THEIHTHAINA 26 - Mara Bible RV (BSI)

Reingiahna byhnâzy

¹ “Khazoh nothlahpa namâ tao awpa châ leipa ta, nothlahpa tao chhyhpa tlyma, lôbô tlyma, nama bô awpa châ hra leipa ta, a naoh awpa ta nama râh liata nothlahpa hawhta taopa alô nama bô awpa châ vei, kei he Abeipa nama Khazohpa châ tlôh na ta.

² Ei Pahânohzy chay aw ei chi ta, ei supathaihpa nama chiza awpa a châ. Kei he Abeipa ei châ.

³ “Ei bieraopazy zipa ta, ei biepiepazy zyhpa ta nama tao khiahta cha,

⁴ avâzy a daihti ta cha pasuasapa aw ei na ta, chhaohlei ta kôvei papua aw ta, lyu liata thozy ta thei ama pathei aw.

⁵ Nama sawhri liata sâh ta kre thei lyuna daihti taih a daih aw ta, kre thei nama lyupa ta chi cheina daihti taih a daih aw ta, nama viahchhâ lôhrâtlôpa ta nie aw ei chi ta, nama râh liata thlalôh ngaitapa ta nama pahrâ aw.

⁶ Râh cha thlalôhpa ta paysa aw na ta, a zia aw ei chi ta, ahy hmahta cha pachisa aw veih ei. Sahrâhpazy râh tawhta to khai aw na ta, zaozi ta nama râh chahryh aw vei.

⁷ Nama chariahzy a chadai aw ei chi ta, nama hmiakô liata zaozi ta ama pao aw.

⁸ Papangawh ta za kha a chadai aw ei chi ta, za kha ta thy kha a chadai aw ei chi ta, nama chariahpazy nama hmiakô liata zaozi ta ama pao aw.

⁹ Nâmo lâ a vaw heih aw na ta, chi hluhpi cha pathlasapa ta, cha papôh aw ei na ta, nama hnohta ei biehrai ei pa-i aw.

¹⁰ Bohpi nama pasopa sâh hlôpazy nie aw ei chi ta, sâh thiehpa so nawpa ta sâh hlôpazy nama patly aw.

¹¹ Nama hry liata ei byureih soh aw na ta, ei hro ta châ hao aw veih ei.

¹² Nama hry liata y aw na ta, nama Khazohpa châ aw na ta, ei phopi nama châ aw.

¹³ Kei he Abeipa nama Khazohpa, Izi mo sei nama châ khao lei awpa ta, Izi râh tawhta nâmo châ chhi papuatuhpa ei châ. Nama raopakyzy thlie pachhô na ta, â patlâpa ta ei cha pasiesa ei.

Reingiahleina hrienazy

¹⁴ “Ei bie nathlie leipa ta, he biepiepa zydua he tao leipa u la,

¹⁵ ei bieraopazy zyh khoh leipa ta, nama hro ta ei ryureinazy a hao u la, ei biepiepa zydua tao leipa ta, ei biehrai nama parao khiahta deikua cha,

¹⁶ kei chhao ta nama chô liata he hmozy he ei tao aw: Nama chô liata hmo chichhihpa patlôsa aw na ta, nama mo pazohsa ta, nama hrona a pahlei theipa chaohpa hri nata chasipazy ei chareisa aw. Hraoleipa ta chi cheih aw ei chi ta, nama chariahpazy nie awpa a châ aw.

¹⁷ Châ heihnao aw ei na ta, nama chariahpazy hmiakô liata nama nawh aw. Châ haotuhpazy ta nama chô liata ryureih aw ei ta, ahy hmahta châ chadai leipa ta namâ râpai aw.

¹⁸ Chatanachôta ei bie nama nathlie vei khiahta cha, nama moleinazy vâta ei sari ei cha hrie via aw ei.

¹⁹ Nama thatlôna namâ palaikheipa thlie pachhô aw na ta, nama chô lâta avâzy cha thua hawhta tao aw na ta, nama ry lâta alei dawh hawhta ei tao aw.

²⁰ Nama tha pahryuh thlâhthli aw ei chi ta, nama râh ta kôvei papua leipa aw ta, râh liata thozy ta thei pathei aw veih ei.

²¹ “Ei kho leinazie ta ypa ta, ei bie nama nathlie vei khiahta cha, nama moleinazy hawh lymâ ta potlana a lie sari ta nama chô liata ei patlôsa aw.

²² Sahrâhpazy nama hry liata vaw tuah aw na ta, cha chata nama sawzy cha lapa aw ei ta, nama sahrohzy ama cha siepa aw. Maluh chyhta ta cha tao aw ei na ta, nama lâpizy cha dâh karopa ta a y aw.

²³ “Chatanachôta ei chhoreina a pyh hlei leipa ta, ei kho leizie ta khâ nama y khiahta cha,

²⁴ kei chhao nâmo kho leizie ta y aw na ta, keima tlai ta nama moleinazy vâta a lie sari ta ei cha hrie aw ei.

