THEIHTHAINA 2 - Mara Bible RV (BSI)

Niepa hlâna

¹ “Chyhsa ta Abeipa lâ niepa hlâna a hlâ tita, viahdie dipa a hlâ awpa a châ. Sathaw bao aw ta, a chô liata deiryh soh aw ta,

² Arawna sawchapaw theihthaipazy lâ a vawkhei aw. Theihthaipa ta viahdie dipa cha a sathaw nata a deiryh zydua chhaota, pazah kha la aw ta, cha cha atheithlâhna hmo a châ aw. Niepa zydua hlâ khaipa a châzie a thei thlâh ha nawpa ta maisâh liata a rao aw. Cha cha ropahâhpa châta Abeipa lâta raopa hlâna, mei ta hmohlâpa a châ.

³ Niepa hlâna laibâhpazy cha Arawna nata a sawchapawzy châta a châ aw. Cha cha Abeipa lâta mei ta hlâpazy hry liata hmo pathaih chaipa a châ.

⁴ “Viahchhâ taona beih ta viahchhâ taopa niepa hlâna na hlâ tita, viahdie dipa nata sathaw pahlaopa ta taopa thinô pahlao leipa viahchhâ pakâhpa tlyma, sathaw hniapa thinô pahlao leipa viahchhâ apapa tlyma na hlâ awpa a châ.

⁵ “Na hmohlâpa cha lômathu liata pakâhpa a châ khiahta cha, thinô pahlao leipa viahdie dipa cha sathaw pahlaopa ta na tao awpa a châ.

⁶ Patlaw aw chi ta, sathaw na bao aw. Cha cha niepa hlâna a châ.

⁷ “Na hmohlâpa cha ukâ ta chateipa niepa hlâna a châ khiahta cha, viahdie dipa sathaw pahlaopa ta tao awpa a châ.

⁸ “Cha hmozy ta taopa niepa hlâna cha Abeipa lâ vaw cheih aw chi ta, theihthaipa hnohta pie aw chi ta, ano ta maisâh lâ a vawkhei aw.

⁹ Niepa hlâna tawhna chata theihthaipa ta atheithlâhna hmo la aw ta, maisâh liata a rao aw. Cha cha ropahâhpa châta Abeipa lâta raopa hlâna, mei ta hmohlâpa a châ.

¹⁰ Niepa hlâna laibâhpazy cha Arawna nata a sawchapawzy châta a châ aw. Cha cha Abeipa lâta mei ta hlâpazy hry liata hmo pathaih chaipa a châ.

¹¹ “Abeipa lâta mei ta hlâpa châta thinô nata kheihtizy na rao awpa a châ leipa vâta, Abeipa hnohta na hlâ awpa niepa hlânazy cha thinô pahlaopa ta tao awpa châ vei.

¹² Niepa hlânazy cha thei hmiatuapa hlâpa hawhta Abeipa lâta hlâ aw chi ta, maisâh liata ropahâhpa hlâna châta deikua hmâ awpa châ vei.

¹³ Niepa hlâna zydua alôh mia khai aw chi ta, na Khazohpa biehrai alôh cha, niepa hlâna liata iah leipa ta a y awpa châ vei. Na hmohlâpa zydua liata alôh na hlâ pâ lymâ awpa a châ.

¹⁴ “Thei hmiatuapa tawhta niepa hlâna Abeipa lâta na hlâ khiahta cha, sâh suh a daih tuachaipazy hry tawhta tai aw chi ta, cha cha mei liata zawh aw chi ta, tly aw chi ta, a sâh cha na hlâ awpa a châ.

¹⁵ Sathaw bao aw chi ta, a chô liata deiryh na soh aw. Cha cha niepa hlâna a châ.

¹⁶ Theihthaipa ta sâh tly chiehpa cha, sathaw nata deiryh zydua chhaota atheithlâhna châta a rao aw. Cha cha Abeipa lâta mei ta hmohlâpa a châ.