THEIHTHAINA 7 - Mara Bible RV (BSI)

Thaileichâna hlâna ryhpa

¹ “He he thaileichâna hlâna taozie awpa ryhpa châ ta, hmo pathaih ngaitapa a châ:

² Raopa hlâna thie tyhna liata thaileichâna hlâna chhao thie awpa châ ta, maisâh kâ zydua liata a thisaih thia awpa a châ.

³ A thaw zydua hlâ khai awpa châ ta, a lahmei thawhpazy, a rihhrizy,

⁴ a lôpo miano nata a patoh kiapâh liata a lôpo a pahlypa thawzy nata a pathi a pahlypa thawzy cha, a lôpozy chhaota la aw ta,

⁵ cha cha theihthaipa ta Abeipa lâta mei ta hmohlâpa châta maisâh chô liata a rao aw. Cha cha thaileichâna hlâna a châ.

⁶ Theihthaipa chhôhkha liata chapaw zydua ta nie aw ei ta, su pathaihpa liata nie awpa a châ. Cha cha hmo pathaih ngaitapa a châ.

⁷ Thaileichâna hlâna cha moleina hlâna nata a lyu ta, taozie miakha a châ. A sazy cha chatlaina a taotuhpa theihthaipa tovyuh a châ aw.

⁸ Chyhsa châta raopa hlâna a hlâtuhpa theihthaipa ta, raopa hlâna ta a hlâpa sa vo cha a to aw.

⁹ Viahchhâ taona beih liata taopa niepa hlâna to nata ukâ nata lômathu liata chateipa nata pakâhpa niepa hlâna zydua cha, a hlâtuhpa theihthaipa châta a châ aw.

¹⁰ Niepa hlâna châta hlâpa zydua cha, sathaw pahlaopa tlyma, ahipa tlyma, Arawna sawchapaw zydua ta â khopa ta amâ rai aw.

¹¹ “He he chyhsa ta Abeipa lâta aryhna hlâna a hlânazie awpa ryhpa a châ:

¹² Alyna biereina châta a hlâ khiahta cha, thinô pahlao leipa ta sathaw pahlaopa viahchhâ pakâhpazy, sathaw hniapa thinô pahlao leipa viahchhâ apapazy nata viahdie dipa ta taopa sathaw ta nyhpa viahchhâ pakâhpazy cha, atheihna hlâna sa a hlâna liata a hlâ pâ awpa a châ.

¹³ Alyna biereina châta aryhna hlâna atheihnazy liata deikua cha, viahchhâ thinô pahlaopa a hlâ aw.

¹⁴ Hmohlâpa to tawhta viahchhâ tlâ kha sai hmosaipiepa châta Abeipa lâ hlâ aw ta, maisâh liata aryhna hlâna thisaih a thiatuhpa theihthaipa châta a châ aw.

¹⁵ Alyna biereina châta aryhna hlâna atheihna sa cha, a hlâ noh ta nie khai ha awpa a châ. A mylâ my taihta khâpa hmah a pahlôh awpa châ vei.

¹⁶ Â theihna hlâna cha bietai hlâna tlyma, lôhthai hlâna tlyma a châ khiahta deikua cha, atheihna a hlâ noh ta nie awpa châ ta, nie laipa cha a mylâ ta nie theipa a châ.

¹⁷ A noh thôhna noh taihta a ypa atheihna sa deikua cha, mei ta rao khai awpa a châ.

¹⁸ Aryhna hlâna châta atheihna sa kheihawhpa rai, a noh thôhna noh ta ama nie khiahta cha, atheihna cha a pyhpa châ aw vei. Hlâtuhpa chhao hmo a hlâpa hawhta pachâpa châ aw vei. Hmo pathaih leipa châ aw ta, a niepa maihta a hmo paraona maoh ama phaoh aw.

¹⁹ “Hmo pathaih leipa kheihawhpa rai a hriapa sa cha, nie awpa châ vei. Mei ta rao awpa a châ. Sa hropazy deikua cha, chyhsa pathaihpazy ta ama nie thei.

