TITU 2 - Mara Bible RV (BSI)

Biezyhpa dopa pachuna

¹ Nâ deikua cha, biezyhpa dopa nata a ryhpa ta pachu mah y.

² Pawhrâhpazy cha palôh pasohpa, zachhihpa, a sohsi theipa, ngiapâna patapa, kyhpachâna a hneipa nata daotheipa chyhsazy châ awpa ta pachu mah y.

³ Nôhrâhpazy chhao, ama yzie liata Khazohpa a chizapa, chyhsa kyh a reih leipa nata kresawhti sei ta y leipa ta, hmo phapa pachutuhpazy châ awpa ta pachu mah y.

⁴ Nô laihsa viapazy cha ama vahpazy nata ama sawzy kyhpachâ awpa ta pachu la,

⁵ Khazohpa bie reipachhiepa ta a y lei nawpa ta, a sohsi theipa, chanô pathaihpa, o mohôhna rai a hriapa, nôphapa nata ama vahpazy rei a ngiahpa châ awpa ta pachu mah y.

⁶ Cha hawhna chata chapaw thyutlia viapazy chhao, a sohsi theipa châ awpa ta pachu mah y.

⁷ Kyh to liata hmo pha taona liata a mopâ awpa ta y la, na pachuna liata adona nata zachhihna palâsa mah y.

⁸ Na bie reipa â dozie reipasipasua thei awpa a châ leizie palâsa la, miah chakhiatuhpazy ta eima moleina rei awpa pahno leipa aw ei ta, maophyuhpa ta ama y aw.

⁹ Seizy cha kyh to liata ama zibeipazy rei a ngiahpa ta, ama zibeipazy ama palysa awpa châ ta, ama zibeipazy bie ama ei awpa châ vei.

¹⁰ Kusisuah hnei leipa ta, ngâ tlâhpa ama châna ama palâsa awpa a châ. Chatanachata miah pachhatuhpa Khazohpa biezyhpa cha kho â chhihzie kyh to liata ama palâsa thei aw.

¹¹ Khazohpa ngiachhiena cha a vaw luah ha ta, chyhsa zydua hnohta pachhana a vaw tlôkhei haw.

¹² Cha chata Khazohpa pachâ leina nata khizaw aohraohnazy bâhsaipa ta, tahmâhlâ khizaw liana heta asohsipa nata asiapa nata Khazohpa pachâna hro hrokhei awpa ta miah pachu ta,

¹³ eima Khazohpa rônahpa nata Pachhatuhpa Zisu Krista â vaw luahna hnabeiseihna lychhihpa hâ awpa ta miah a pachu.

¹⁴ Ano cha paraona zydua tawhta miah chatlaituhpa châ ta, hmo pha taona kyh liata phahnai a ngiahpa, a ryuto phopi châta miah pathaisa awpa ta, anosasyh ta keimo châta a hlâpa a châ.

¹⁵ Cha biezy cha pachupa ta, pasyu la, biehneina zydua chhaota chhorei mah y. Ahy hmahta cha mohnao khah ei sy.