ZÂMIE 1 - Mara Bible RV (BSI)

Anaohna

¹ Khazohpa nata Abeipa Zisu Krista chakaotuhpa Zâmie ta chi hrawh hleino paipatlapazy ei châ naoh ei.

Ngiapâna ta thlahchhâ awpa

² Unawh saih u, kao to liata pasiana namâ tyh tita alyna ta rao khai teh u.

³ Namâ ngiapâna pasiana ta tiamana a tao tahpa nama pahno.

⁴ Khâpa hmah phahla leipa ta, pitlohna lâ pangai u la, phapakipa nama châ thei nawpa ta, tiamana chata a rai patlô mawh sy.

⁵ Nama hry liata ahy rai sona â phahla khiahta cha, Khazohpa lâ hiah mawh sy. Khazohpa cha chyhsa zydua hnohta riaphapa nata maochhie leipa ta sona a pietuhpa châ ta, sona a phahlapa hnohta sona piepa a châ aw.

⁶ Châhrasala alôhleina hnei leipa ta, ngiapâna ta hiah mawh sy. A lôh leipa chyhsa cha tilaipi chatlaopa hawhta châ ta, thlih ta phao ta, a pathluahpa hawhta a châ.

⁷ Cha hawhpa chyhsa cha khâpa hmah Abeipa tawhta hmô awpa a pangiasa khah sy.

⁸ Ano cha palôh miano a hneipa, a hmotaopa zydua liata a i leipa a châ.

⁹ Unawh areisipa cha cheihchalopa a châ tita, a ly mawh sy.

¹⁰ Hneirôhpa chhao, sibie paw hawhta a lo awpa châ ta, chavâta panawhpa a châ tita a ly mawh sy.

¹¹ Noh vaw chhi ta, thata palo ta, sibiepa cha uah ta, a paw zô ta, â ngiana a lei tyh. Cha hawhna chata chyhsa hneirôhpa chhao, hneirôna a tluana lâpi liata a uah aw.

Pasiana nata reipasaona

¹² Pasiana liata â ipa ta a duahpa cha a nohlao na. Pasiana a pahnie tita, Khazohpa ta ano kyh a pachâtuhpazy hnohta bie â taihpa hrona lakho a to aw.

¹³ Ahy hmahta reipasaona â tyh tita, “Khazohpa ta eina reipasao,” tah khah sy. Khazohpa cha moleina ta reipasao thei rimâ awpa châ leipa ta, ano chhao ta ahy hmah reipasao beih vei.

¹⁴ Chyhsa to aohraohna lâta sydiepa nata a chhipa ama châ tita, reipasaona amâ tyh tyhpa tlao a châ.

¹⁵ Aohraohna ta saw phaoh ta, moleina sa ta, moleina cha a vaw pitloh nahta, thina a tlôkhei tyh.

¹⁶ Unawh kho ngaitapa saih u, dôveipa ta y khah u.

¹⁷ Hmosaipiepa phapa nata hmosaipiepa pakipa zydua cha chô lâ tawhta a zupa châ ta, khaihpazy Paw tawhta a zupa a châ. Ano liata ananona nata nohpahlipa y vei.

¹⁸ A hmotaopazy hry liata hmia a sahpa eima châ thei nawpa ta, ano khozie hawhta biehmeiseihpa liata a sapa eima châ.

Theipa nata taopa

¹⁹ Unawh kho ngaitapa saih u, he he pahno teh u. Chyhsa to ta bie rei a chhu leipa ta, nathlie tlao a chhu ei sala, hiehâh rupa châ mawh ei sy.

²⁰ Chyhsapa hiehâhna ta Khazohpa siana palâsa vei.

²¹ Chavâta apuapa zydua nata moleina to pahlei khai u la, nama thlahpa a pachha theipa, bie chi tupa cha a reisi ngaitapa ta a pyh muh vy.

²² Nâmosasyh ta a dôveipa ta, bie nathlietuhpa dei châ leipa ta, bie zyhtuhpa tlao châ muh vy.

²³ Ahy rai bie thei ta, a tao tlôh vei khiahta cha, thlalâ liata a pikheipa hmia a mohpakiapa chyhsa hawhta a châ.

²⁴ Pakhâta ta a moh ta, sie ta, kheihawhpa chyhsa ma a châ tahpa thlai a my ha tyh.

²⁵ Khotalaina ryhpa pakipa cha moh ta, cha hawhta hroh ta, ryhpa cha thei ta, thlai a mypa châ leipa ta, zyh ta, ryhpa hawhta a taopa chyhsa cha, a hmotaopa liata thlaochhipa ta a y aw.

²⁶ Ahy rai zyhna pachâ kawpa hawhta â pachâ ta, a paleih a vaih tlôh leipa cha, anosasyh ta â dôveipa châ ta, cha hawhpa zyhna cha phahnaina hnei leipa zyhna a châ.

²⁷ Khazohpa nata Paw mohmô liata zyhna pathaihpa nata papuapalei leipa cha, Hâra nata nôhmeizy ama riethei pasataona liata deichhypa nata khizaw puapa kia leipa ta ypa he a châ.