THEIHTHAINA 4 - Mara Bible RV (BSI)

Moleina hlâna

¹ Abeipa ta Mawsi chho ta, a hnohta,

² “Izarei sawzy hetana heta chho teh: Abeipa ta tao lei awpa ta bie a piepa kheihawhpa tlyma chyhsa ta taopa ta molei pathlei ha sala,

³ moleina a taotuhpa cha sathawthupa theihthaipa a châpa vâta, Izarei phopi chô liata thaileichâna a patlôsa awpa a châ khiahta cha, a moleina chatlai nawpa ta, viahchao tôh dawpa seina hnei leipa cha, moleina hlâna châta Abeipa lâ a hlâ awpa a châ.

⁴ Viahchao tôhpa cha ahmaohna poh o chhikao thaby liata Abeipa hmiakô ta a vaw chhi aw ta, viahchao tôhpa luh chô liata a ku pahnieh aw ta, Abeipa hmiakô liata viahchao tôhpa cha a thie aw.

⁵ Sathawthupa theihthaipa ta viahchao tôhpa thisaih cha la aw ta, ahmaohna poh o lâ â ngiakhei aw.

⁶ Theihthaipa ta thisaih liata a kudy ny aw ta, thisaih cha supathaihpa pohraipa hmia liata Abeipa hmiakô ta ei sari a thia aw.

⁷ Theihthaipa ta thisaih cha la heih aw ta, ahmaohna poh o chhôh liata ropahâhpa maisâh kizy liata Abeipa hmiakô ta hnia aw ta, viahchao tôhpa thisaih laibâhpa zydua cha, ahmaohna poh o chhikao liata raopa hlâna maisâh thaby liata a patlai khai aw.

⁸ Moleina hlâna viahchao tôhpa thaw zydua la aw ta, a rihhrizy, a chhôrih thawzy,

⁹ a lôpo miano nata a patoh kiapâh liata a lôpo a pahlypa thawzy nata a pathi a pahlypa thawzy cha a lôpozy chhaota la aw ta,

¹⁰ aryhna hlâna viahchao tôhpa thawzy lapa hawhta a la aw. Chazy cha theihthaipa ta raopa hlâna maisâh liata a rao aw.

¹¹ Viahchao tôhpa vo nata a sapa zydua cha, a luh nata a phei, a chhôrih nata a iezy chhaota,

¹² a pôhpa duata riehmo khôtho lâta buchâh thyna su sithaipa lâ siekhei aw ta, tho ta a rao aw. Viahchao tôhpa sa cha buchâh thyna liata rao awpa a châ.

¹³ “Izarei phopi pôhpalôhpa ta Abeipa ta tao lei awpa ta bie a piepa kheihawhpa tlyma taopa ta ama molei pathlei khiahta cha, zawpi tawhta nyupa a châpa chhao ta, thailei ama châ pyly aw.

¹⁴ Moleina hmo ama taopa cha pahnopa a châ khiahta cha, moleina hlâna châta zawpi ta viahchao tôh dawpa ama hlâ awpa châ ta, cha cha ahmaohna poh o tlyhmia liata amâ vaw chhi awpa a châ.

¹⁵ Zawpi chhituhpa machâzy ta viahchao tôhpa luh chô liata Abeipa hmiakô ta ama ku pahnieh aw ei ta, viahchao tôhpa cha Abeipa hmiakô liata ama thie aw.

¹⁶ Sathawthupa theihthaipa ta viahchao tôhpa thisaih cha la aw ta, ahmaohna poh o lâ â ngiakhei aw.

¹⁷ Theihthaipa ta thisaih liata a kudy ny aw ta, pohraipa hmia liata Abeipa hmiakô ta ei sari a thia aw.

¹⁸ Thisaih la heih aw ta, ahmaohna poh o chhôh liata ropahâhpa maisâh kizy liata Abeipa hmiakô ta hnia aw ta, viahchao tôhpa thisaih laibâhpa zydua cha ahmaohna poh o chhikao liata raopa hlâna maisâh thaby liata a patlai khai aw.

