THEIHTHAINA 8 - Mara Bible RV (BSI)

Arawna nata a sawchapawzy sathawthuna

¹ Abeipa ta Mawsi chho ta, a hnohta,

² “Arawna kha a sawchapawzy chhaota a chhi la, chysiazy, sathaw pathaihpa, moleina hlâna viahchao tôhpa, mietaku tôhpa pô no nata viahchhâ thinô pahlao leipa hrâbyh hmo kha cheih la,

³ zawpi zydua cha ahmaohna poh o chhikao chheipâh liata kei pahmaoh teh,” tah ta.

⁴ Mawsi cha Abeipa biepiepa hawhta tao ta, zawpi zydua cha ahmaohna poh o chhikao chheipâh liata ypakhy ei ta.

⁵ Mawsi ta zawpi hnohta, “He he tao awpa ta Abeipa biepiepa a châ,” tah ta.

⁶ Mawsi ta Arawna nata a sawchapawzy cha a vaw chhi ta, ti ta ama ngai pasi ta.

⁷ Arawna cha chôtho paky ta, chaisaihna pasaih ta, poh pabu ta, ephaw paky thlu ta, zôpha kawpa ta sapa ephaw chaisaihna ta a chai saih ta, cha chata ephaw cha a pôhpa nata saih pa-i ta.

⁸ Cha khai tawhta chachôhna vyhphao paky ta, chachôhna vyhphao liana cha Uri nata Thumi khô ta.

⁹ Abeipa ta Mawsi hnohta bie a piepa hawhta, a luh liata lakhu pakhu ta, lakhu hmia lâ liata ngôh lakho pathaihpa pakho ta.

¹⁰ Chatawhcha Mawsi ta sathaw pathaihpa la ta, achhyna byureih nata a chhôh liata hmo a ypa zydua thupa ta pathaisa ta.

¹¹ Maisâh chô liata sathaw ei sari thia ta, maisâh nata a hmobaoh zydua, rahô nata a patyunazy sathawthupa ta pathaisa ta.

¹² Arawna luh liata sathaw pathaihpa bao ta, cha hawhna chata Arawna cha pathaisapa ta panano ta.

¹³ Abeipa ta Mawsi hnohta bie a piepa hawhta, Mawsi ta Arawna sawchapawzy a vaw chhi ta, chôtho pakysapa ta, chaisaihna pasaih ta, khuthozy a pakhu ei.

¹⁴ Chatawhcha moleina hlâna viahchao tôhpa a vaw chhi ta, Arawna nata a sawchapawzy ta moleina hlâna viahchao tôhpa luh chô liata ama ku pahnieh ei ta.

¹⁵ Mawsi ta viahchao tôhpa cha thie ta, a thisaih la ta, a kudy ta maisâh kizy hniapa ta, maisâh cha pathaisa ta, thisaih laibâhpazy cha maisâh thaby liata patlai ta. Chatanachata maisâh châta chatlaina tao ta, maisâh cha a pathaisa.

¹⁶ Mawsi ta a rihhri thaw zydua, a pathi a pahlypa thaw nata a lôpo miano nata a thawzy la ta, maisâh liata rao ta.

¹⁷ Abeipa ta Mawsi hnohta bie a piepa hawhta, viahchao tôhpa vo, a sapa nata a ie deikua cha, riehmo khôtho liata rao khaipa a châ.

¹⁸ Cha khai tawhta raopa hlâna mietaku tôhpa cha hlâ ta. Arawna nata a sawchapawzy ta mietaku tôhpa luh chô liata ama ku pahnieh ei ta.

¹⁹ Mawsi ta mietaku tôhpa cha thie ta, maisâh kâ zydua liata a thisaih thia ta.

²⁰ Mietaku tôhpa cha pachhaih ta, a luh nata a sapa pachhaihpazy nata a thawzy rao ta.

