THEIHTHAINA 16 - Mara Bible RV (BSI)

Chatlaina noh

¹ Arawna sawchapaw pano ta mei pathaih leipa hmâpa ta Abeipa lâta ropahâhpa ama hlâpa vâta ama thi tawhta Abeipa ta Mawsi cha bie a chho ta.

² Abeipa ta Mawsi hnohta, “Na unawhpa Arawna chho teh. A khona daihti maihta Byh chô liata patyupa zawngiahna dyuchhai hmiakô liata pohraipa chhôh Su Pathaihpa lâ â ngia awpa châ vei. Zawngiahna dyuchhai chô liata meihdo hry liata a vaw luah tlôh aw na ta, chavâta a thi pathlei aw.

³ Arawna cha Su Pathaihpa lâ â ngia tita, moleina hlâna châta viahchao tôh dawpa nata raopa hlâna châta mietaku tôhpa chhaota â ngia awpa a châ.

⁴ Pala rih dipa viahkao pathaihpa a ky aw ta, a sapa khu nawpa ta pala rih dipa chaopasy â pasy aw. Pala rih dipa chaisaihna a saih aw ta, pala rih dipa lakhu â khu aw. Chazy cha chysia pathaihpa a châ. Ti liata a ngai a si tua aw ta, cha khai tawhta chysiazy cha â tobi aw.

⁵ Izarei zawpi tawhta moleina hlâna châta mie tôhpa pô no nata raopa hlâna châta mietaku tôhpa pô kha a la aw.

⁶ “Arawna ta ano moleina hlâna châta viahchao tôhpa hlâ aw ta, ano nata a chhôhkha châta chatlaina a tao aw.

⁷ Mie pô no a chhi aw ta, ahmaohna poh o chhikao liata Abeipa hmiakô ta a soh aw.

⁸ Arawna ta mie pô no chhichâ nawpa cha nuby a daopa ta â tlyh aw. Nuby miakhapa liata ‘Abeipa châta’ tahpa roh aw ta, nuby hropa liata ‘Azaze châta’ tahpa a roh aw.

⁹ Abeipa châta a tlupa mie cha Arawna ta la aw ta, moleina hlâna châta a hlâ aw.

¹⁰ Azaze châta a tlupa mie cha, chatlaina tao nawpa ta râhchawhpa lâ pathlie awpa ta, Abeipa hmiakô liata ahrohpa ta a soh aw.

¹¹ “Arawna ta ano châta moleina hlâna viahchao tôhpa cheih aw ta, ano nata a chhôhkhazy châta chatlaina tao aw ta, ano châta moleina hlâna viahchao tôhpa cha a thie aw.

¹² Chatawhcha mei-ia ta a biepa meilana beikoh cha, maisâh tawhta Abeipa hmiakô liata la aw ta, ropahâhpa pahâh ngaitapa, a dipa ta phypa kupazah miano chhaota, pohraipa chhôh lâ â ngiakhei aw.

¹³ Ropahâhpa cha Abeipa hmiakô ta mei liata mia aw ta, ropahâhpa khuh ta Biehrai Byh chô liata zawgiahna dyuchhai cha pahly aw ta, chatanachata thina a tyh aw vei.

¹⁴ Viahchao tôhpa thisaih la aw ta, a kudy ta zawngiahna dyuchhai nochhi lâchhâh thia aw ta, zawngiahna dyuchhai hmia lâ chhao, a kudy ta thisaih cha ei sari a thia aw.

¹⁵ “Cha khai tawhta zawpi châta moleina hlâna mie thie aw ta, pohraipa chhôh lâ a thisaih â ngiakhei aw. Viahchao tôhpa thisaih a taopa hawhna khata, mie thisaih chhao cha tao aw ta, zawngiahna dyuchhai chô liata nata zawngiahna dyuchhai hmiakô liata a thia aw.

¹⁶ Chatanachata Izarei sawzy pathaih leinazy, ama paraonazy nata ama moleina zydua vâta Su Pathaihpa châta chatlaina a tao aw. Cha hawhna chata, ama pathaih leinazy hry liata ama hnohta a ypa ahmaohna poh o châta chhao a tao aw.

