THEIHTHAINA 23 - Mara Bible RV (BSI)

Abeipa Kyhchhizy

¹ Abeipa ta Mawsi hnohta,

² “Izarei sawzy chho la, ama hnohta hetana heta reih teh: Hezy he Abeipa châta kyhchhi raopa, pakhypi pathaihpa ta nama phuah awpa châ ta, chazy cha keima raopa kyhchhizy a châ.

Pahânoh

³ “Noh charu chhôh rai hria awpa châ ta, a noh sarina noh deikua cha apahâna zachhihpa Pahânoh, pakhypi pathaihpa noh a châ aw. Khâpa rai hmah nama hria awpa châ vei. Cha cha nama pahrâna maih liata Abeipa châta Pahânoh a châ.

Zawpakhô nata Viahchhâ thinô pahlao leipa kyhchhi

⁴ “Hezy he Abeipa châta kyhchhi raopa, pakhypi pathaihpa châ ta, hmâh awpa ta a daihti raopa liata nama phuah tyh awpa a châ:

⁵ Thla khana, noh hrawh hleipalihna noh zâlâ a zoh chy daihti cha Abeipa Zawpakhô kyhchhi a châ.

⁶ Cha thla pyly liata, noh hrawh hleipangawhna noh cha Abeipa châta viahchhâ thinô pahlao leipa kyhchhi châ ta, noh sari chhôh viahchhâ thinô pahlao leipa nama nie awpa a châ.

⁷ A noh khana noh ta pakhypi pathaihpa hmâh aw ei chi ta, rai rupa nama hria awpa châ vei.

⁸ Noh sari chhôh mei ta hmohlâpa Abeipa lâta nama hlâ awpa châ ta, a noh sarina noh cha pakhypi pathaihpa châ ta, rai rupa nama hria awpa châ vei,” tah ta.

Chi Thieh Kyhchhi

⁹ Chatawhcha Abeipa ta Mawsi hnohta,

¹⁰ “Izarei sawzy chho la, ama hnohta hetana heta reih teh: Râh ei cha piepa ei tlô aw ei chi ta, a kôvei sâh nama hria tita, nama sâh a daih tuapazy tawhta sapiah miakha theihthaipa lâ nama vaw cheih awpa a châ.

¹¹ A pyhpa nama châ thei nawpa ta, theihthaipa ta sapiah cha a chaluah aw. Pahânoh mylâ ta Abeipa hmiakô liata a chaluah awpa a châ.

¹² Sapiah nama chaluah noh ta, mietakutaw chapawpa kô khapa, seina hnei leipa cha, raopa hlâna ta Abeipa lâta nama hlâ aw.

¹³ Niepa hlâna viahdie dipa sathaw pahlaopa kachu su hrawh su no hlâ pâ awpa châ ta, cha cha ropahâhpa châta Abeipa lâta mei ta raopa hmohlâpa a châ aw. Dopa hlâna châta kresawhti chhiehraôh ôh palih hlâ pâ hra awpa a châ.

¹⁴ Nama Khazohpa lâta nama hlâna noh a tlô hlâlei cha, chi thiehpa viahchhâ tlyma, raopa tlyma, a suh tlyma, nama nie awpa châ vei. Cha cha nama chhâ zydua châta nama pahrâna zydua liata chhâzaw bieraopa a châ aw.

Hâta Kyhchhi

¹⁵ “Pahânoh mylâ ta chaluahpa hlâna sapiah nama vaw chei noh tawhta reih aw ei chi ta, Pahânoh ei sari a tloh awpa a châ.

¹⁶ Pahânoh ei sarina my taihta noh sypangawh reih aw ei chi ta, niepa hlâna sâh thiehpa cha Abeipa lâ nama hlâ aw.

¹⁷ Chaluahpa hlâna ta Abeipa lâ thei hmiatuapazy hlâ awpa ta, nama pahrâna suzy tawhta, viahchhâ tlâ no nata viahdie dipa thinô pahlaopa ta taopa kachu su hrawh su no nama cheih awpa a châ.

¹⁸ Viahchhâ hlâ nota, mietakutaw kô khapa seina hnei leipa pô sari, viahchao tôh dawpa pô kha nata mietaku tôhpa pô no nama hlâ awpa a châ. Chazy cha Abeipa lâta raopa hlâna châ aw ta, ama niepa hlâna nata ama dopa hlânazy chhaota Abeipa lâta raopa hlâna ropahâh ngaitapa a châ aw.

¹⁹ Moleina hlâna châta mie tôhpa pô kha nata aryhna hlâna atheihna châta mietakutaw chapawpa kô khapa pô no nama hlâ aw.

²⁰ Theihthaipa ta thei hmiatuapa viahchhâ cha, mietakutaw pô no chhaota, chaluahpa hlâna ta Abeipa hmiakô liata a chaluah aw. Chazy cha Abeipa châta pathaihpa châ ta, theihthaipa tovyuh a châ aw.

²¹ Cha noh lia tlai ta nama châta pakhypi pathaihpa phuah aw ei chi ta, rai rupa khâpa hmah nama hria awpa châ vei. Cha cha nama chhâ zydua châta nama pahrâna zydua liata chhâzaw bieraopa a châ aw.

