ZÂMIE 3 - Mara Bible RV (BSI)

Paleih hmotaotheina

¹ Unawh saih u, nama hry liata chyhsa hluhpi la pachutuhpa châ khoh hlei khuh vy. Keimo pachutuhpazy pi cha pachiana a sâh viapa ta pachia awpa eima châpa nama pahno.

² Eima zydua ta kyh hluhpi liata eimâ chapia tyh. Chyhsa ta a biereipa liata â chapia beih vei khiahta cha, cha chyhsa cha chyhsa pakipa châ ta, a pôhpa zydua chhao a vaih theipa a châ.

³ Pachâ tua u, eima rei amâ ngiah thei nawpa ta arâ pakah liata chhâri pabaw pi ta, arâ pôhpa zydua eima khona lâ eima pasiesa thei.

⁴ Balyhzy chhao he pachâ tua u, lai ngaita ta, thlih rupa ta a pasiesapa a châ tarawpa ta, haohtuhpa ta pahiehna chyhpata hmâpa ta a khona lâ maih a pasiesa thei.

⁵ Cha hawhna chata paleih chhao he pôhpa pachiapa chyhpata châ ta, a palai ngaitapa a châ. Meihlih dipa ta râh kawh pi a pakâ theizie chhao pachâ tua u!

⁶ Paleih he mei châ ta, moleina khizaw a châ. Eima pôhpa pachiahpazy hry liata mei tlu ta chichhihpa châ ta, moleina tao awpa ta thatlô ngaitapa a châ. Paleih chata pôhpa zydua papuapalei ta, hro chhôh khihsatôhtuna zydua mei ta pakâ ta, hriena su mei tipo lâ a chhituhpa a châ.

⁷ Râhsa chi to, pavaw chi to, alyhpasa chi to nata tilaipi liata hmohrohneipa to he pangâh theipa châ ei ta, chyhsapa ta a pangâh tyh.

⁸ Paleih deikua cha ahy hmah ama pangâh thei leipa châ ta, thina châmaih ta a biepa, moleina a y molo thei leipa a châ.

⁹ Cha paleih chata eima Beipa nata Paw reithai pi ta, cha paleih lilaw chata Khazohpa lyupa ta taopa chyhsazy chô liata chhie eima sa tyh.

¹⁰ Pakah miakha tawhta reithaina nata chhiesana a pua tyh. Unawh saih u, cha hmozy cha, cha hawhta a châ awpa châ vei.

¹¹ Tihnawh miakha tawhta ti pahâhpa nata ti iahpa a papua beih ma?

¹² Unawh saih u, theiku kô liata ôli thei a pathei beih ma? Cha leipa chhao ta, kre zôh liata theiku a pathei thei ma? Cha hawhna chata ti iahpa khaoh ta ti pahâhpa papua thei hra vei.

Chô lâ tawhta sona

¹³ Nama hry liata ahy ma asopa nata novâhpa a y? A reisi ngaitapa nata so ngaitapa ta, a hmotaopazy cha hrozie phapa ta pamosa mawh sy.

¹⁴ Nama palôh liata hiatlia pasa kawpa nata khohlei khona a hneipa nama châ khiahta deikua cha, nama sona cha a palaikhei leipa u la, biedopa a dyuhpa ta haipa bie reih khuh vy.

¹⁵ Cha sona cha chô lâ tawhta a za tlôpa sona châ leipa ta, khizaw sona châ ta, thlahpa tawhta châ leipa ta, ahripa tawhtapa tlao a châ.

¹⁶ Hiatliana nata khohlei khona a yna lia maihta, tymâna nata paraona pasichhihpa to a y tyh.

¹⁷ Chô lâ tawhta sona a za tlôpa deikua cha, a hmiatua ta pathaih ta, thlalôhna ta pazi ta, a nônai ta, hmo yzie pahno thai ta, zawngiahna nata thei phapa ta bie ta, khokhei viapa hnei leipa ta, so piehpiepa châ vei.

¹⁸ Siana thei cha adyryhna taotuhpazy ta adyryhna liata chi ama tupa patheipa a châ.