TITU 3 - Mara Bible RV (BSI)

Rai phapa hria hualuana

¹ Ngiapâtuhpazy cha ryureituhpazy nata biehneituhpazy liata a ngiarih ei sala, reingiahpa ta, hmo pha tao a mâ awpa ta chho chanei mah y.

² Ngiapâtuhpazy cha ahy hmah ama reipachhie awpa châ leipa ta, ahryusina amâ hneisai awpa a châ. Nônai kawpa ta y ei sala, chyhsa zydua chô liata areisina dopa ama palâsa awpa a châ.

³ Kha hlâta cha keimo chhao chyhsa hrupa, chhorupa, dôvei naopa, aohraohna nata phasana to sei ta a ypa, moleina nata hnâchhaona ta a hrohpa, chyhsa ta amâ haopa nata keimo nata keimo a hao raihriepazy eima vaw châ.

⁴ Châhrasala miah Pachhatuhpa Khazohpa phana nata kyhpachâna â vaw luah nahta,

⁵ siana ta eima hmotaopa vâta châ leipa ta, a zawngiahna vâta miah a pachha. Cha pachhana cha pipathina ta miah pathaisa ta, Thlahpa Pathaihpa taopathina zawhzi ta eima hmôpa a châ.

⁶ Miah Pachhatuhpa Zisu Krista zawhzi ta eima chô liata Thlahpa Pathaihpa thata hrypa eima châ.

⁷ Chatanachata a ngiachhiena vâta thai pachâsapa ta y aw pi ta, chhâzaw hrona a hnabeiseihpa ryutotuhpazy eima châ thei aw.

⁸ Khazohpa a ngiapâpazy cha hmo pha taona liata a hmâh lymâ mawh ei sy, tahpa bie cha ngâ tlâhpa châ ta, cha bie cha na reih lymâ awpa ei khoh. Cha cha hmo phapa châ ta, chyhsazy ta amâ thôkhei aw.

⁹ Aeina hrupazy, thyutônazy, achakhianazy nata ryhpa kyh liata ahryunazy a hneisai lymâ mah y. Athôhna a y leipa nata hraoleipa hmozy a châ.

¹⁰ Achhaihna a papuatuhpa cha, ei kha ei no zikyu a râ la, a ro khoh vei khiahta cha, ano nata azaona khâpa hmah hnei khao khah y.

¹¹ Cha hawhpa chyhsa cha sie chhei ha ta, moleipa châ ta, anosasyh ta thailei â pachâpa a châ tahpa pahno mah y.

Anaohna nata byhnâ awna

¹² Atemâ tlyma, Tykiku tlyma, nâ lâ ei vaw tuah tita, ei yna Nikôpôli khih lâ a vy a chhuah lylia mah y. Cha liata chasipaw daihti hmâ awpa ei chhuah.

¹³ Dâhthaipa Zenâ nata Apawlôsâ zy kha, khâpa hmah a phahla lei awpa ta mokhei la, ama khitlyna a palâ thei nawpa ta na theina zydua ta bao mah y.

¹⁴ Eima chyhsazy cha pathei leipa ta ama y lei nawpa ta, bao ngiahpazy bao ei sala, hmo pha taona liata a hmâ lymâ awpa ta a chu mawh ei sy.

¹⁵ Ei hnohta a ypa zydua ta ama châ naoh. Ngiapâna liata kyh miah pachâtuhpazy kha miah a naohpa mah y. Nama zydua hnohta ngiachhiena y mawh sy.