, Khaihna chhao zohna hawh a châna râh lâ ei sie hlâta,” tah ta.