THEIHTHAINA 25 - Mara Bible RV (BSI)

Râh châta Pahânoh

¹ Abeipa ta Sinai Tlâh liata Mawsi hnohta,

² “Izarei sawzy chho la, ama hnohta hetana heta reih teh: Râh ei cha piepa ei nama tlô tita, râh ta Abeipa châta Pahânoh a chay hra awpa a châ.

³ Na lyu liata kô charu chhôh chi cheih aw chi ta, na kre sadô chhao kô charu chhôh a chiah chhawhpa ta panyusa aw chi ta, a theizy na hria aw.

⁴ A kô sarina kô deikua cha râh châta apahâna noh pathaihpa, Abeipa châta Pahânoh châ aw ta, na lyu liata chi na chei awpa châ leipa ta, na kre sadô chhao a chiah chhawhpa ta na panyusa awpa châ vei.

⁵ Na sâh sawhlipa na hria awpa châ leipa ta, na mohôh leipa kre thei chhao na lyu awpa châ vei. Cha cha râh châta apahâna pathaihpa kô a châ aw.

⁶ Râh â pahâ kô ta chicheipa a patheipazy cha nama nie chhyhpa châta a châ aw. Nâ nata na seichapaw nata na seichanôzy, châ hriahlaopazy, na hnohta a ypa chihropazy,

⁷ na viahchao hri nata na râh liata sahrohzy châta châ aw ta, lyu nata sadô liata a patheipa zydua cha, nie chhyhpa châta a châ aw.

Zubili kô

⁸ “Chatawhcha a pahâ kô kô sari reipati aw chi ta, kô sari cha su sari ta papôhsapa châ aw ta, chatanachata a pahâ kô kô sari cha kô sypalih nata kô chaki a châ aw.

⁹ Cha tawhta thla sarina, noh hrawhna noh ta chiahmie paro ngaitapa ta patôsa aw chi ta, nama râh zydua liata chiahmie tôpa ta chatlaina noh nama phuah aw.

¹⁰ Kô sypangawhna a ly aw ei chi ta, râh pôhpalôh liata a pahrâpa zydua hnohta khotalaina nama phuah aw. Cha cha nama châta zubili châ aw ta, chyhsa to nama râh chyu lâta kua aw ei chi ta, mo to nama chhôhkha chyu lâ namâ lie aw.

¹¹ Kô sypangawhna cha nama châta zubili châ aw ta, chi cheih leipa aw ei chi ta, a sawhlipa chhao la leipa aw ei chi ta, kre zôh mohôh leipa liata kre thei chhao nama lyu awpa châ vei.

¹² Zubili kô châ ta, nama châta a pathaih awpa a châ. Lyurâhpa liata a pyuhpazy deita nama nie awpa a châ.

¹³ “Cha zubili kô liata chyhsa to âmo râh chyu ama hnei heih aw.

¹⁴ “Na vaih hnohta râh na zua khiahta tlyma, na vaih râh na chalei khiahta tlyma, namâ dôvei awpa châ vei.

¹⁵ Zubili tawhta reipatipa ta, a kô ziepa lymâ hawhta na vaih hnohta râh mâ pie aw chi ta, chi chei nawpa kô zie reipatipa ta, na vaih ta na hnohta râh a zuah awpa a châ.

¹⁶ A kô hluhna zie lymâ ta a mâ papôh aw chi ta, a kô chyhna zie lymâ ta a mâ na pahnai aw. Chi chei nawpa kô ziepa a laichadaipa ta na hnohta a zua awpa a châ.

¹⁷ Namâ dôvei awpa châ vei. Kei he Abeipa nama Khazohpa châ tlôh na ta, na Khazohpa cha na chi awpa a châ.

¹⁸ “Chavâta ei bieraopazy zyhpa ta, ei ryhpazy a pyh u la, chazy cha nama tao awpa a châ. Chatanachata râh liata thlalôhpa ta nama pahrâ aw.

