THEIHTHAINA 5 - Mara Bible RV (BSI)

Moleina hlâna tao byuhpazy

¹ “Khihtlâh tymâna kyh liata, mo ta hmôpa ta tlyma, nah ta theipa ta tlyma, chyhsa ta bie pahnotuhpa châ sala, a rei khoh leipa khiahta cha, hmo a paraopa châ ta, a hmoparaona maoh a phaoh aw.

² “Chyhsa ta hmo pathaih leipa, râhsa pathaih leipa athipa tlyma, osa pathaih leipa athipa tlyma, alyhpasa pathaih leipa athipa tlyma a hria khiahta cha, pahno leipa ta a hriapa a châpa chhao ta, pathaih leipa châ ha ta, thailei a châ aw.

³ “Chyhsa ta chyhsa pathaih leina a hria khiahta cha, pathaih leina a tlôkheipa hmo kheihawhpa rai châ sala, pahno leipa ta a hriapa a châpa chhaota, a pahno tita thailei a châ pyly aw.

⁴ “Chyhsa ta hmo chhiepa tao awpa tlyma, hmo phapa tao awpa tlyma, a hmao ta naosia kawpa ta bie â taih khiahta cha, kheihawhpa bietai rai châ sala, pahno leipa ta a taopa a châpa chhaota, a pahno tita thailei a châ pyly aw.

⁵ “Chazy hry liata miakha liata chhao thailei a châpa chyhsa cha, a moleina phuah aw ta,

⁶ a moleina chatlai nawpa ta mietaku zaw hry tawhta mietakutaw chanôpa tlyma, mie chanôpa tlyma, moleina hlâna châta Abeipa lâ hlâ aw ta, theihthaipa ta a moleina chatlaina a taopa aw.

⁷ “Mietakutaw a pachâ thei leipa khiahta cha, a moleina chatlai nawpa ta vachhuh pô no tlyma, pivawtaw pô no tlyma Abeipa lâ a hlâ awpa a châ. Pô kha moleina hlâna châta châ aw ta, ahropa cha raopa hlâna châta a châ aw.

⁸ Theihthaipa lâ cheih aw ta, theihthaipa ta moleina hlâna hlâ tua aw ta, a luh thaby liata a rao a chamieh aw. Chamieh pachhô awpa deikua châ vei.

⁹ Moleina hlâna thisaih cha maisâh kâ liata thia aw ta, thisaih laibâhpazy cha maisâh thaby liata palosa khai awpa a châ. Cha cha moleina hlâna a châ.

¹⁰ Ahropa cha raopa hlâna châta hlâ aw ta, raopa hlâna taozie hawhta hlâ awpa a châ. Theihthaipa ta a moleina chatlaina taopa aw ta, chatanachata a ngiahthaipa a châ aw.

¹¹ “Vachhuh pô no tlyma, pivawtaw pô no tlyma a pachâ thei leipa khiahta cha, a moleina chatlai nawpa ta, moleina hlâna châta viahdie di ngaitapa kachu su hrawh su kha a hlâ awpa a châ. Moleina hlâna a châpa vâta, sathaw a bao awpa châ leipa ta, a chô liata deiryh a soh awpa châ hra vei.

¹² Theihthaipa lâ cheih aw ta, theihthaipa ta atheithlâhna hmo châta pazah kha la aw ta, maisâh chô liata Abeipa lâta mei ta hmohlâpa chô liata a rao aw. Cha cha moleina hlâna cha a châ.

¹³ Cha hmozy hry liata kheihawhpa tlyma a parao hapa kyh liata, theihthaipa ta chatlaina taopa aw ta, chatanachata a ngiahthaipa a châ aw. A laibâhpazy cha, niepa hlâna taozie hawhta, theihthaipa châta a châ aw,” tah ta.

Thaileichâna hlâna

¹⁴ Abeipa ta Mawsi chho ta, a hnohta,

¹⁵ “Chyhsa ta hmo paraopa ta Abeipa hmo pathaihpazy chô liata a molei pathlei khiahta cha, a moleina ty thô nawpa ta, mietaku zaw hry tawhta mietaku tôhpa seina hnei leipa Abeipa lâ a hlâ awpa a châ. Supathaihpa tâkâ reizie ta reipa ta, mietaku tôhpa mâ dopa cha a tâkâ ta cheih pâ aw ta, thaileichâna hlâna châta a hlâ aw.

¹⁶ Hmo pathaihpa chô liata â doleipa ta a taopa cha thô aw ta, su pangawh su kha baichha aw ta, theihthaipa a pie aw. Theihthaipa ta thaileichâna hlâna mietaku tôhpa ta chatlaina taopa aw ta, chatanachata a ngiahthaipa a châ aw.

¹⁷ “Abeipa ta tao lei awpa ta bie a piepa kheihawhpa tlyma chyhsa ta tao sala a molei khiahta cha, pahno leipa ta a tao pathleipa a châpa chhao ta, thaileichâ pyly aw ta, a paraona maoh a phaoh aw.

¹⁸ Mietaku zaw hry tawhta mietaku tôhpa seina hnei leipa cha, a mâ dopa chhaota, thaileichâna hlâna châta theihthaipa lâ cheih aw ta, pahno leipa ta a tao pathleipa kyh liata theihthaipa ta chatlaina taopa aw ta, chatanachata a ngiahthaipa a châ aw.

¹⁹ Abeipa hmiakô liata thailei a châ ha tlaipa vâta, cha cha a thaileichâna hlâna a châ,” tah ta.