THEIHTHAINA 18 - Mara Bible RV (BSI)

Aziakhei awpa pasai leipazy

¹ Abeipa ta Mawsi hnohta,

² “Izarei sawzy chho la, ama hnohta hetana heta reih teh: Kei he Abeipa nama Khazohpa ei châ.

³ Nama vaw pahrâna Izi râh liata ama taozie hawhna khata nama tao awpa châ leipa ta, ei cha tlôkhei awpa su Kâna râh liata ama taozie hawhta nama tao awpa châ hra vei. Ama bieraopazy nama zyh awpa châ vei.

⁴ Ei ryhpazy a pyh aw ei chi ta, ei bieraopazy zyhpa ta, ei lâpi namâ chhih awpa a châ. Kei he Abeipa nama Khazohpa ei châ.

⁵ “Ei bieraopazy nata ei ryhpazy nama zyh awpa châ ta, chazy cha chyhsa ta a tao khiahta cha, chazy vâna chata a hroh aw: Kei he Abeipa ei châ.

⁶ “Ahy hmahta nama chhôhkha sipazy a hniapa ta, ama hno ty ta, ama thluahruana palâpa ta namâ ziakhei awpa châ vei. Kei he Abeipa ei châ.

⁷ “Na nô hno typa ta na paw thluahruana na palâ awpa châ vei. Na nô hno typa cha na paw dua thliapa a châ. Ano cha na nô châ ta, a hno na ty awpa châ vei.

⁸ “Na paw lapinô hno na ty awpa châ vei. Cha cha na paw dua thliapa a châ.

⁹ “Na sietanô hno na ty awpa châ vei. Na paw sawchanô rai châ sala, na nô sawchanô rai châ sala, o kha liata na pilâhpa chhao, o hro lâta a pihpa chhao, a hno rai na ty awpa châ vei.

¹⁰ “Na sawchapaw lâta na samohnô hno tlyma, na sawchanô lâta na samohnô hno tlyma na ty awpa châ vei. Âmo thluahruana palâpa cha nâma thluahruana palâpa a châ.

¹¹ “Na paw lapinô sawchanô, o kha liata na laiseih khohpa hno na ty awpa châ vei. Ano cha na sietanô a châ.

¹² “Na paw sietanô hno na ty awpa châ vei. Ano cha na paw chhôhkha sipa a châ.

¹³ “Na nô narônô hno na ty awpa châ vei. Ano cha na nô chhôhkha sipa a châ.

¹⁴ “Na paw unawhpa thluahruana na palâ awpa a châ leipa vâta, a lapinô nâ hnia awpa rai châ vei. Ano cha na nô a châ.

¹⁵ “Na myuhnô hno na ty awpa châ vei. Na sawchapawpa lapinô châ ta, a thluahruana na palâ awpa châ vei.

¹⁶ “Na unawhpa lapinô hno na ty awpa châ vei. Cha cha na unawhpa thluahruana palâpa a châ.

¹⁷ “Chanô nata a sawchanô cha, ama pano ta ama hno na ty awpa châ vei. A sawchapawpa sawchanô tlyma, a sawchanônô sawchanô tlyma hneipa ta ama thluahruana na palâ awpa châ vei. Chhôhkha sipazy châ ei ta, cha hawhta taopa cha moleina a châ.

¹⁸ “Na lapinô hro chhôh ta, a narônô cha na lapinô châta hneipa ta, a hno na ty awpa châ vei.

¹⁹ “Chanô a hnopasu pathaih lei daihti liata a hniapa ta a hno na ty awpa châ vei.

²⁰ “Na vaih lapinô a ziakheipa ta, ano vâta nâ papuapalei awpa châ vei.

²¹ “Na saw ahy hmahta atheihna ta Môleka lâ na hlâ awpa châ vei. Cha hawhta hmo taopa ta na Khazohpa moh na papuapalei awpa châ vei. Kei he Abeipa ei châ.

²² “Chanô a ziakheipa hawhta chapaw nâ ziakhei awpa châ vei. Pasichhihpa a châ.

²³ “Sahroh ykheipa ta nâ papuapalei awpa châ vei. Chanô chhao sahroh hmia liata a duahpa ta â paykheisa awpa châ vei. Cha cha molei khuachhuapa a châ.

²⁴ “Cha hawhpa hmozy taopa ta, nâmosasyh a papuapalei khah u. Cha hmozy ama taopa vâta, nama hmiakô liata ei papua laihpa phopizy kha amâ papuapalei hapa a châ.

²⁵ Cha vâna chata râh chhao papuapaleipa ta y ta, ama hmo paraona vâta hrie ei na ta, râh ta a chhôh liata a pahrâpazy a pali ha ei.

²⁶ Nâmo deikua cha, a râh chyhsa chhao, chihropa nama hry liata a pahrâpazy chhao, ei bieraopazy nata ei ryhpazy nama zyh awpa châ ta, cha hmo pasichhihpa kheihawhpa hmahta nama tao awpa châ vei.

²⁷ Cha hmo pasichhihpa zydua cha, he râh liata nâmo hlâta a vaw pahrâ tuapa phopi ta tao ei ta, chavâta râh cha papuapaleipa ta a y hapa a châ.

²⁸ Nâmo chhao, râh nama papuapalei khiahta cha, nâmo hlâta a vaw y tuapa phopi hawhna khata râh ta a cha pali hra aw ei.

²⁹ Cha hmo pasichhihpa kheihawhpa rai a taopazy cha ama phopi tawhta chhawh pathlahpa ama châ aw.

³⁰ Chavâta hmo pasichhihpa phoryhpa, nâmo y hlâta he râh liata a vaw y tuapa phopizy ta ama taopazy kha nama tao hra lei nawpa ta, ei biepiepa he zyh u la, cha hmozy liata a papuapalei khuh vy. Kei he Abeipa nama Khazohpa ei châ,” tah ta.