THEIHTHAINA 3 - Mara Bible RV (BSI)

Aryhna hlâna

¹ “Chyhsa hmohlâpa cha aryhna hlâna châta atheihna châ sala, viahchao hri tawhta a hlâ khiahta cha, a chapawpa tlyma, a chanôpa tlyma hlâ thei ta, Abeipa hmiakô liata seina hnei leipa a hlâ awpa a châ.

² A hmohlâpa luh chô liata a ku pahnieh aw ta, ahmaohna poh o chhikao thaby liata thie aw ta, Arawna sawchapaw theihthaipazy ta maisâh kâ zydua liata a thisaih ama thia aw.

³ Aryhna hlâna châta atheihna cha Abeipa lâta mei ta hlâ aw ta, a rihhri nata a chhôrih liata thaw zydua nata

⁴ a patoh kiapâh liata a lôpo miano nata a lôpo a pahlypa thawzy nata a pathi a pahlypa thawzy cha, a lôpozy chhaota la aw ta, a hlâ aw.

⁵ Chazy cha Arawna sawchapawzy ta maisâh liata raopa hlâna mei tho chô liata ama rao aw. Cha cha ropahâhpa châta Abeipa lâta raopa hlâna, mei ta hmohlâpa a châ.

⁶ Chyhsa ta aryhna hlâna atheihna châta Abeipa lâta a hlâpa cha, mietaku zaw tawhta a châ khiahta cha, a chapawpa tlyma, a chanôpa tlyma hlâ thei ta, seina hnei leipa a hlâ awpa a châ.

⁷ A hmohlâpa châta mietakutaw a cheih khiahta cha, Abeipa hmiakô liata hetana heta a hlâ aw:

⁸ A hmohlâpa luh chô liata a ku pahnieh aw ta, ahmaohna poh o tlyhmia liata thie aw ta, Arawna sawchapawzy ta maisâh kâ zydua liata a thisaih ama thia aw.

⁹ Cha hawhna chata aryhna hlâna atheihna châta mei ta hmohlâpa cha Abeipa lâ a hlâ aw. Abeipa lâta a thawzy a hlâ aw. A lahmei thawhpa a ky ru tlôna taihta lapazy, a rihhrizy, a chhôrih liata thawzy,

¹⁰ a lôpo miano nata a patoh kiapâh liata a lôpo a pahlypa thawzy nata a pathi a pahlypa thawzy cha a lôpozy chhaota la aw ta, a hlâ aw.

¹¹ Chazy cha theihthaipa ta maisâh liata a rao aw. Cha cha Abeipa lâta mei ta hmohlâpa niepa hlâna a châ.

¹² A hmohlâpa cha mie a châ khiahta cha, Abeipa hmiakô liata hetana heta a hlâ aw:

¹³ A luh chô liata a ku pahnieh aw ta, ahmaohna poh o tlyhmia liata thie aw ta, Arawna sawchapawzy ta maisâh kâ zydua liata a thisaih ama thia aw.

¹⁴ Chatawhcha a hmohlâpa cha mei ta Abeipa lâ a hlâ aw. A rihhrizy, a chhôrih thawzy,

¹⁵ a lôpo miano nata a patoh kiapâh liata a lôpo a pahlypa thawzy nata a pathi a pahlypa thawzy cha a lôpozy chhaota la aw ta, a hlâ aw.

¹⁶ Chazy cha theihthaipa ta maisâh liata a rao aw. Cha cha ropahâhpa châta mei ta hmohlâpa niepa hlâna a châ. A thaw zydua Abeipa eih a châ.

¹⁷ “Thaw tlyma, thisaih tlyma, nama nie awpa châ vei tahpa cha, nama pahrâna maih liata nama chhâ zydua châta chhâzaw bieraopa a châ aw,” tah ta.