THEIHTHAINA 27 - Mara Bible RV (BSI)

Abeipa châta pie awpa bietai nata su hrawh su kha ryhpa

¹ Abeipa ta Mawsi chho ta, a hnohta,

² “Izarei sawzy chho la, ama hnohta hetana heta reih teh: Chyhsa ta Abeipa lâta chyhsapa hlâ awpa ta bie a siapa ta a taih sala, chyhsapa vyuhpa ta â phuhpa ta sôh pie awpa a châ khiahta cha,

³ chapaw a châ khiahta cha, kô kihpa tawhta kô sycharupa taih cha, supathaihpa tâkâ reizie ta a mâ tâkâ sekel sypangawh a châ aw.

⁴ Chanô a châ khiahta cha, sekel sythôh a châ aw.

⁵ Kô pangawhpa tawhta kô kihpa taih a châ khiahta cha, chapaw mâ sekel tlaw kih, chanô mâ sekel tlaw hrawh a châ aw.

⁶ Thla khapa tawhta kô pangawhpa taih a châ khiahta cha, chapaw mâ tâkâ sekel tlaw pangawh, chanô mâ tâkâ sekel tlaw thôh a châ aw.

⁷ Kô sycharu tawhta chô lâ a châ khiahta cha, chapaw mâ sekel tlaw hrawh hlei pangawh, chanô mâ sekel tlaw hrawh a châ aw.

⁸ Dyhchhiepa châ sala a mâ na tupa zie a pie thei lei awpa a châ khiahta cha, theihthaipa lâ a chhi awpa châ ta, theihthaipa ta a mâ tu aw ta, bie a taihtuhpa tao theinazie hawhta theihthaipa ta a mâ a tu aw.

⁹ “Abeipa lâ hlâ awpa ta bie â taihpa cha, sahroh a châ khiahta cha, Abeipa lâta a hlâpa zydua cha a pathaih haw.

¹⁰ A panano awpa châ khao vei. A chhiepa vyuhpa ta a phapa ta tlyma, a phapa vyuhpa ta a chhiepa ta tlyma a ri awpa châ hra vei. Sahroh lilaw ta a ri khiahta cha, a pô no ta, a ripa chhao, a rina chhao pathaihpa ama vaw châ ha aw.

¹¹ Sahroh pathaih leipa Abeipa lâta hlâ lei awpa chi a châ khiahta cha, sahroh cha theihthaipa hmiakô liata a soh awpa a châ.

¹² Theihthaipa ta a phana nata a pha leinazie hawhta, â phuhpa ta a mâ tu aw ta, a mâ cha theihthaipa ta a tunazie hawhta a châ aw.

¹³ A chatlai heih awpa khiahta deikua cha, a mâ tupa zie su pangawh su kha a baichha awpa a châ.

¹⁴ “Chyhsa ta hmohlâ pathaihpa châta Abeipa lâta a o a hlâ khiahta cha, a phana nata a pha leinazie hawhta, theihthaipa ta a mâ tu aw ta, theihthaipa ta a mâ a tupa hawhta a châ aw.

¹⁵ A hlâtuhpa ta a o cha a chatlai khoh khiahta cha, a mâ tupa zie su pangawh su kha baichha aw ta, chatanachata ano eih a châ heih aw.

¹⁶ “Chyhsa ta a lyu thokha Abeipa châta a hlâ khiahta cha, chi a tla thei awpa zie lymâ hawhta, a mâ tu awpa a châ. Bâli sâh bai kha tu theina lyu cha tâkâ sekel sypangawh a châ aw.

¹⁷ A lyu cha zubili kô ta hlâpa a châ khiahta cha, a mâ tupa hawhta a châ aw.

¹⁸ Zubili khai tawhta a hlâ khiahta deikua cha, zubili tlô heih nawpa kô a ypa zie hawhta theihthaipa ta a mâ tu aw ta, a pie awpa zie pachyh viapa a châ aw.

¹⁹ A hlâtuhpa ta a chatlai khoh khiahta cha, a mâ tupa zie su pangawh su kha baichha aw ta, ano eih a châ heih aw.

²⁰ Lyu cha a chatlai khoh vei tlyma, mohropa hnohta a zuah hapa tlyma a châ khiahta cha, chatlai heih theipa châ khao aw vei.

²¹ Lyu cha Zubili kô liata papuapa a châ tita, hlâ hapa lyu hawhta Abeipa châta pathaihpa châ aw ta, theihthaipa eih a châ aw.

²² Chyhsa ta ano râh a châ leipa, a chaleipa lyu Abeipa lâta a hlâ khiahta cha,

²³ theihthaipa ta zubili kô taihta a mâ awpa zie tu aw ta, a tupa hawhta, cha noh lia tlai ta Abeipa lâta hmo pathaihpa châta a hlâ awpa a châ.

²⁴ Zubili kô liata, lyu cha a chaleina chyhsa, a râh hneituhpa hnohta a pakua aw.

²⁵ A mâ tupa zydua cha supathaihpa tâkâ reizie ta châ khai aw ta, sekel tlaw kha cha kerâ miakih a châ aw.

²⁶ “Sahroh a pataw tuapa deikua cha, Abeipa eih a châ chhielie hapa vâta, chyhsa ta a hlâ awpa châ vei. Viahchao tôhpa tlyma, mietaku tlyma, a pataw tuapa maih cha Abeipa eih a châ.

²⁷ Sahroh pathaih leipa a châ khiahta cha, a mâ tupa zie ta a chatlai awpa châ ta, a mâ su pangawh su kha a baichha awpa a cha. Chatlaipa a châ vei khiahta cha, a mâ tupa zie ta zuah awpa a châ.

²⁸ “Chyhsa ta a hmohneipa Abeipa lâta a hlâ hapa, chyhsapa tlyma, sahroh tlyma, râh tlyma cha zuah awpa châ leipa ta, chatlai awpa châ hra vei. Hlâ hapa hmo zydua cha, Abeipa châta pathaih ngaitapa a châ khai.

²⁹ Pahleipadia awpa ta hlâ hapa chyhsa cha chatlai awpa châ vei. Thie thlyu awpa a châ.

³⁰ “Râh tawhta a puapa su hrawh su kha zydua, alei tawhta sâh nata tho theilâpa zydua Abeipa eih châ khai ta, Abeipa châta pathaihpa a châ.

³¹ Chyhsa ta a su hrawh su kha hry liata a kheihawhpa rai a chatlai khiahta cha, a mâ su pangawh su kha a baichha awpa a châ.

³² Viahchao hri nata mietaku zaw hry liata su hrawh su kha, chôchahrei ry liata â ngiapa, a pô hrawhna lymâ cha Abeipa châta pathaihpa a châ aw.

³³ A pha nata pha lei a pasia awpa châ leipa ta, a ri awpa châ hra vei. A ri raruah khiahta cha, a pô no ta, a ripa chhao, a rina chhao, pathaihpa châ aw ei ta, chatlai theipa châ aw vei,” tah ta.

³⁴ Chazy cha Sinai Tlâh liata Izarei sawzy châta Abeipa ta Mawsi a piepa biepiepazy a châ.