THEIHTHAINA 22 - Mara Bible RV (BSI)

Hmohlâpa pathaihpazy

¹ Abeipa ta Mawsi hnohta,

² “Arawna nata a sawchapawzy chho la, ei moh pathaihpa ama papuapalei lei nawpa ta, Izarei sawzy ta hmo pathaihpa kei lâta ama hlâpa tawhta a panano awpa ta âmo cha chho teh. Kei he Abeipa ei châ.

³ Ama hnohta hetana heta reih teh: Nama chhâ zydua liata, nama pathla ahy rai ta pathaih leina hneina chôta, Izarei sawzy ta Abeipa lâta ama hlâpa, hmohlâpa pathaihpa â hnia khiahta cha, cha theihthaipa cha ei hmiakô tawhta chhawh pathlahpa a châ aw. Kei he Abeipa ei châ.

⁴ Arawna pathla ahy rai phawhpa tlyma, hniah lohpa tlyma a châ khiahta cha, a pathaih hlâlei hmo pathaihpazy a nie awpa châ vei. Athihpa a hriapa, a baoti a puapa,

⁵ alyhpasa pathaih leipa a hriapa nata pathaih leina paka theipa a hneipa chyhsa hriapa zy vâta â papuapaleipa theihthaipa cha,

⁶ zâlâ taih pathaih leipa a châ aw. Ti liata a ngai â si ha tua leipa ta cha, hmo pathaihpazy a nie awpa châ vei.

⁷ Noh a tla nahta pathaih aw ta, cha khai tawhta hmo pathaihpazy a nie thei aw, chazy cha ano nie awpa a châpa vâta.

⁸ Theihthaipa cha, ano kho ta a thipa sa tlyma, sahrâhpa ta a taipa tlyma niepa ta â papuapalei awpa châ vei. Kei he Abeipa ei châ.

⁹ Chavâta ei biepiepazy amâ pyh awpa a châ. Chataleipatala ei hmo pathaihpa ama papuapaleipa vâta ama moleina maoh phaoh aw ei ta, ama thi pathlei aw. Kei he Abeipa âmo pathaisatuhpa ei châ.

¹⁰ “Chyhsa zawrâpa ta hmo pathaihpa a nie awpa châ leipa ta, theihthaipa khichhai chihropa nata theihthaipa rai hriatuhpazy chhao, hmo pathaihpa ama nie awpa châ vei.

¹¹ Theihthaipa ta ano sôh ta a chaleipa sei deikua cha, hmo pathaihpa a nie thei aw. Theihthaipa o liata a pihpa chhao, theihthaipa pati a nie thei aw.

¹² Theihthaipa sawchanô ta chyhsa zawrâpa a hnei khiahta cha, hmohlâpa pathaihpazy a nie awpa châ vei.

¹³ Theihthaipa sawchanô a nôhmeipa tlyma, a vahpa ta a mapa tlyma, saw hnei leipa ta a paw o lâ a kua khiahta deikua cha, a laihsa no hawhta a paw pati a nie heih thei aw. Chyhsa zawrâpa deikua theihthaipa pati pathaihpa a nie awpa châ vei.

¹⁴ Chyhsa ta pahno leipa ta hmo pathaihpa a nie pathlei ha khiahta cha, a mâ su pangawh su kha baichha aw ta, hmo pathaihpa cha theihthaipa hnohta a pie aw.

¹⁵ Theihthaipazy ta Izarei sawzy Abeipa lâta hmohlâpa pathaihpazy ama papuapalei awpa châ vei.

¹⁶ Chataleipatala hmo pathaihpazy niepa ta ama thaileichâna maoh ama phaoh pathlei aw. Kei he Abeipa âmo pathaisatuhpa ei châ,” tah ta.

¹⁷ Abeipa ta Mawsi hnohta,

¹⁸ “Arawna nata a sawchapawzy nata Izarei saw zydua chho la, ama hnohta hetana heta reih teh: Izarei pathla tlyma, Izarei râh liata a ypa chihropa tlyma, a hmohlâpa a vaw chei tita, ama bietai hmohlâpa rai châ sala, lôhthai hmohlâpa rai châ sala, raopa hlâna châta Abeipa lâta ama vaw cheipa maih cha,

¹⁹ nama hlâpa a pyhpa a châ thei nawpa ta, viahchao tlyma, mietaku tlyma, mie tlyma, a chapawpa seina hnei leipa nama hlâ awpa a châ.

²⁰ Seina a hneipa rai nama hlâ awpa châ vei. Cha hawhpa cha nama châta a pyh tlâh châ aw vei.

²¹ Ahy rai a bietai patlô nawpa ta Abeipa lâta aryhna hlâna châta tlyma, lôhthai hmohlâpa châta tlyma, atheihna a hlâ tita, a py tlâh a châ thei nawpa ta, viahchao hri tawhta tlyma, mietaku zaw tawhta tlyma, seina hnei leipa a hlâ awpa a châ. Sahroh cha seina rai a hnei awpa châ vei.

²² Sahroh mochaopazy, ru tliepazy, asypazy, hmahphaohpazy, hmahchaku a hneipazy nata thachhâpazy Abeipa lâta nama hlâ awpa châ vei. Maisâh liata niepa hlâna châta Abeipa lâ nama pie awpa châ hra vei.

²³ Lôhthai hmohlâpa châta viahchao tôhpa tlyma, mietakutaw tlyma, kuphei seih tupa tlyma, chyu tupa tlyma hlâ thei aw ei chi ta, bietai patlô nawpa ta hmohlâpa châta deikua, cha hawpa cha a pyhpa châ aw vei.

²⁴ Sahroh a tihmô thi dôpa tlyma, chhuhchheihpa tlyma, pakeipa tlyma, hri lyupa tlyma, Abeipa lâta nama hlâ awpa châ vei. Cha hawhpa hmo cha nama râh liata nama tao awpa châ vei.

²⁵ Cha hawhpa sahrohzy cha chihropa tawhta lapa ta, nama Khazohpa nie awpa ta nama hlâ awpa châ vei. Raona âmo liata y ta, seina ama hneipa vâta, nama châta a pyhpa châ aw vei,” tah ta.

²⁶ Abeipa ta Mawsi chho ta, a hnohta,

²⁷ “Viahchao tôhpa tlyma, mietaku tlyma, mie tlyma a pataw nahta, a panô hnohta noh sari y aw ta, a noh chariena noh tawhta, Abeipa lâta mei ta hmohlâpa châta a pyh theipa a châ aw.

²⁸ Viahchao panô tlyma, mietaku panô tlyma, a taw chhaota noh kha ta nama thie awpa châ vei.

²⁹ Abeipa lâta alyna biereina atheihna nama hlâ tita, a pyh tlâh châ awpa ta atheihna cha nama hlâ awpa a châ.

³⁰ Namâ theihna noh ta nie khai ha awpa châ ta, a mylâ my taihta khâpa hmah nama so awpa châ vei. Kei he Abeipa ei châ.

³¹ “Ei biepiepazy he zyhpa ta nama tao awpa a châ. Kei he Abeipa ei châ.

³² Izarei sawzy hry liata pathaisapa ta ei y thei nawpa ta, ei moh pathaihpa nama papuapalei awpa châ vei. Kei he Abeipa nâmo châ pathaisatuhpa châ na ta,

³³ nama Khazohpa châ awpa ta Izi râh tawhta châ chhi papuatuhpa ei châ. Kei he Abeipa ei châ,” tah ta.