THEIHTHAINA 24 - Mara Bible RV (BSI)

Abeipa Meiôh

¹ Khazohpa ta Mawsi chho ta, a hnohta,

² “Meiôh cha khâ a khaih thei nawpa ta, ôli thaw saohpa pasohpa nâ lâta vaw cheih awpa ta Izarei sawzy hetana heta biepie teh:

³ Ahmaohna poh o liata Biehrai Byh pohraipa khôtho liata, meiôh cha zâlâ tawhta my taihta Abeipa hmiakô liata pakhaih tyh awpa ta, Arawna ta soh tyh mawh sy. Cha cha nama chhâ vaw y lymâ awpazy châta chhâzaw bieraopa a châ aw.

⁴ Meiôhzy cha ngôh suapa ta taopa meiôh sona chô liata Abeipa hmiakô ta khaih pazao awpa ta Arawna ta a soh tyh aw.

Byureih Viahchhâ

⁵ “Viahdie dipa la aw chi ta, cha chata viahchhâ tlâ hrawh hleino na tao aw. Viahchhâ tlâ kha châta viahdie kachu su hrawh su no lymâ hmâ awpa a châ.

⁶ Abeipa hmiakô liata tlâhkhai pathaihpa chô liata tlâh no ta paziah aw chi ta, tlâh kha liata viahchhâ tlâ charu lymâ ta na paziah aw.

⁷ Viahchhâ chô liana cha, a tlâh no liata deiryh pasoh ngaitapa soh aw chi ta, cha cha viahchhâ vyuhpa ta atheithlâhna hmo châta châ aw ta, Abeipa lâta mei ta hmohlâpa a châ aw.

⁸ Pahânoh maihta Arawna ta viahchhâ cha Abeipa hmiakô liata soh lymâ aw ta, cha cha Izarei sawzy tawhta ama chhâzaw biehrai châta ama piepa a châ aw.

⁹ Cha cha Arawna nata a sawchapawzy tovyuh châ aw ta, Abeipa lâta mei ta hmohlâpazy tawhta chhâzaw châta ama tovyuh pathaihpa a châpa vâta, su pathaihpa liata ama nie awpa a châ,” tah ta.

Khazohpa moh reipachhiepa hriena

¹⁰ Chyhsa pakha, a nô Izarei chyhsa, a paw Izi chyhsa cha, Izarei sawzy yna lâ vawh ta. Cha Izarei chanô sawchapawpa nata Izarei chyhsa pakha cha riehmo liata a tu ei ta.

¹¹ Izarei chanô sawchapawpa chata Moh reipachhiepa ta chhie sa ta. Mawsi lâ a chhi ei ta, a nô moh cha Selômi châ ta, ano cha Dânâ chi Dibri sawchanô a châ.

¹² Abeipa pakah tawhta bie a puapa hâpa ta patâhna liata khô chy ei ta.

¹³ Abeipa ta Mawsi hnohta,

¹⁴ “Chhiesatuhpa kha riehmo khôtho lâ a chhi u la, a biereipa a theipa zydua ta a luh liata ama ku pahnieh ei sala, zawpi zydua ta alô ta vawh mawh ei sy.

¹⁵ Izarei sawzy chho la, ama hnohta, ahy rai a Khazohpa chhie a sapa cha, a moleina maoh a phaoh aw.

¹⁶ Abeipa moh a reipachhiepa cha thie thlyu awpa châ ta, zawpi zydua ta alô ta ama vawh awpa a châ. Chihropa chhao, a râh chyhsa chhao, Moh a reipachhie khiahta cha thie awpa a châ.

¹⁷ “Thina taihta chyhsa chô liata ku a pathlapa cha thie thlyu awpa a châ.

¹⁸ Thina taihta sahroh chô liata ku a pathlapa cha thô aw ta, sahroh vyuhpa ta sahroh a thô aw.

¹⁹ Chyhsa ta a vaih hmah a paphao khiahta cha, a taopa hawhta a chô liata tao hra awpa a châ.

²⁰ Ru tliepa vyuhpa ta ru tliepa, mo vyuhpa ta mo, hâh vyuhpa ta hâh châ aw ta, chyhsa hmah a paphaopa hawhta, ano chhao hmah paphao awpa a châ.

²¹ Sahroh a thiepa cha thô aw ta, chyhsa a thiepa cha ano chhao thie awpa a châ.

²² Chihropazy châta nata a râh chyhsazy châta ryhpa â lyupa ta nama hnei awpa a châ. Kei he Abeipa nama Khazohpa ei châ,” tah ta.

²³ Cha hawhna chata Mawsi ta Izarei sawzy cha chho ta, chhiesatuhpa cha riehmo khôtho lâ a chhi ei ta, Mawsi hnohta Abeipa biepiepa hawhta Izarei sawzy ta tao ei ta, alô ta ama vawhsao haw.