²² “Nama lyu liata sâh nama hria tita, nama lyu chaki chakô taihta nama hria khai awpa châ leipa ta, kâmo chhao nama thoh awpa châ vei. Dyhchhiepa nata chihropazy châta nama pahlôh awpa a châ. Kei he Abeipa nama Khazohpa ei châ,” tah ta.

Chiahmie Kyhchhi

²³ Abeipa ta Mawsi hnohta,

²⁴ “Izarei sawzy chho la, ama hnohta hetana heta reih teh: Thla sarina, cha thla noh khana noh cha nama châta apahâna zachhihpa noh châ ta, chiahmie tôpa ta atheithlâhna noh ta phuah aw ei chi ta, pakhypi pathaihpa hmâna noh a châ aw.

²⁵ Rai rupa nama hria awpa châ leipa ta, Abeipa lâta mei ta hmohlâpa nama hlâ awpa a châ,” tah ta.

Chatlaina Noh

²⁶ Abeipa ta Mawsi chho ta, a hnohta,

²⁷ “Thla sarina noh hrawhna noh cha Chatlaina Noh châ ta, nama châta pakhypi pathaihpa châ aw ta, a paky aw ei chi ta, Abeipa lâta mei ta hmohlâpa nama hlâ awpa a châ.

²⁸ Cha noh cha, chatlaina noh châ ta, Abeipa nama Khazohpa hmiakô liata nama châta chatlaina taona noh a châpa vâta, khâpa rai hmah nama hria awpa châ vei.

²⁹ Cha noh liata a paky leipa cha, a phopi tawhta chhawh pathlahpa a châ aw.

³⁰ Ahy rai châ sala, cha noh liata rai kheihawhpa rai a hriapa cha, a phopi tawhta ei pahleipadia aw.

³¹ Khâpa rai hmahta nama hria awpa châ vei. Cha cha nama chhâ zydua châta nama pahrâna zydua liata chhâzaw bieraopa a châ aw.

³² Cha noh cha nama châta a pahâ nawpa Pahânoh zachhihpa châ aw ta, namâ pakyna noh a châ aw. Cha thla, noh chakina noh zâlâ tawhta zâlâ heihpa taih cha Pahânoh ta nama chay awpa a châ,” tah ta.

Byureih Kyhchhi

³³ Abeipa ta Mawsi chho ta, a hnohta,

³⁴ “Izarei sawzy chho la, ama hnohta hetana heta reih teh: He thla sarina, noh hrawh hleipangawhna noh he, Abeipa lâta noh sari chhôh Byureih Kyhchhi hmâna nohzy a châ.

³⁵ A noh khana cha pakhypi pathaihpa châ aw ta, rai rupa nama hria awpa châ vei.

³⁶ Noh sari chhôh Abeipa lâta mei ta hmohlâpa hlâ aw ei chi ta, a noh chariena noh cha nama châta pakhypi pathaihpa châ aw ta, Abeipa lâta mei ta hmohlâpa nama hlâ awpa a châ. Cha cha pakhypi pathaihpa châ ta, rai rupa nama hria awpa châ vei.

³⁷ “Hezy he Abeipa châta kyhchhi raopazy châ ta, pakhypi pathaihpa daihti liata nama phuah awpazy a châ: Raopa hlânazy, niepa hlânazy, atheihnazy nata dopa hlânazy cha a noh raopa chyu liata hlâ awpa châ ta, Abeipa lâta mei ta raopa hmohlâpazy nama hlâ nawpa kyhchhi daihtizy a châ.

³⁸ Chazy cha Abeipa Pahânohzy liata pie awpa nama hmosaipiepazy, nama bietai zydua nata nama lôhthai hmopiepa zydua khô lâta Abeipa lâta nama pie awpazy a châ.

³⁹ “A thla sarina, noh hrawh hleipangawhna noh, nama lyu liata kôveizy nama hria khai tawhta, Abeipa kyhchhi noh sari chhôh hmâh aw ei chi ta, a noh khana noh cha apahâna noh zachhihpa châ aw ta, a noh chariena noh chhao apahâna noh zachhihpa a châ aw.

⁴⁰ A noh khana noh ta tho phapa theizy, thiahrâ kuahzy, thochiah buh phapa nata chavah liata râbuhzy a chaba aw ei chi ta, Abeipa nama Khazohpa hmiakô liata noh sari chhôh thaphapa ta nama y aw.

⁴¹ Cha cha Abeipa lâta kyhchhi châta kô chareih noh sari chhôh nama chay tyh awpa châ ta, nama chhâ zydua châta chhâzaw bieraopa a châ aw. Thla sarina liata nama chay tyh awpa a châ.

⁴² Byureih liata noh sari chhôh y aw ei chi ta, a râh chyhsa Izarei saw zydua cha byureihzy liata pahrâ khai awpa a châ.

⁴³ Chatanachata nama chhâ vaw y lymâ awpazy ta, Izarei sawzy Izi râh tawhta ei chhi papua nota byureih liata ei paysapa ei ama pahno thei aw. Kei he Abeipa nama Khazohpa ei châ,” tah ta.

⁴⁴ Cha hawhna chata Mawsi ta Abeipa kyhchhi daihti raopazy cha Izarei sawzy hnohta phuah ta.