²⁰ Pathaih leina chôta Abeipa lâta hlâpa aryhna hlâna atheihna sa a niepa cha, a phopi tawhta chhawh pathlahpa a châ aw.

²¹ Hmo pathaih leipa kheihawhpa rai, chyhsa pathaih leipa tlyma, sa pathaih leipa tlyma, hmo pathaih leipa pasichhihpa tlyma, chyhsa ta hria sala, chatanachôta Abeipa lâta aryhna hlâna atheihna sa a nie khiahta cha, cha chyhsa cha a phopi tawhta chhawh pathlahpa a châ aw,” tah ta.

²² Abeipa ta Mawsi chho ta, a hnohta,

²³ “Izarei sawzy chho la, ama hnohta hetana heta reih teh: Viahchao thaw tlyma, mietaku thaw tlyma, mie thaw tlyma nama nie awpa châ vei.

²⁴ Sa thiruapa thaw nata sahrâhpa ta a taipa thaw cha, a hmâ nawpa hropazy liata hmâ theipa châ ta, a nie deikua nama nie cheita awpa châ vei.

²⁵ Ahy rai Abeipa lâta mei ta hmohlâpa sa thaw a niepa cha, a phopi tawhta chhawh pathlahpa a châ aw.

²⁶ Cha hleikhô ta, nama pahrâna lia maihta, kheihawhpa thisaih rai, pavaw thisaih tlyma, sa thisaih tlyma, nama nie cheita awpa châ vei.

²⁷ Ahy rai thisaih a niepa cha, a phopi tawhta chhawh pathlahpa a châ aw,” tah ta.

²⁸ Abeipa ta Mawsi chho ta, a hnohta,

²⁹ “Izarei sawzy chho la, ama hnohta hetana heta reih teh: Abeipa lâta aryhna hlâna a hlâpa maihta, a hlâ awpa tawhta thokha cha, atheihna châta Abeipa lâta a hlâ awpa a châ.

³⁰ Abeipa lâta mei ta hmohlâpa cha ano ku tlai ta cheih aw ta, a thaw chhao a palôh duata cheih aw ta, chatanachata a palôh cha chaluahpa hlâna ta Abeipa hmiakô liata a chaluah aw.

³¹ Theihthaipa ta a thaw cha mei ta maisâh liata rao aw ta, a palôh deikua cha, Arawna nata a sawchapawzy châta a châ aw.

³² Aryhna hlâna atheihna sa phei chachâh lâ cha, chalopa hlâna châta theihthaipa nama pie awpa a châ.

³³ Arawna sawchapawzy hry liata aryhna hlâna thisaih nata thaw a hlâtuhpa ta, a tovyuh châta a phei chachâh lâ cha â la aw.

³⁴ Izarei sawzy aryhna hlâna atheihna sazy tawhta a palôh chaluahpazy nata a phei chalopazy la na ta, theihthaipa Arawna nata a sawchapawzy hnohta ei pie. Cha cha Izarei sawzy tawhta chhâzaw ta ama tovyuh a châ aw,” tah ta.

³⁵ Cha cha Abeipa châta theihthaipa chakaona rai hria awpa ta, Arawna nata a sawchapawzy raopa ama châ noh tawhta, Abeipa lâta mei ta hmohlâpazy tawhta ama tovyuh châta panano eihpa a châ.

³⁶ Cha cha Izarei sawzy ta theihthaipazy ama pie tyh awpa ta Abeipa ta biepie ta, sathawthupa ama châ noh tawhta ama chhâ zydua liata chhâzaw ta ama tovyuh a châ aw.

³⁷ Chazy cha raopa hlâna, niepa hlâna, moleina hlâna, thaileichâna hlâna, chahnaona hlâna nata aryhna hlâna atheihna taoziezy a châ.

³⁸ Ama hmohlâpazy Abeipa lâta vaw cheih awpa ta, Abeipa ta Sinai râhchawhpa liata Izarei sawzy bie a pie noh ta, Sinai Tlâh liata Mawsi hnohta bie a piepa a châ.