¹⁹ Râh ta a thei pathei aw ta, lôhrâtlôpa ta nie aw ei chi ta, thlalôhpa ta nama y aw.

²⁰ ‘A kô sarina kô liata khâpa eima nie aw? Chi cheih tlôh leipa pi ta, chavâta sâh eima hria awpa y aw vei’ nama tah thei.

²¹ A kô charuna kô liata ei byhnâ nama chô liata patlôsa aw na ta, kô thôh a daih awpa ta kô a veih aw.

²² A kô chariena kô ta chi cheih aw ei chi ta, sâh hlôpa nama pachôpazy nie aw ei chi ta, kô chakina taih, sâh thiehpa â daih heih hlâlei sâh hlôpa nama nie aw.

²³ “Râh cha nama zuah pathlah awpa châ vei. Râh cha kei eih châ ta, nâmo cha khichhaipa nata khitlyhpa, ei râh liata a pahrâ chypa dei nama châ.

²⁴ Râh nama chaleipa zydua cha, râh hneituhpa ta a chatlai pakhua awpa nama pasaih awpa a châ.

²⁵ “Na unawhpa a dyh vaw chhie sala, a râh thokha a zuah khiahta cha, a heinawh a hnia chaipa ta a unawhpa zuapa râh cha a chatlai awpa a châ.

²⁶ Chyhsa ahy tlyma cha, a râh a chatlaipa awpa hnei leipa sala, châhrasala vaw hneirôhpa ta, chatlaina khi sôh a hnei khiahta cha,

²⁷ a zuana kô tawhta a laichadaipa ta, râh ta kôvei a papua thei awpa zie reipatipa châ aw ta, râh a zuana mâ zie a tloh leipa khiahta cha, râh a chaleituhpa hnohta a mâ pakua aw ta, a râh cha a hnei heih aw.

²⁸ Chatlai pakhua heih awpa ta a hneina ta â daih vei khiahta deikua cha, râh a zua hapa cha chaleituhpa ku liata zubili kô taih y aw ta, zubili kô ta râh cha pua aw ta, a râh cha a hnei heih aw.

²⁹ “Thokhy a hneipa khihpi liata chyhsa ta a o a zuah khiahta cha, a zua tawhta kô kha chhôh ta a chatlai heih thei aw. Kô kha bohloh chhôh chatlai theina daihti a hnei aw.

³⁰ Kô kha chhôh ta a chatlai thei leipa khiahta cha, thokhy hneipa khihpi liata a o cha, chaleituhpa ta hnei pathlah aw ta, a pathlazy ta ama hnei lymâ aw. Zubili liata chhao pua khao aw vei.

³¹ Thokhy a hnei leipa khitawzy liata ozy deikua cha, râh liata lyu hawhta pachâpa châ aw ta, chatlai theipa a châ aw. Zubili liata chhao a pua thei aw.

³² Livai chizy deikua cha, Livai khihpizy liata o ama hneipazy khatino rai ta ama chatlai thei aw.

³³ Livai chi ta a o zuah sala, chatlai pakhua awpa a khoh khiahta cha, Livai khihpizy liata ozy cha Livai chizy ta Izarei sawzy hry liata olyu ama hnei chhôhpa a châpa vâta, Livai khihpi liata o zuapa cha Zubili liata a pua awpa a châ.

³⁴ Livai khihpizy chheipâh liata lyuzy deikua cha, chhâzaw châta ama ryuto râh a châpa vâta, zuah theipa châ aw vei.

³⁵ “Na unawhpa a dyh vaw chhie sala, a châ vaw chhai khiahta cha, na deichhy awpa a châ. Khichhaipa nata khitlyhpa na deichhypa hawhta, na hnohta na paysa aw.

³⁶ Apôhna tlyma, âthôhna tlyma, ano tawhta na la awpa châ vei. Na Khazohpa chi mah y, chatanachata na unawhpa cha na hnohta a y thei aw.

³⁷ Apôhna chhaota na sôh dyu na pacheisa awpa châ leipa ta, athôhna tluapa ta niedo na pie awpa châ vei.

