THEIHTHAINA 19 - Mara Bible RV (BSI)

Pathaihna nata siana ryhpazy

¹ Abeipa ta Mawsi hnohta,

² “Izarei zawpi zydua chho la, ama hnohta hetana heta reih teh: Kei Abeipa nama Khazohpa he pathaih tlôh na ta, chavâta nâmo chhao nama pathaih awpa a châ.

³ Nama nô nata nama paw nama za chyu awpa châ ta, ei Pahânohzy nama chay awpa a châ. Kei he Abeipa nama Khazohpa ei châ.

⁴ Nothlahpa khazoh lâ a heih leipa u la, thua ta leihpa nothlahpa khazohzy a tao khuh vy. Kei he Abeipa nama Khazohpa ei châ.

⁵ “Abeipa lâta aryhna hlâna atheihna namâ hlâ tita, a pyhpa nama châ thei nawpa ta nama hlâ awpa a châ.

⁶ Nama hlâna noh nata a mylâ ta nie awpa châ ta, noh thôhna noh taihta a y khiahta cha, mei ta rao awpa a châ.

⁷ Noh thôhna noh ta niepa a châ khiahta cha, pathaih leipa châ ta, a pyhpa châ aw vei.

⁸ A niepa cha Abeipa hmo pathaihpa a papuapaleipa vâta, a hmo paraona maoh phaoh aw ta, cha chyhsa cha a phopi tawhta chhawh pathlahpa a châ aw.

⁹ “Nama râh liata sâh nama hria tita, nama lyu chhâna taihta nama hria khai awpa châ leipa ta, a kâmo chhao nama thoh awpa châ vei.

¹⁰ Nama kre sadô kâmo nama thoh awpa châ leipa ta, nama kre sadô liata kre zôpa namâ huah awpa châ vei. Dyhchhiepa nata chihropazy châta nama pahlôh awpa a châ. Kei he Abeipa nama Khazohpa ei châ.

¹¹ “Nama paru awpa châ leipa ta, dôveipa ta hmo nama tao awpa châ hra leipa ta, haipa bie namâ chho raihrie awpa châ vei.

¹² Ei moh ta haipa ta bie a taihpa ta, na Khazohpa moh na papuapalei awpa châ vei. Kei he Abeipa ei châ.

¹³ “Na vaih na tlybai awpa châ leipa ta, ano cha na hrao awpa châ vei. Raihriatuhpazy hlao pie leipa ta, azozâkhihdei nâ vao awpa châ vei.

¹⁴ “Nahpâpa chhie na sapa awpa châ leipa ta, mochaopa hmiakô liata chapiasana na so awpa châ vei. Na Khazohpa na chi awpa a châ. Kei he Abeipa ei châ.

¹⁵ “Ryureina liata â doleipa ta nama pachia awpa châ vei. Dyhchhiepa na khokhei via awpa châ leipa ta, chyhsa hmotaotheipa hmia na mo via awpa châ hra vei. Siana ta na vaih na pachia awpa a châ.

¹⁶ Chyhsa kyh reipa ta na chiheihzy hry liata nâ khie awpa châ leipa ta, na vaih hrona châta chichhihpa bie nâ duakhei awpa châ vei. Kei he Abeipa ei châ.

¹⁷ “Na palôh ta na unawhpa nâ hao awpa châ leipa ta, a thaileichâna liata nâ hlao hra lei nawpa ta, na vaih cha na chhorei awpa a châ.

¹⁸ Phuh na la awpa châ vei. Na chiheihzy chhyh thai leipa ta na y awpa châ leipa ta, nâma kyh nâ pachâpa hawhta na vaih kyh na pachâ awpa a châ. Kei he Abeipa ei châ.

¹⁹ “Ei bieraopazy na zyh awpa a châ. Sahroh chi hropa nata chi hropa chi na pathlasa awpa châ leipa ta, na lyu liata chi miano na chei pakaoh awpa châ hra leipa ta, pala chihropa miano sa pahlaopa chysia nâ tobi awpa châ vei.

