THEIHTHAINA 6 - Mara Bible RV (BSI)

Sôh kyh liata ngâchhih leina thaileichâna hlâna

¹ Abeipa ta Mawsi chho ta, a hnohta,

² “Chyhsa ta Abeipa châta a ngâchhihna pahleipa ta, chyhsa sôh â vaopa kyh liata zy, chyhsa hnohta pie awpa bie â taihpa kyh liata zy, a parupa kyh liata zy, â doleipa ta a vaih chô liata taopa ta tlyma, a vaih tlybai raruahpa ta tlyma, hmo a parao khiahta cha;

³ cha leipa chhao ta, chyhsa hmo pahleipa a huah sala, haipa ta bie a taihpa ta â do leipa ta a reih khiahta tlyma, cha hmozy hry liata kheihawhpa tlyma taopa ta a molei khiahta cha,

⁴ hetana heta tao awpa a châ: Molei ha tlai sala, thailei a châ khiahta cha, parupa ta a lapa hmozy, tlybaipa ta a lapa hmozy, a ku liata sôh pavaosapazy, chyhsa hmo pahleipa â huapazy cha a thô khai awpa a châ.

⁵ Haipa ta bie â taihpa hmo zydua â kipa ta thô khai aw ta, thailei a châna noh liata, hneituhpa hnohta su pangawh su kha a baichha aw.

⁶ A moleina ty thô nawpa ta Abeipa lâ hmo a hlâ awpa châ ta, mietaku zaw hry tawhta mietaku tôhpa seina hnei leipa cha, a mâ dopa sôh chhaota, theihthaipa lâ a cheih awpa a châ.

⁷ Theihthaipa ta Abeipa hmiakô liata chatlaina taopa aw ta, chatanachata a hmotaopa vâta a thaileichâna cha a ngiahthaipa a châ aw,” tah ta.

Hlâna ryhpa hropazy

⁸ Abeipa ta Mawsi chho ta, a hnohta,

⁹ “Arawna nata a sawchapawzy hnohta hetana heta biepie teh: He he raopa hlâna taozie awpa ryhpa a châ: Raopa hlâna cha maisâh chô liata mei liata azozâkhihdei ta y aw ta, a mylâ taihta a y aw. Maisâh liata mei cha a ia ngâ thlâh awpa a châ.

¹⁰ Theihthaipa ta pala rih dipa ta taopa chysia a tobi aw ta, a sapa khu nawpa ta pala rih dipa ta taopa chaopasy a pasy aw ta, maisâh liata raopa hlâna meipaohzy cha la aw ta, maisâh kâ liata a soh aw.

¹¹ Chatawhcha a chysia cha pahluh aw ta, chysia hropa a tao aw ta, buchâhzy cha riehmo khôtho su sithaipa lâ a siekhei aw.

¹² Maisâh liata mei cha a ia ngâ thlâh awpa châ ta, a thi awpa châ vei. Theihthaipa ta a my chareih ta tho ti aw ta, a chô liata raopa hlâna soh aw ta, cha liata aryhna hlâna thawzy a rao tyh aw.

¹³ Maisâh liata mei a ia ngâ thlâh ha awpa a châ, a thi awpa châ vei.

¹⁴ “He he niepa hlâna taozie awpa ryhpa a châ: Arawna sawchapawzy ta maisâh hmia liata Abeipa hmiakô ta ama hlâ tyh aw.

¹⁵ Hlâtuhpa ta niepa hlâna liatapa viahdie dipa pazah kha nata sathaw nata niepa hlâna chô liata deiryh zydua la aw ta, cha cha atheithlâhna hmo châta maisâh liata a rao aw. Cha cha Abeipa châta ropahâh ngaitapa a châ.

¹⁶ A laibâhpazy cha Arawna nata a sawchapawzy ta nie aw ei ta, ahmaohna poh o tlyhmia su pathaihpa liata thinô pahlao leipa ta ama nie awpa a châ.

¹⁷ Viahchhâ cha thinô pahlaopa ta tao awpa châ vei. Cha cha kei lâta mei ta hmohlâpa tawhta ama tovyuh awpa ta ei piepa châ ta, moleina hlâna nata thaileichâna hlânazy hawhta hmo pathaih ngaitapa a châ.

¹⁸ Arawna pathla chapaw zydua ta nie aw ei ta, cha cha Abeipa lâta raopa hmohlâpa tawhta nama pathla zydua ta chhâzaw châta ama tovyuh a châ aw. Cha niepa hlânazy a hriapa maih cha ama pathaih aw,” tah ta.

¹⁹ Abeipa ta Mawsi chho ta, a hnohta,

²⁰ “He he Arawna nata a sawchapawzy ta sathawthupa ama châ noh ta Abeipa lâ ama hlâ awpa hmohlâpa a châ: Niepa hlâna viahdie dipa tawhta kachu su hrawh su kha, my ta â khophie, zâ ta â khophie ama hlâ tyh aw.

²¹ Viahdie cha sathaw nata pahlaopa ta, pakâhna lômathu liata pakâh awpa a châ. Pakâh khai tawhta a vaw ngiakhei aw chi ta, viahchhâ pakâhpa cha a tlawh ta pachhaihpa ta Abeipa châta ropahâhpa niepa hlâna ta na hlâ aw.

²² Arawna sawchapawzy hry tawhta ano a thla awpa sathawthupa theihthaipa ta niepa hlâna cha a hlâ aw. Cha cha Abeipa tovyuh châ zôzaw aw ta, a zydua ta rao khai awpa a châ.

²³ Theihthaipa ta niepa hlâna châta a hlâpa zydua cha rao khai awpa a châ. Nie cheita awpa châ vei,” tah ta.

²⁴ Abeipa ta Mawsi chho ta, a hnohta,

²⁵ “Arawna nata a sawchapawzy chho la, ama hnohta hetana heta reih teh: He he moleina hlâna taozie awpa ryhpa a châ: Raopa hlâna thie tyhna liata, moleina hlâna chhao Abeipa hmiakô ta thie awpa a châ. Cha cha hmo pathaih ngaitapa a châ.

²⁶ Moleina hlâna châta a hlâtuhpa theihthaipa ta nie aw ta, ahmaohna poh o dôhpachhôh tlyhmia su pathaihpa liata nie awpa a châ.

²⁷ Atheihna sa a hriapa maih cha ama pathaih aw. Kheihawhpa chysia lia rai ta thisaih ta â pie khiahta cha, thisaih ta a kiapa chysiazy cha su pathaihpa liata na pasu awpa a châ.

²⁸ Atheihna sa chhona alei beih cha pakei ha awpa châ ta, dawhbeih ta chhopa a châ khiahta deikua cha, a pathaih ngaitapa ta chata ta ti ta pasi awpa a châ.

²⁹ Theihthaipa chhôhkha laita chapaw zydua ta atheihna sa cha ama nie aw. Cha cha hmo pathaih ngaitapa a châ.

³⁰ Su Pathaihpa liata chatlaina tao nawpa ta, ahmaohna poh o liata a thisaih ama vaw cheipa sa, moleina hlâna châta atheihna sa deikua cha, nie awpa châ vei. Mei ta rao awpa a châ.