²¹ Mawsi ta mietaku tôhpa chhôrih nata pheizy cha ti ta pasi ta, mietaku tôhpa cha a zydua ta maisâh liata rao ta. Abeipa ta Mawsi hnohta bie a piepa hawhta, cha cha ropahâhpa châta raopa hlâna, Abeipa lâta mei ta hmohlâpa a châ.

²² Chatawhcha mietaku tôhpa hropa, chahnaona mietaku tôhpa hlâ heih ta. Arawna nata a sawchapawzy ta mietaku tôhpa luh chô liata ama ku pahnieh ei ta.

²³ Mawsi ta mietaku tôhpa cha thie ta, a thisaih la ta, Arawna nakao chachâh lâ pawhmao nata a chachâh lâ kupi nata pheipi zy liata hnia ta.

²⁴ Cha hawhna chata Mawsi ta Arawna sawchapawzy chhao a chhi ta, ama nakao chachâh lâ pawhmao nata ama chachâh lâ kupi nata pheipi liazy ta thisaih hnia ta. Thisaih cha maisâh kâ zydua thia ta.

²⁵ Chatawhcha mietaku tôhpa thaw, a lahmei thawhpa, a rihhri thaw, a pathi a pahlypa thaw, a lôpo miano nata a thawzy nata a phei chachâh lâ la ta.

²⁶ Abeipa hmiakô liata a ypa viahchhâ thinô pahlao leipa hrâbyh tawhta viahchhâ pakâhpa miakha, sathaw pahlaopa viahchhâ puahpa miakha nata viahchhâ apapa miakha la ta, a thaw nata a phei chachâh lâ chô liata soh ta.

²⁷ Cha zydua cha Arawna nata a sawchapawzy ku liata soh ta, âmo ta chaluahpa hlâna châta Abeipa hmiakô liata chaluah ei ta.

²⁸ Cha khai tawhta Mawsi ta ama ku tawhta la ta, maisâh liata raopa hlâna chô liata rao ta. Cha cha ropahâhpa châta chahnaona hlâna, Abeipa lâta mei ta hmohlâpa a châ.

²⁹ Abeipa ta Mawsi hnohta bie a piepa hawhta, Mawsi ta a palôh la ta, chaluahpa hlâna châta Abeipa hmiakô liata chaluah ta. Cha cha chahnaona mietaku tôhpa tawhta Mawsi tovyuh a châ.

³⁰ Mawsi ta sathaw pathaihpa nata maisâh liata thisaihzy la ta, Arawna nata a chysiazy thia ta, a sawchapawzy nata a ama chysiazy chhao thia hra ta. Cha hawhna chata Arawna nata a chysiazy cha pathaisa ta, a sawchapawzy nata ama chysiazy chhao a hnohta pathaisapa a châ hra.

³¹ Mawsi ta Arawna nata a sawchapawzy hnohta, “Sa cha ahmaohna poh o chhikao liata chhoh u la, ‘Arawna nata a sawchapawzy ta ama nie awpa a châ,’ tahpa ta bie ei piepa hawhna khata, chahnaona hlâna hrâbyh liata viahchhâ chhaota, cha su liata nie teh u.

³² Sa nata viahchhâ nie laibâhpazy cha mei ta nama rao awpa a châ.

³³ Nâmo chahnao awpa ta noh sari byuh ta, chavâta chahnaona nohzy nama châta â ki hlâlei cha, noh sari chhôh ahmaohna poh o chhikao tawhta nama pua awpa châ vei.

³⁴ Tanoh ta taopa hawhna heta, nama châta chatlaina tao awpa ta Abeipa ta bie a pie.

³⁵ Ahmaohna poh o chhikao liata noh sari chhôh chhô nah zâ ta y aw ei chi ta, nama thi lei nawpa ta, Abeipa biepiepa cha nama zyh awpa a châ. Cha cha ei hnohta biepiepa a châ,” tah ta.

³⁶ Chatanachata Abeipa ta Mawsi hmâpa ta bie a piepa zydua cha Arawna nata a sawchapawzy ta tao khai ei ta.