²⁵ Nama chô liata zaozi chareisa aw na ta, cha chata biehrai phuh la aw ta, nama khihpizy liata pahmaoh pakhypa ta nama y aw. Nama hry liata hri chareisa aw na ta, chariahpa ku liata hlâpa nama châ aw.

²⁶ Nama viahchhâ lana lâpi ei chhie pachhô tita cha, chanô pahrawh ta viahchhâ taona beih miakha liata nama viahchhâ tao aw ei ta, nama viahchhâ cha khopathliahpa ta ama cha pie heih aw. Nie aw ei chi ta, nama rih bie hlei aw vei.

²⁷ “Chatanachôta ei bie nathlie hlei leipa ta, ei kho leizie ta khâ nama y khiahta cha,

²⁸ kei chhao hiehâhpa ta nama kho leizie ta y aw na ta, nama moleinazy vâta a lie sari ta ei cha hrie aw ei.

²⁹ Nama sawchapawzy sa nie aw ei chi ta, nama sawchanôzy sa nama nie aw.

³⁰ Nama su sâhpazy parao aw na ta, nama noh khazoh nothlahpazy papao aw na ta, nama khazoh nothlahpazy ri chô liata nâmo ri ei pacho aw. Ei hro ta a châ hao aw ei.

³¹ Nama khihpizy cha khirypa ta tao aw na ta, nama supathaihpazy roryhrapa ta ei tao aw. Nama ropahâhpazy pahnâ khao aw va na.

³² Râh cha keima tlai ta roryhrapa ta tao aw na ta, cha liata a pahrâpa nama chariahpazy taihta noâh ama tah aw.

³³ Phopizy hry liata cha hiepatla aw ei na ta, ei zaozi phiapa ta ei cha chadai aw ei. Chatanachata nama râh cha roryhrapa ta y aw ta, nama khihpizy cha khirypa ama vaw châ aw.

³⁴ “Râh roryhrapa ta a y chhôh zydua nata nâmo nama chariahpa râh liata nama y chhôh zydua cha, râh ta Pahânohzy a hmâh aw. Chatanachata râh cha a pahâ aw ta, a Pahânohzy liata â ly aw.

³⁵ Râh cha roryhrapa ta a y chhôh zydua â pahâ aw. Râh liata nama pahrâ chhôh ta nama Pahânohzy liata â pahâ leina vyuhpa ta â pahâ aw.

³⁶ Nama hry liata laibâhpazy cha, ama chariahpazy râh liata palôh thazeipa ta ei paysa aw ei. Chhohna raohpa tlapa pyu ta âmo cha a chadai aw ta, zaozi tawhta a râpa hawhta a râpai aw ei ta, ahy ta hmahta amâ chadai leipa chhao ta ama pao aw.

³⁷ Ahy ta hmahta amâ chadai leipa chhao ta, zaozi ta amâ chadaipa hawhta âmo nata âmo amâ chapia aw. Nama chariahpazy hmiakô liata a duah awpa ta thatlôna rai hnei aw veih ei chi.

³⁸ Phopizy hry liata leidia aw ei chi ta, nama chariahpazy râh ta a cha nie khai aw ei.

³⁹ Nama hry liata laibâhpazy chhao, ama paraona vâta nama chariahpazy râh liata ama leidia aw. Âmo paraona vâ dei châ vei, ama pathlatuhpazy paraona vâta ama pathlatuhpazy hawhta ama leidia aw.

⁴⁰ “Châhrasala ei chô liata ama paraona nata ama pathlatuhpazy paraonazy a phuahpa ta, ei kho leizie ta ama ypazy a phuah ei sala,

⁴¹ ama paraonazy vâta ama kho leizie ta hmo tao na ta, ama chariahpazy râh lâta ei chhipa ei kha pahnopa ta, ama pathipalôh chopawtaileipa a panawh ei sala, ama hmo paraona tawhta a taopathi amâ chhuah khiahta cha,

⁴² Zakaw nata Aisika nata Abarahâ zy hnohta ei biehraizy kha a thei aw na ta, râh cha ei thei thlâh ha aw.

⁴³ Châhrasala râh cha siesaipa ta y aw ta, âmo y leipa ta roryhrapa ta a y chhôh ta a Pahânohzy a hmâh aw. Ei ryhpazy zyh khoh leipa ei ta, ama hro ta ei bieraopazy â haopa vâta, ama paraona vâta hriena cha amâ tyh awpa a châ.

⁴⁴ Chatahrasala ama chariahpazy râh liata ama y no chhao ta, âmo pahleipadia awpa nata ama hnohta ei biehrai parao awpa ta, âmo cha thy leipa aw ei na ta, a hao hra aw veih ei na, kei he Abeipa ama Khazohpa châ tlôh na ta.

⁴⁵ Ama Khazohpa châ awpa ta, phopizy mohmô ta Izi râh tawhta ei chhi papuapa ama pathlatuhpazy hnohta ei biehrai kha, âmo vâna heta ei thei thlâh ha aw. Kei he Abeipa ei châ,” tah ta.

⁴⁶ Chazy cha Abeipa ta Mawsi hmâpa ta Ano nata Izarei sawzy likah ta Sinai tlâh liata a taopa bieraopazy, pachianazy nata ryhpazy a châ.