²⁰ “Chyhsa ta a seichanô a ziakhei sala, cha seichanô cha a pahawh hapa châ sala, châhrasala chatlai mâh leipa nata khotalaina pie mâh leipa a châ khiahta cha, hriepa châ aw ei ta, seichanô cha khotalaina pie mâh leipa a châpa vâta, ama pano ta thie awpa deikua châ vei.

²¹ Chapaw ta a thaileichâna hlâna châta Abeipa lâta hlâ awpa mietaku tôhpa ahmaohna poh o chhikao liata â vaw chhi aw.

²² Chapaw moleina chatlai nawpa ta, theihthaipa ta thaileichâna hlâna mietaku tôhpa hlâ aw ta, Abeipa hmiakô liata chatlaina a taopa aw. Chatanachata a moleina cha a ngiahthaipa a châ aw.

²³ “Kâna râh a ngia aw ei chi ta, nie awpa châta tho chi to nama loh tita, a theilâpa cha nie lei awpa chi ta nama pachâ chy awpa a châ. Nama châta kô thôh chhôh nie leipa chi a châ aw. Nie cheita awpa châ vei.

²⁴ Tho thei zydua cha a kô palihna liata pathaih khai aw ta, Abeipa reithaina châta hlâ awpa a châ.

²⁵ A kô pangawhna kô ta a theilâpazy nama nie thei aw. Chatanachata theilâpa kôzy cha nama châta a pathei hluh via lymâ aw. Kei he Abeipa nama Khazohpa ei châ.

²⁶ “A thisaih chhaota khâpa hmah nama nie awpa châ vei. Dyuzy nama tao awpa châ leipa ta, pachaopazy nama hmâ awpa châ vei.

²⁷ Na siahli padôpa ta na luh nâ ngyu awpa châ leipa ta, na kâhhmi paizy na tai awpa châ vei.

²⁸ Athihpa châta nama pôhpa nama â awpa châ leipa ta, nama pôhpa nama chapai awpa châ vei. Kei he Abeipa ei châ.

²⁹ “Na sawchanô cha âzuahnô ta taopa ta na papuapalei awpa châ vei. Chataleipatala râh cha âzuahnô râh ta vaw châ aw ta, moleina ta a bie pathlei aw.

³⁰ Ei Pahânohzy chay aw ei chi ta, ei supathaihpa nama chiza awpa a châ. Kei he Abeipa ei châ.

³¹ “Peihthaipa tlyma, ahripa lâta pachaothaipa tlyma pangai leipa u la, chazy liata a papuapalei awpa ta âmo cha tlua hra khah u. Kei he Abeipa nama Khazohpa ei châ.

³² “Luh pawhpa hmiakô liata nâ duah tyh awpa châ ta, machâpa hmia za aw chi ta, Khazohpa na chi awpa a châ. Kei he Abeipa ei châ.

³³ “Chihropa nama râh liata khih a sapa ama y khiahta cha, a chô liata â doleipa ta nama tao awpa châ vei.

³⁴ Chihropa nama hnohta khih a sapa cha, nama râh chyhsa pakha hawhta nama pachâ awpa châ ta, nâma kyh nâ pachâpa hawhta a kyh na pachâ awpa a châ. Nâmo chhao Izi râh liata chihropa nama châpa kha a thei thlâh ha teh u. Kei he Abeipa nama Khazohpa ei châ.”

³⁵ “Pachiana kyh liata zy, a seihna thliena liata zy, â hrina khopathliahna liata zy, panuana liata zy â doleipa ta nama tao awpa châ vei.

³⁶ Khopathliahna dopa, khopathliahna lô dopa, kachu dopa, chhiehraôh dopa nama hmâ awpa a châ. Kei he Abeipa nama Khazohpa, Izi râh tawhta châ chhi papuatuhpa ei kha ei châ.

³⁷ Chavâta ei bieraopa zydua nata ei ryhpa zydua a pyh aw ei chi ta, nama zyh awpa a châ. Kei he Abeipa ei châ,” tah ta.