THEIHTHAINA 15 - Mara Bible RV (BSI)

Pôhpa tawhta a lohpa pathaih leipazy

¹ Abeipa ta Mawsi nata Arawna chho ta, ama hnohta,

² “Izarei sawzy chho u la, ama hnohta hetana heta reih teh u: Chapaw ahy rai a chapaw châna tawhta hniah a pua khiahta cha, hniah cha pathaih leipa a châ.

³ He he chapaw châna tawhta hniah a puapa vâta pathaih leina ryhpa a châ: Hniah cha a pua pazao ngâ thlâh ha tlyma, â chalih ha tlyma, pathaih leipa a châ khai.

⁴ Hniah hneipa aziana rakhô cha pathaih leipa châ aw ta, â tyuna chhao pathaih leipa a châ aw.

⁵ A rakhô a hriapa cha a chysiazy pasu aw ta, ti liata a ngai a si aw ta, zâlâ taih pathaih leipa a châ aw.

⁶ Hniah hneipa atyuna liata a tyuhpa cha a chysiazy pasu aw ta, ti liata a ngai a si aw ta, zâlâ taih pathaih leipa a châ aw.

⁷ Hniah hneipa pôhpa a hriapa cha a chysiazy pasu aw ta, ti liata a ngai a si aw ta, zâlâ taih pathaih leipa a châ aw.

⁸ Hniah hneipa ta chyhsa pathaihpa pachih ta a pachhao khiahta cha, chyhsa pathaihpa cha a chysiazy pasu aw ta, ti liata a ngai a si aw ta, zâlâ taih pathaih leipa a châ aw.

⁹ Hniah hneipa chyhsa kiana kypadia cha pathaih leipa a châ aw.

¹⁰ Hniah hneipa chyhsa ry lâta a ypa hmo a hriapa cha zâlâ taih pathaih leipa a châ aw. Cha hmozy a phaohpa cha a chysiazy pasu aw ta, ti liata a ngai a si aw ta, zâlâ taih pathaih leipa a châ aw.

¹¹ Hniah hneipa ta ti liata a ku a si ha tua leipa ta a hriapa chyhsa cha, a chysiazy pasu aw ta, ti liata a ngai a si aw ta, zâlâ taih pathaih leipa a châ aw.

¹² Hniah hneipa ta a hriapa alei beih cha pakei awpa châ ta, tho hmobaoh zydua deikua, ti liata pasi khai awpa a châ.

¹³ “Hniah hneipa cha a hniah tawhta a pathaih ha khiahta cha, ano pathaisana châta noh sari hmâh aw ta, a chysiazy pasu aw ta, chavah ti liata a ngai a si aw ta, chatanachata a pathaih ha aw.

¹⁴ A noh chariena noh ta, vachhuh pô no tlyma, pivawtaw pô no tlyma cheipa ta Abeipa hmiakô lâ vawh aw ta, ahmaohna poh o chhikao liata theihthaipa a hlâ aw.

¹⁵ Theihthaipa ta moleina hlâna châta pô kha, raopa hlâna châta pô kha hlâ aw ta, a hniah lopa châta Abeipa hmiakô liata chatlaina a taopa aw.

¹⁶ “Chapaw ahy rai a baoti a pua khiahta cha, a pôhpa duata ti liata a ngai a si aw ta, zâlâ taih pathaih leipa a châ aw.

¹⁷ Baoti ta a kiapa chysia nata vo zydua ti liata pasupa ta pasi khai awpa châ ta, zâlâ taih pathaih leipa a châ aw.

¹⁸ Chapaw ta chanô a ziakhei sala, a baoti a papua khiahta cha, ama pano ta ti liata ama ngai a si aw ei ta, zâlâ taih pathaih leipa ama châ aw.

¹⁹ “Chanô ta a chanô châna tawhta a puapa hnei sala, a puapa cha thi a châ khiahta cha, chanô hnopasupa vâta noh sari chhôh pathaih leipa châ aw ta, ahy rai ano a hriapa cha zâlâ taih pathaih leipa a châ aw.

²⁰ A pathaih lei chhôh ta â ziana maih cha pathaih leipa châ aw ta, â tyuna maih chhao pathai leipa a châ aw.

²¹ A rakhô a hriapa cha a chysiazy pasu aw ta, ti liata a ngai a si aw ta, zâlâ taih pathaih leipa a châ aw.

²² Â tyuna a hriapa chhao a chysiazy pasu aw ta, ti liata a ngai a si aw ta, zâlâ taih pathaih leipa a châ aw.

²³ Rakhô liata hmo a ypa nata â tyuna liata hmo a ypa a hriapa cha zâlâ taih pathaih leipa a châ aw.

²⁴ Chapaw ta ano cha a ziakhei sala, a chanô thi lopa pathaih leina cha â hlao khiahta cha, cha chapaw cha noh sari chhôh pathaih leipa châ aw ta, â ziana rakhô maih pathaih leipa a châ aw.

²⁵ “Chanô a hnopasu daihti tyhpa châ leipa ta, noh hluhpi hnopasupa ta ypa ta tlyma, a chanô hnopasu daihti tyhpa hlâta noh hluh via ta hno a pasu khiahta tlyma cha, a chanô hnopasu daihti tyhpa chhôh ta a pathaih leina yzie hawhna khata a hno pasu chhôh zydua a y hra aw, pathaih leipa a châ.

²⁶ A hnopasu chhôh zydua ta â ziana rakhô maih cha, a chanô hnopasu pathaih leina daihti tyhpa liata a rakhô hawhta châ aw ta, â tyuna maih chhao, a chanô hnopasu pathaih leina daihti tyhpa liata a pathaih leipa hawhta pathaih leipa a châ aw.

²⁷ Ahy rai cha hmozy a hriapa cha pathaih leipa châ aw ta, a chysiazy pasu aw ta, ti liata a ngai a si aw ta, zâlâ taih pathaih leipa a châ aw.

²⁸ “Chanô cha a hnopasupa tawhta a pathaih ha khiahta cha, pathaisana châta noh sari hmâh aw ta, cha khai tawhta a pathaih aw.

²⁹ A noh chariena noh ta, vachhuh pô no tlyma, pivawtaw pô no tlyma cheih aw ta, theihthaipa hnohta ahmaohna poh o chhikao liata a hlâ aw.

³⁰ Theihthaipa ta moleina hlâna châta pô kha, raopa hlâna châta pô kha hlâ aw ta, hnopasupa vâta a pathaih leina châta Abeipa hmiakô liata chatlaina a taopa aw.

³¹ “Cha hawhna chata Izarei sawzy cha ama pathaih leinazy tawhta na panano awpa ei a châ. Chataleipatala ama pathaih leina vâta, ama hry liata ei achhyna byureih papuapalei aw ei ta, ama thi pathlei aw.

³² “Cha cha a chapaw châna tawhta hniah a lohpa nata a baoti a puapa vâta pathaih leipa a châ hapa chapaw châta ryhpa châ ta,

³³ chanô hnopasupa vâta a pathaih leipa châta ryhpa a châ hra. Chapaw chhao, chanô chhao, a chapaw châna nata a chanô châna tawhta a puapa a hneipa zydua châta ryhpa châ ta, chanô hnopasu chhôh ta a ziakheipa chapaw châta ryhpa a châ,” tah ta.