¹⁹ A thaw zydua la aw ta, maisâh liata a rao aw.

²⁰ Cha hawhna chata viahchao tôhpa cha hlâ aw ta, theihthaipa châta moleina hlâna viahchao tôhpa taozie hawhta a tao aw. Cha hawhna chata theihthaipa ta zawpi châta chatlaina tao aw ta, a ngiahthaipa ama châ aw.

²¹ Viahchao tôhpa cha riehmo khôtho lâ phaoh aw ta, viahchao tôhpa hmiatuapa a raopa hawhna khata a rao aw. Cha cha zawpi châta moleina hlâna a châ.

²² “Ryureituhpa ta Abeipa a Khazohpa ta tao lei awpa ta bie a piepa kheihawhpa tlyma taopa ta a molei pathlei khiahta cha, thailei a châ aw.

²³ Moleina hmo a taopa cha â vaw pahno nahta, hmohlâpa châta mie tôhpa seina hnei leipa a hlâ awpa a châ.

²⁴ Mie luh chô liata a ku pahnieh aw ta, raopa hlâna thie tyhna liata Abeipa hmiakô ta a thie aw. Cha cha moleina hlâna a châ.

²⁵ Theihthaipa ta moleina hlâna thisaih cha a kudy ta la aw ta, raopa hlâna maisâh kizy liata hnia aw ta, thisaih laibâhpazy cha raopa hlâna maisâh thaby liata a patlai khai aw.

²⁶ A thaw zydua cha, aryhna hlâna châta atheihna thaw hawhta maisâh liata rao aw ta, theihthaipa ta a moleina châta chatlaina taopa aw ta, chatanachata a ngiahthaipa a châ aw.

²⁷ “Vâtlâh hry liata chyhsa pakha ta Abeipa ta tao lei awpa ta bie a piepa kheihawhpa tlyma taopa ta a molei pathlei ha khiahta cha, thailei a châ aw.

²⁸ Moleina hmo a taopa cha â vaw pahno nahta, a moleina chatlai nawpa ta hmohlâpa châta mie chanôpa seina hnei leipa a hlâ awpa a châ.

²⁹ Moleina hlâna sa luh chô liata a ku pahnieh aw ta, moleina hlâna cha raopa hlâna su liata a thie aw.

³⁰ Theihthaipa ta a kudy ta a thisaih la aw ta, raopa hlâna maisâh kizy liata hnia aw ta, thisaih laibâhpazy cha raopa hlâna maisâh thaby liata a patlai khai aw.

³¹ A thaw zydua cha, aryhna hlâna châta atheihna thaw lapa hawhta la khai aw ta, theihthaipa ta Abeipa châta ropahâhpa châta maisâh liata a rao aw. Theihthaipa ta chatlaina taopa aw ta, chatanachata a ngiahthaipa a châ aw.

³² “Moleina hlâna châta mietakutaw hlâ awpa a vaw cheih khiahta cha, a chanôpa seina hnei leipa a vaw cheih awpa a châ.

³³ Moleina hlâna sa luh chô liata a ku pahnieh aw ta, raopa hlâna ama thiena su liata moleina hlâna châta a thie aw.

³⁴ Theihthaipa ta raopa hlâna thisaih cha a kudy ta la aw ta, raopa hlâna maisâh kizy liata hnia aw ta, thisaih laibâhpazy cha raopa hlâna maisâh thaby liata a patlai khai aw.

³⁵ A thaw zydua cha, aryhna hlâna châta atheihna mietakutaw thaw lapa hawhta la aw ta, theihthaipa ta maisâh liata Abeipa lâta mei ta hmohlâpa chô liata rao aw ta, moleina hmo a taopa ty thô nawpa ta, theihthaipa ta chatlaina taopa aw ta, chatanachata a ngiahthaipa a châ aw.