THEIHTHAINA 9 - Mara Bible RV (BSI)

Arawna ta atheihnazy a hlâ

¹ A noh chariena noh ta, Mawsi ta Arawna nata a sawchapawzy nata Izarei machâzy aw ta,

² Arawna hnohta, “Moleina hlâna châta viahchao tôh dawpa nata raopa hlâna châta mietaku tôhpa, seina hnei leipa raihrie a chhi la, Abeipa hmiakô liata hlâ mah y.

³ Izarei sawzy chho la, ama hnohta, ‘Moleina hlâna châta mie tôhpa nata raopa hlâna châta viahchaotaw nata mietakutaw kô khapa raihrie, seina a hnei leipazy cheih u la,

⁴ Abeipa hmiakô liata aryhna hlâna atheihna châta viahchao tôhpa nata mietaku tôhpa cheih hra u la, sathaw pahlaopa niepa hlâna chhao cheih u la, Abeipa lâ hlâ teh u. Tanoh he nama hnohta Abeipa â vaw luah aw,’ tah mah y,” tah ta.

⁵ Mawsi biepiepa hawhta, hmo hlâ awpazy cha ahmaohna poh o tlyhmia liata vaw cheih ei ta, zawpi zydua ta a kei hniapa ta, Abeipa hmiakô liata a duah ei ta.

⁶ Mawsi ta, “Abeipa rônahna nama hnohta â vaw luah thei nawpa ta, hetana heta tao awpa ta Abeipa ta bie a cha pie ei,” tah ta.

⁷ Chatawhcha Mawsi ta Arawna hnohta, “Maisâh a vaw hnia la, na moleina hlâna nata na raopa hlânazy vaw hlâ la, nâma châta nata zawpi châta chatlaina tao teh. Abeipa biepiepa hawhta, zawpi vyuhpa ta hmohlâpa hlâ la, ama châta chatlaina tao teh,” tah ta.

⁸ Arawna ta maisâh cha a kei hnia ta, ano châta moleina hlâna viahchaotaw cha thie ta.

⁹ Arawna sawchapawzy ta thisaih kei pie ei ta, thisaih liana cha a kudy ny ta, maisâh kizy liata hnia ta, thisaih laibâhpa cha maisâh thaby liata patlai ta.

¹⁰ Abeipa ta Mawsi hnohta bie a piepa hawhta, moleina hlâna thaw nata a lôpozy nata a pathi a pahlypa thawzy cha, maisâh chô liata rao ta.

¹¹ A sapa nata a vo deikua cha, riehmo khôtho liata mei ta rao ta.

¹² Arawna ta raopa hlâna cha thie ta, a sawchapawzy ta a thisaih vaw pie ei ta, maisâh kâ zydua liata thia ta.

¹³ Raopa hlâna sa cha a tlo tlo ta a luh chhaota vaw pie ei ta, maisâh liata rao ta.

¹⁴ A chhôrihzy nata a pheizy pasi ta, maisâh liata raopa hlâna chô liata rao ta.

¹⁵ Cha khai tawhta zawpizy hmohlâpa cha hlâ ta. Zawpi châta moleina hlâna mie cha a chhi ta, thie ta, a hmiatuapa hawhna khata, moleina hlâna châta hlâ ta.

¹⁶ Raopa hlâna chhao cheih ta, a taozie awpa ryhpa raopa hawhta hlâ ta.

¹⁷ Cha khai tawhta niepa hlâna cheih ta, cha tawhtapa cha pazah kha la ta, maisâh liata rao ta, cha cha mydi ta raopa hlâna hleikhô ta hlâ baichhipa a châ.

¹⁸ Chatawhcha zawpi châta aryhna hlâna atheihna viahchao tôhpa nata mietaku tôhpa thie ta. Arawna sawchapawzy ta a thisaih vaw pie ei ta, maisâh kâ zydua liata thia ta.

¹⁹ Viahchao tôhpa thaw nata mietaku tôhpa thaw, a lahmei thawhpa, a rihhri, a lôpo nata a pathi a pahlypa thawzy vaw pie ei ta.

²⁰ A thawzy cha a palôh chô liata soh ei ta, maisâh liata rao ta.

²¹ Mawsi biepiepa hawhta, a palôh nata a phei chachâh lâ cha, Arawna ta chaluahpa hlâna châta Abeipa hmiakô liata chaluah ta.

²² Arawna ta zawpi lâ a ku pazawh ta, âmo cha byhnâ awpa ta, moleina hlâna, raopa hlâna nata aryhna hlânazy a hlâ khai tawhta za chô ta.

²³ Mawsi nata Arawna cha ahmaohna poh o liata a kei ngia ei ta, vaw pua heih ei ta, zawpi châta byhnâ aw ei ta. Abeipa rônahna chyhsa zydua chô liata a vaw luah ta.

²⁴ Abeipa tawhta mei vaw pua ta, maisâh liata raopa hlâna nata thawzy cha vaw kâ ta. Cha cha zawpi zydua ta ama hmô nahta, thata awh ei ta, â khu lâta pao ei ta.