THEIHTHAINA 20 - Mara Bible RV (BSI)

Atheihna ta saw hlâpa hriena

¹ Abeipa ta Mawsi hnohta,

² “Izarei sawzy hetana heta chho heih teh: Izarei saw tlyma, Izarei râh liata a pahrâpa chihropa tlyma, a saw Môleka lâta a piepa cha thie thlyu awpa châ ta, râh chyhsa zawpi ta alô ta vawhsao awpa a châ.

³ Kei tlai chhao ta, cha chyhsa cha a heihnao aw na ta, a saw Môleka lâ piepa ta, ei supathaihpa cha pathaih leipa ta tao ta, ei moh pathaihpa a papuapaleipa vâta, a phopi tawhta ei chhawh pathlah aw.

⁴ A saw Môleka lâta a hlâpa cha, râhsaw zawpi ta pahno lei a pachâ ei sala, ama thie vei khiahta cha,

⁵ cha chyhsa nata a phoheihzy cha keima tlai ta a heihnao aw ei na ta, ano chhao, Môleka lâ â zuana kyh liata ano a pazituhpa zydua chhao, ama phopi tawhta ei chhawh pathlah aw ei.

⁶ “Apeihpazy nata ahripa lâta pachaona a taopazy pangaipa ta, âmo pazipa ta a sihryhpa cha, cha chyhsa cha a heihnao aw na ta, a phopi tawhta ei chhawh pathlah aw.

⁷ Chavâta a pathai u la, pathaihpa ta y teh u. Kei he Abeipa nama Khazohpa châ tlôh na ta.

⁸ Ei bieraopazy a pyh u la, zyh teh u. Kei he Abeipa, nâmo châ pathaisatuhpa ei châ.

⁹ A nô tlyma, a paw tlyma, chhie a sapa cha thie thlyu awpa a châ. A nô tlyma, a paw tlyma chhie a sapa vâta, a thisaih maoh a phaoh aw.

¹⁰ “Ahy rai chyhsa lapinô liata tlyma, a vaih lapinô liata tlyma â phei khiahta cha, apheipaw nata apheinô cha ama pano ta thie thlyu awpa a châ.

¹¹ A paw lapinô a ziakheipa cha, a paw dua a thliapa châ ta, ama pano ta thie thlyu awpa a châ. Ama thisaih maoh ama phaoh aw.

¹² Chyhsa ta a myuhnô â ziakhei khiahta cha, ama pano ta thie thlyu awpa a châ. Molei chotlua a chohpa châ ei ta, ama thisaih maoh ama phaoh aw.

¹³ Chyhsa ta chanô a ziakheipa hawhta chapaw â ziakhei khiahta cha, ama pano ta hmo pasichhih ngaitapa a taopa châ ei ta, thie thlyu awpa ama châ. Ama thisaih maoh ama phaoh aw.

¹⁴ Chyhsa ta chanô nata a nô lapinô ta a hnei pakaoh khiah ei ta cha, molei ngaitapa châ ta, nama hry liata moleina a y lei nawpa ta, cha chyhsa nata chanôzy cha mei ta raosao awpa a châ.

¹⁵ Chyhsa ta sahroh a ykhei khiahta cha, cha chyhsa cha thie thlyu awpa châ ta, sahroh chhao cha nama thie awpa a châ.

¹⁶ Chanô ta sahroh â paykheisa khiahta cha, chanô nata sahroh cha na thie awpa a châ. Thie thlyu awpa ama châ, ama thisaih maoh ama phaoh aw.

¹⁷ “Chyhsa ta a sietanô, a paw sawchanô tlyma, a nô sawchanônô tlyma hneipa ta, a sietanô thluahruana hmôpa ta, a sietanô chhao ta a rilâhpa thluahruana a hmô khiahta cha, nozachhih ngaitapa châ ta, ama phopi chyhsazy mohmô liata pahleipadia awpa ama châ. A sietanô thluahruana a palâpa châ ta, a paraona maoh a phaoh aw.

¹⁸ Chyhsa ta chanô hnopasu daihti liata a ziakheipa ta a thluahruana a palâ khiahta cha, a chanô thihnawh thluahruana a palâpa châ ta, chanô chhao ta a thihnawh a palâpa châ ta, ama pano ta ama phopi tawhta chhawh pathlahpa ama châ aw.

¹⁹ Na nô narônô hno tlyma, na paw sietanô hno tlyma, na ty awpa châ vei. Chhôhkha sipa hnotypa châ ta, ama pano ta ama hmo paraona maoh ama phaoh aw.

²⁰ Chyhsa ta a paw unawhpa lapinô â ziakhei khiahta cha, a paw unawhpa dua thliapa châ ta, ama pano ta ama moleina maoh ama phaoh aw. Saw hnei leipa ta ama thi aw.

²¹ Chyhsa ta a unawhpa lapinô a hnei khiahta cha, hmo pathaih leipa a châ. A unawhpa dua a thliapa châ ta, saw hnei leipa ta ama thi aw.

Nama pathaih awpa a châ

²² “Chavâta ei bieraopa zydua nata ei ryhpa zydua a pyh aw ei chi ta, nama zyh awpa a châ. Chatanachata pahrâ nawpa ta ei cha tlôkheina râh ta cha pali aw veih ei.

²³ Nama hmia lâta ei papua hapa phopi taoziezy nama zi awpa châ vei. Cha hmo zydua cha tao tyh ei ta, chavâta ei pasi ngaita ei.

²⁴ Nâmo hnohta deikua cha, ‘Ama râh, sâhpiti nata kheihti lona râh cha, ryu ta to aw ei chi ta, nama hnei awpa ta ei cha pie aw ei,’ tahpa ta bie ei châ taih ei. Kei he Abeipa nama Khazohpa, phopizy hry tawhta nâmo châ pananotuhpa ei châ.

²⁵ Chavâta sa pathaihpa nata pathaih leipa, pavaw pathaihpa nata pathaih leipa nama panano awpa a châ. Sa tlyma, pavaw tlyma, alei liata alyhpasa tlyma, nama châta pathaih leipa ta ei pananopazy niepa ta, nama hrona cha pasichhihpa ta nama tao awpa châ vei.

²⁶ Ei châta nama pathaih awpa a châ. Kei, Abeipa he pathaih tlôh na ta, kei eih châ awpa ta, phopizy hry tawhta ei cha panano ei.

²⁷ “Chapaw rai, chanô rai, peihthaipa nata ahripa lâta pachaona a taopa cha thie thlyu awpa châ ta, alô ta vawhsao awpa a châ. Ama thisaih maoh ama phaoh aw,” tah ta.