THEIHTHAINA 21 - Mara Bible RV (BSI)

Theihthaipazy pathaisana

¹ Abeipa ta Mawsi hnohta, “Arawna sawchapaw theihthaipazy chho la, ama hnohta hetana heta reih teh: Theihthaipa cha, a chiheihzy hry liata athihpa vâta â papuapalei awpa châ vei.

² A chhôhkha sipa, a nô tlyma, a paw tlyma, a sawchapaw tlyma, a sawchanô tlyma, a unawhpa tlyma,

³ a sietanô laihsa kôpa tlyma tah leipa ta cha, athihpa vâta â papuapalei awpa châ vei. Dyhchâ leipa a sietanô laihsa kôpa vâta deikua cha â papuapalei thei aw.

⁴ Theihthaipa cha a chiheihzy hry liata pawhrâh chaipa a châpa vâta, pathaih leipa ta a taopa ta, â papuapalei awpa châ vei.

⁵ Theihthaipazy cha luh pôlôpa ta ama sâ amâ ngyu awpa châ leipa ta, ama kâhhmi kâ lâ ama tai awpa châ hra leipa ta, ama pôhpa ama â awpa châ vei.

⁶ Ama Khazohpa châta ama pathaih awpa châ ta, ama Khazohpa moh ama papuapalei awpa châ vei. Khazohpa tovyuh a niepa châ ei ta, Abeipa lâta hmohlâpazy mei ta a hlâ tyhpa ama châpa vâta, ama pathaih awpa a châ.

⁷ Theihthaipa cha a Khazohpa châta chyhsa pathaihpa a châpa vâta, âzuahnô tlyma, chanô papuapalei hapa tlyma ama hnei awpa châ vei. A vahpa nata a chhaihpa chanô chhao ama hnei awpa châ vei.

⁸ Na Khazohpa viahchhâ a hlâpa a châpa vâta, na châta chyhsa pathaihpa ta na rao awpa a châ. Kei, Abeipa nâmo cha pathaisatuhpa he pathaih tlôh na ta, chavâta theihthaipa cha chyhsa pathaihpa ta na pachâ awpa a châ.

⁹ Theihthaipa sawchanô ta a zuah sala, â papuapalei khiahta cha, a paw a papuapaleipa châ ta, mei ta raosao awpa a châ.

¹⁰ “Theihthai beichaipa châ awpa ta a unawhzy hry tawhta panano hapa nata, a luh liata sathaw pathaihpa bao hapa nata theihthaipa chysia a tobi awpa ta panano hapa cha, a sâ a pathliah awpa châ leipa ta, a chysiazy a hrie awpa châ vei.

¹¹ Athihpa ri yna liata â ngia awpa châ leipa ta, a nô tlyma, a paw tlyma vâta chhao â papuapalei awpa châ vei.

¹² A Khazohpa ta a pananona sathawthuna a chô liata y tlôh ta, chavâta supathaihpa tawhta a pua awpa châ vei. Chataleipatala a Khazohpa supathaihpa a papuapalei pathlei aw. Kei he Abeipa ei châ.

¹³ “Theihthaipa cha lapinô châta laihsa kôpa a hnei awpa a châ.

¹⁴ Nôhmei tlyma, a vahpa nata a chhaihpa tlyma, chanô papuapalei hapa tlyma, âzuahnô tlyma a hnei awpa châ vei. Ano chiheih laihsa kôpa lapinô ta a hnei awpa a châ.

¹⁵ Chatanachata a pathlazy cha a chiheihzy hry liata papuapalei leipa ta a y aw. Kei he Abeipa ano pathaisatuhpa cha ei châ,” tah ta.

¹⁶ Abeipa ta Mawsi hnohta,

¹⁷ “Arawna chho la, a hnohta hetana heta reih teh: ‘Chhâ vaw y lymâ awpa liata, na pathlazy hry liata a khaihly leipa cha, a Khazohpa viahchhâ hlâ awpa ta â hnia awpa châ vei.

¹⁸ A khaihly leipa maih, mochaopa, pheisypa, hmia pizie doleipa, ku phei seih tupa,

¹⁹ phei tliepa, ku tliepa,

²⁰ zôh kopa, heih a kho leipa mataw tupa, mo liata adoleina a hneipa, hmahchaku a hneipa, thachhâpa nata tihmô keipazy cha, ama Khazohpa viahchhâ hlâ awpa ta amâ hnia awpa châ vei.

²¹ Theihthaipa Arawna pathla a khaihly leipa cha Abeipa lâta mei ta hmohlâpa hlâ awpa ta â hnia awpa châ vei. A khaihly leipa a châpa vâta, a Khazohpa viahchhâ hlâ awpa ta â hnia awpa châ vei.

²² A Khazohpa viahchhâ pathaih chaipa nata hmo pathaihpazy cha a nie thei khai aw.

²³ A khaihly leipa a châpa vâta, pohraipa deikua siepahlie thei leipa aw ta, ei supathaihpazy a papuapalei lei nawpa ta, maisâh kiapâh lâ vawh thei aw vei. Kei he Abeipa âmo pathaisatuhpa ei châ,’” tah ta.

²⁴ Cha hawhna chata Mawsi ta Arawna nata a sawchapawzy nata Izarei saw zydua hnohta reih ta.