¹⁷ Chatlaina tao awpa ta Su Pathaihpa lâ â ngiana daihti tawhta, ano nata a chhôhkha nata Izarei zawpi châta chatlaina tao ta, a vaw pua heih hlâlei cha, ahy hmahta ahmaohna poh o chhôh liata ama y awpa châ vei.

¹⁸ Cha khai tawhta, Abeipa hmiakô liata maisâh lâ pangai aw ta, maisâh châta chatlaina a taopa aw. Viahchao tôhpa thisaih nata mie thisaihzy la aw ta, maisâh kizy liata â dôna taihta a hnia aw.

¹⁹ Maisâh cha a kudy ta thisaih ei sari thia aw ta, a pathaisa aw. Cha hawhna chata maisâh cha Izarei sawzy pathaih leinazy tawhta a pathaisa aw.

²⁰ “Su Pathaihpa, ahmaohna poh o nata maisâh zy châta chatlaina a tao khai tawhta, mie hrohpa cha a hlâ aw.

²¹ Arawna ta mie hrohpa luh chô liata a ku kârano pahnieh aw ta, Izarei sawzy paraona, tao pasina nata moleina zydua mie chô liata palâhâh aw ta, chazy cha mie luh chô liata a soh khai aw. Mie cha rao eihpa chyhsa ku liata pie aw ta, râhchawhpa lâ a kei pathliesa aw.

²² Mie cha râhchawhpa liata pathlie aw ta, chatanachata ama paraona zydua cha mie ta chyhsa y leina râh lâ a siekhei ha aw.

²³ “Chatawhcha Arawna cha ahmaohna poh o liata a ngia aw ta, Su Pathaihpa lâ â ngia nota pala rih dipa chysia â taopazy pahluh aw ta, cha liata a siesai aw.

²⁴ Su pathaihpa liata ti ta a ngai a si aw ta, a chysia â tao heih aw. Cha khai tawhta vaw pua aw ta, ano châta raopa hlâna nata zawpi châta raopa hlâna hlâ aw ta, ano nata zawpi châta chatlaina a tao aw.

²⁵ Moleina hlâna thaw cha maisâh liata a rao aw.

²⁶ “Azaze châta mie a pathlietuhpa chhao a chysia pasu aw ta, ti liata a ngai a si aw ta, cha khai tawhta riehmo lâ â di aw.

²⁷ Chatlaina tao nawpa ta Su Pathaihpa liata ama thisaih a ngiakheipa moleina hlâna viahchao tôhpa nata moleina hlâna mie cha, riehmo khôtho lâ puakhei awpa châ ta, ama vozy, ama sapazy nata ama iezy mei ta rao awpa a châ.

²⁸ Mei ta a raotuhpa cha a chysia pasu aw ta, ti liata a ngai a si aw ta, cha khai tawhta riehmo lâ â di aw.

²⁹ “He he nama châta chhâzaw bieraopa a châ aw: Thla sarina noh hrawhna noh liata a paky aw ei chi ta, a râh chyhsa chhao, chihropa nama hry ta a pahrâpa chhao, khâpa rai hmahta nama hria awpa châ vei.

³⁰ Cha noh liata, nâmo pathaisa awpa ta nama chatlaina taopa châ aw ta, chatanachata Abeipa hmiakô liata nama moleina zydua tawhta nama pathaih aw.

³¹ Cha cha nama châta Pahânoh zachhihpa châ ta, namâ paky awpa noh a châ. Cha cha chhâzaw châta bieraopa a châ.

³² Theihthaipa, a paw su a thla awpa ta sathawthupa nata pananopa ta pala rih dipa chysia pathaihpa a tobi aw ta, chatlaina a tao aw.

³³ Supathaihpa, ahmaohna poh o nata maisâh zy châta chatlaina tao aw ta, theihthaipazy nata zawpi châta chhao chatlaina a tao aw.

³⁴ Izarei sawzy moleina zydua vâta ama châta kô kha ta ei kha chatlaina tao tyh awpa cha, nama châta chhâzaw bieraopa a châ aw,” tah ta. Chatanachata Abeipa ta Mawsi bie a piepa hawhta Arawna ta tao ta.