ZÂMIE 2 - Mara Bible RV (BSI)

Khokhei viapa hnei lei awpa

¹ Unawh saih u, eima Beipa Zisu Krista, rônahna Beipa ngiapâtuhpa nama châpa hawhta, khokhei viapa hnei khuh vy.

² Namâ pakhyna o liata ngôh kusadizy a kypa nata chysia phapa a tobipa chyhsa a vaw ngia ta, chysia chhiepa a tobipa dyhchhiepa a vaw ngia hra ta,

³ chysia phapa a tobipa cha pachâ peimawh viapa ta, a hnohta, “Atyuna phapa liana he a tyuh mah y,” tah ei chi ta, dyhchhiepa hnohta, “Hao liata a kei duah teh,” tlyma, “Ei phei thaby siphiah liata a tyuh teh,” tlyma nama tah khiahta cha,

⁴ nâmo nata nâmo a pathluapa châ ei chi ta, palôh moleipa a phaohpa pachiatuhpazy châ aw veih ei chi mâ?

⁵ Unawh kho ngaitapa saih u, pachâ tua u! Khizaw pachâ ta dyhchhiepazy cha, ngiapâna liata hneirôh awpa nata ano kyh pachâtuhpazy hnohta bie â taihpa khinarâh ryutotuhpazy châ awpa ta, Khazohpa ta â tlyhpazy châ veih ei ma?

⁶ Nâmo deikua cha, dyhchhiepa nama mohnao. Châ tlybaipa nata pachiana lâ châ daophituhpazy cha hneirôhpazy châ tyh veih ei ma?

⁷ Âmo cha moh zachhihpa nama phaopa a reipachhietuhpazy châ veih ei mâ?

⁸ Biehrai ta, “Nâma kyh nâ pachâpa hawhta na vaih kyh na pachâ awpa a châ,” tahpa abeina ryhpa he nama zyh khiahta cha, nama tao pha na.

⁹ Khokhei viapa nama hnei khiahta deikua cha, moleina hmo a taopa châ ei chi ta, hmoparaotuhpa nama châ tahpa ta ryhpa ta thailei a cha pachâsa ei.

¹⁰ Ahy rai ryhpa zydua zyh paki hra sala, kyh kha a parao khiahta cha, a zydua liata thaileipa a châ.

¹¹ “Aphei kha,” a tahtuhpa cha, “Liany cheih kha,” a tahtuhpa a châ hra. Chavâta nâ phei leipa chhao ta, liany a cheihpa na châ khiahta cha, ryhpa a paraotuhpa na châ.

¹² Khotalaina ryhpa hmâpa ta ama thâtih pachia awpazy hawhta bie reih u la, hmo tao muh vy.

¹³ Zawngiahna a hnei leipa chyhsa cha, pachiana ta ano cha zawh a ngiah hra aw vei. Zawngiahna cha pachiana hlâta a rônah via.

Ngiapâna thipa

¹⁴ Unawh saih u, chyhsa ta, “Ngiapâna ei hnei,” tah sala, hmotaopa a hnei tlôh leipa khiahta cha, khâpa phahnaina a hnei? Cha hawhpa ngiapâna chata ano a pachha thei aw ma?

¹⁵ Unawhpa tlyma, sietanô tlyma, chysia hnei leipa nata noh chareih nie awpa phahlapa ta y sala,

¹⁶ nama hry liata ahy tlyma ta a hnohta, “Thlalôhpa ta sie la, a lalôhpa ta y la, rihbiepa ta y mah y,” tah sala, pôhpa châta â ngiahpa a pie tlôh leipa khiahta cha, khâpa a phahnai aw?

¹⁷ Cha hawhna chata, ngiapâna cha hmotaopa hnei leipa ta ano dei ta a y khiahta cha athipa a châ.

¹⁸ Chyhsa ahy tlyma ta, “Nâ ta ngiapâna hnei chi ta, kei ta hmotaopa ei hnei,” a tah thei. Hmotaopa a hlao leipa nâ ngiapâna cha na pahmô tua, kei ta ei ngiapâna cha ei hmotaopa ta ei cha pahmô aw.

¹⁹ Khazohpa cha pakha dei a y tahpa a ngiapâ chi ta, a pha na. Ahripazy chhao ta cha cha a ngiapâ ei ta, amâ chalyu tyh mâh tâh!

²⁰ Hy chyhsa hrupa y, hmotaopa a hlao leipa ngiapâna cha khâpa hmah châ vei tahpa pahmô awpa na khoh ma?

²¹ Miah pathlatuhpa Abarahâ ta a sawchapawpa Aisika maisâh chô liata a hlâ nona kha, hmotaopa vâta thai pachâsapa châ vei mâ?

²² Â ngiapâna cha a hmotaopa nata hria khoh ta, ngiapâna cha hmotaopa ta a paki tahpa na hmô.

²³ Chatanachata Biehrai ta, “Abarahâ cha Khazohpa a ngiapâ ta, cha ngiapâna cha a siana ta raopa a châ,” a tahpa bie kha vaw tlô ta, Abarahâ cha Khazohpa viasa ta bipa a châ.

²⁴ Ngiapâna vâ dei châ leipa ta, hmotaopa vâta chyhsa ta thai tlao a châ tyh tahpa nama pahno.

²⁵ Cha hawhna chata âzuahnô Rahâbi chhao kha, lyuhchâpazy a vaw ly ta, lâpi hropa lâta a pasiesapa liana khata, hmotaopa vâta thai pachâsapa a châ!

²⁶ Thlahpa a hlao leipa pôhpa cha athipa a châ. Cha hawhna chata hmotaopa a hlao leipa ngiapâna chhao athipa a châ hra.