THEIHTHAINA 17 - Mara Bible RV (BSI)

Atheihna zydua su kha liata hlâ khai awpa

¹ Abeipa ta Mawsi hnohta,

² “Arawna nata a sawchapawzy nata Izarei saw zydua chho la, ama hnohta hetana heta reih teh. He he Abeipa biepiepa a châ:

³ Izarei pathla ahy rai viahchao tôhpa tlyma, mietakutaw tlyma, mie tlyma, riehmo liata tlyma, riehmo khôtho lâ tlyma thie sala,

⁴ Abeipa achhyna byureih hmiakô liata Abeipa lâta hmohlâpa ta hlâ awpa ta, ahmaohna poh o chhikao liata a vaw cheih leipa cha, thisaih a palopa ta pachâpa châ aw ta, a chô liata thisaih maoh a y aw. Cha chyhsa cha a phopi tawhta chhawh pathlahpa a châ aw.

⁵ Izarei sawzy ta lyurâhpa liata atheihna ama hlâ tyhpazy kha, Abeipa lâta hlâ awpa ta, ahmaohna poh o chhikao liata theihthaipa lâta cheipa ta, aryhna hlâna atheihna châta Abeipa lâta ama hlâ thei nawpa ta, he ryhpa he taopa a châ.

⁶ Theihthaipa ta ahmaohna poh o chhikao liata Abeipa maisâh chô liata thisaih thia aw ta, a thaw cha Abeipa châta ropahâhpa châta a rao aw.

⁷ Amâ phei tyhna mie tôhpa khazohzy lâta atheihnazy ama hlâ awpa châ khao vei. Cha cha ama chhâ zydua châta chhâzaw bieraopa a châ aw.

⁸ “Ama hnohta hetana heta reih via teh: Izarei pathla ahy tlyma, chihropa ama hry liata a pahrâpa ahy tlyma, raopa hlâna tlyma, atheihna tlyma hlâ sala,

⁹ Abeipa lâta hlâ awpa ta ahmaohna poh o chhikao liata a vaw cheih leipa khiahta cha, cha chyhsa cha a phopi tawhta chhawh pathlahpa a châ aw.

Thisaih nie pakhâna

¹⁰ “Izarei pathla ahy tlyma, chihropa ama hry liata a pahrâpa ahy tlyma, thisaih kheihawhpa rai a niepa maih cha, cha thisaih a nietuhpa cha hiehâhpa ta moh aw na ta, a phopi tawhta ei chhawh pathlah aw.

¹¹ Sapa hrona cha thisaih liata y ta, cha cha nama hronazy chatlai nawpa ta, maisâh liata ei cha pie ei. Thisaih cha hrona châ ta, hrona chatlaina a tao theituhpa cha thisaih a châ.

¹² Chavâta Izarei sawzy hnohta, ‘Nama hry liata ahy hmahta thisaih nama nie awpa châ leipa ta, chihropa nama hry liata a pahrâpa ahy hmahta thisaih ama nie awpa châ vei,’ ei tahpa a châ.

¹³ “Izarei saw tlyma, chihropa ama hry liata a pahrâpa tlyma, râh a khie sala, sa tlyma, pavaw tlyma, nie theipa chi a vaw phaoh khiahta cha, a thisaih palo aw ta, dohlei ta a khu awpa a châ.

¹⁴ Hmohrohneipa to hrona cha a thisaih a châ. A thisaih cha a hrona a châ. Chavâta Izarei sawzy hnohta, ‘Kheihawhpa sa thisaih hmah nama nie awpa châ vei. Hmohrohneipa to hrona cha a thisaih châ tlôh ta, chavâta thisaih a niepa cha chhawh pathlahpa a châ aw,’ tahpa ta ei chho ei.

¹⁵ “Ano kho ta a thipa tlyma, sa taipa tlyma a niepa cha, a râh chyhsa chhao, chihropa chhao, a chysiazy pasu aw ta, ti liata a ngai a si aw ta, zâlâ taih pathaih leipa a châ aw. Cha khai tawhta a pathaih aw.

¹⁶ A chysiazy pasu leipa sala, a ngai â si vei khiahta cha, a paraona maoh a phaoh aw,” tah ta.