³⁸ Kei he Abeipa nama Khazohpa, Kâna râh cha pie awpa nata nama Khazohpa châ awpa ta, Izi râh tawhta châ chhi papuatuhpa ei châ.

³⁹ “Na unawhpa a dyh vaw chhie sala, na hnohta sei ta â zuah khiahta cha, sei hawhta na tao awpa châ vei.

⁴⁰ Hriahlaopa hawhta nata khichhaipa hawhta na hnohta a y awpa a châ. Zubili kô taihta a cha chakao aw.

⁴¹ Cha khai tawhta, a sawzy chhaota nâ tawhta pua aw ta, a chiheih lâ kua aw ta, a pathlatuhpazy râh liata a pahrâ heih aw.

⁴² Âmo cha Izi râh tawhta ei chhi papuapa, nâ chakaotuhpazy châ ei ta, sei zuapa hawhta zuah awpa châ veih ei.

⁴³ Nôchhiepa ta a chô liata ryu na rei awpa châ vei. Na Khazohpa na chi awpa a châ.

⁴⁴ Seichapaw nata seichanôzy nama hnei khoh khiahta cha, nama chheipâh râhzy tawhta nama chalei awpa a châ.

⁴⁵ Nama hry liata a pahrâpa chihropazy nata nama râh liata a pihpa ama chiheihzy hry tawhta chhao chalei thei aw chi ta, âmo cha na hmohneipa ama châ aw.

⁴⁶ Âmo cha, châ vaw pazi awpa nama sawzy châta ama chhâzaw ryuto nata hmohneipa ta tao aw ei chi ta, ama phopi tawhta sei nama hnei lymâ aw. Nama unawhpa Izarei sawzy chô liata deikua, nôchhiepa ta ryu nama rei awpa châ vei.

⁴⁷ “Chihropa tlyma, khichhaipa nama hry liata a pahrâpa tlyma, vaw hneirôh sala, a kiapâh liata na unawhpa a dyh vaw chhie sala, na unawhpa chata chihropa hnohta tlyma, khichhaipa nama hry liata a pahrâpa hnohta tlyma, chihropa pathla chhôhkhapa hnohta tlyma, sei ta â zuah khiahta cha,

⁴⁸ zuapa a châ khai tawh chhao ta chatlai heih theipa a châ aw. A unawhzy hry liatapa ta a chatlai aw.

⁴⁹ A paw unawhpa tlyma, a paw unawhpa sawchapaw tlyma ta chatlai thei aw ta, a chiheihzy hry liata a heinawh a hniapa chhao ta a chatlai thei aw. Ano chhao ta, a vaw hneirôh khiahta cha, anosasyh ta â chatlai thei aw.

⁵⁰ Ano nata chaleituhpa ta, sei ta â zuana kô tawhta zubili taih reipati aw ei ta, chatlai nawpa mâ cha a kô ziepa hawhta châ aw ta, hriahlaopa ta cha daihti chhôh ta a hlao awpa zie hawhta a laichadaipa a châ aw.

⁵¹ Kô hluhpi a byuh chy khiahta cha, chaleituhpa ta â phuhpa ta chatlaina mâ a pakua aw.

⁵² Zubili kô tlô nawpa ta kô chyhta dei a y khiahta deikua cha, a laichadai aw ei ta, kô a y chypa zie hawhta chatlaina mâ cha a pakua awpa a châ.

⁵³ Kô kha lymâ châta pahriasapa hriatuhpa hawhta a hnohta a y awpa a châ. Na mohmô liata nôchhiepa ta a chô liata ryu a rei awpa châ vei.

⁵⁴ Cha hawhna chata chatlaipa a châ leipa chhao ta, zubili kô liata cha, a sawzy chhaota a pua awpa a châ.

⁵⁵ Izarei sawzy cha kei nâ chakaopazy châ ei ta, Izi râh tawhta ei chhi papuapa nâ chakaotuhpazy ama châ. Kei he Abeipa nama Khazohpa ei châ.