ZÂMIE 5 - Mara Bible RV (BSI)

Hneirôhpazy lâta zikyurâna

¹ Nâmo, hneirôhpa saih u, a vy u la, nama chô liata rietheina vaw tlô haipazy vâta cha u la, thata sâh teh u.

² Nama hneirônazy hmy ha ta, nama chysiazy chhoma-u ta a chaih khai haw.

³ Nama ngôh nata tâkâzy a saiie khai ha ta, a saiiepa cha nama thaileizie pahnosana châ aw ta, nama sapa mei hawhta a kâ aw. Noh hnôhchaipazy liata ryu a pachôpa nama châ.

⁴ Nathlie tua u, nama lyu rai a hriapazy hlao â doleipa ta nama patâhpazy khata nâmo leihpa ta awh ei ta, hriatuhpazy chana pyu cha, Pheisaihzy Abeipa nakhaoh liata â ngia haw.

⁵ Khizaw liana heta sapa palysapa ta phasapa ta hroh ei chi ta, thina noh zy lia taihta nama palôh namâ palysa.

⁶ Chyhsa siapazy thailei pachâsa ei chi ta, châ dyuh leipazy nama thie haw.

Tao hualuana

⁷ Chavâta unawh saih u, Abeipa a vy hlâlei palôh pasipa ta y teh u. Pachâ tua u, lyuhneituhpa cha vâsua hmiatuapa nata vâsua hnôh viapa a hmô hlâlei alei thei sôhpa a hâ hualua tyh.

⁸ Nâmo chhao palôh pasipa ta y u la, Abeipa avyna a hnia ha tlôh ta, chavâta palôh a ipa ta y teh u.

⁹ Unawh saih u, seipa ta nama y lei nawpa ta, nâmo nata nâmo a paphôh thlu khuh vy. Moh tua u, Ryureituhpa cha ochhi thaby liata â duah thlâh haw.

¹⁰ Unawh saih u, Abeipa moh ta bie a reihpa hrohsopazy kha, pasataona nata palôh pasina kyh liata a mopâ awpa ta hmâh teh u.

¹¹ Pachâ teh u, pasataotuhpazy cha nohlaopa tah pi ta, Zawbâ palôh pasizie kha thei ei chi ta, Abeipa hmochhuahpa chhao hmô ei chi ta, Abeipa cha ngiachhietuhpa nata zawngiahtuhpa a châpa nama hmô haw.

¹² Châhrasala unawh saih u, cha zydua hlâta peimawh chaipa cha, chhiesa lei awpa a châ. Avâ reipa ta tlyma, alei reipa ta tlyma, hmo hropa kheihawhpa reipa ta tlyma, chhiesapa ta bie a taih leipa u la, thailei pachâsapa ta nama y lei nawpa ta, a châpa cha “a châ” tah u la, a châ leipa cha, “châ vei” tah lymâ teh u.

¹³ Nama hry liata pasataopa ama y ma? Thlahchhâ mawh sy. Alypa ama y ma? Reithaina hla sa mawh sy.

¹⁴ Nama hry liata tlâhleipa ama y ma? Awnanopa machâzy aw sala, âmo ta Abeipa moh ta sathaw thupa ta, ano châta thlahchhâ mawh ei sy.

¹⁵ Ngiapâna ta thlahchhâna ta tlâhleipa cha pachha aw ta, Abeipa ta ano cha a pathyu aw. Moleina hmo a taopa a châ khiahta cha, a ngiahthaipa a châ aw.

¹⁶ Chavâta patlâhpa ta nama y thei nawpa ta, nama moleinazy reihpha a cheih raihrie u la, thlah a chhâkhei raihrie teh u. Chyhsa siapa thlahchhâna ta hmo rônahpa a tao tyh.

¹⁷ Elaizâh kha keimo hawhpa nôchâ a phaohpa chyhsapa châ ta, avâ suah lei awpa ta phahnai khoh ngaitapa ta thlahchhâ ta, kô thôh nata thla charu chhôh zydua alei chô liata avâ suah khao vei.

¹⁸ Chatawhcha thlahchhâ heih ta, avâ ta avâ pasuasa ta, alei ta thei a pathei heih.

¹⁹ Unawh saih u, nama hry liata biehmeiseihpa tawhta pavia sala, ahy tlyma ta â vaw chhi heih khiahta cha,

²⁰ a paviana lâpi tawhta moleipa a chhi pakhuatuhpa cha, thina tawhta a thlahpa a pachhapa châ aw ta, a moleina hluhpi a khupa haw tahpa a pahno mawh sy.