THEIHTHAINA 14 - Mara Bible RV (BSI)

Phawhpa pathaihpa ta phuahna ryhpa

¹ Abeipa ta Mawsi chho ta, a hnohta,

² “He he phawhpa a pathaih noh ta taozie awpa ryhpa a châ: Phawhpa cha theihthaipa lâ a chhi awpa a châ.

³ Theihthaipa cha riehmo khôtho lâ pua aw ta, phawhpa cha moh aw ta, phawhpa chô liata phawhpa hri cha a tlâh ha khiahta cha,

⁴ theihthaipa ta pathaisa awpa phawhpa châta pavaw pathaihpa a hrohpa ta pô no, sidy tho, pala saihlawpa nata hisaw zy cheipa awpa ta bie a pie aw.

⁵ Theihthaipa ta pavaw pô kha cha alei beih chhôh liata chavah ti pasohpa chô liata thie awpa ta bie a pie aw.

⁶ Pavaw hrohpa cha la aw ta, sidy tho nata pala saihlawpa nata hisaw zy chhaota cheih aw ta, chavah ti chô liata thiepa pavaw thisaih liata a ny aw.

⁷ Phawhpa hri tawhta pathaisa awpa cha, pavaw thisaih ta ei sari thia aw ta, ano cha pathaihpa ta phuah aw ta, pavaw hrohpa cha lyurâhpa lâ a pathlie aw.

⁸ “Pathaisa awpa chyhsa cha a chysiazy pasu aw ta, a hmi zydua a ngyu aw ta, ti ta a ngai a si aw ta, a pathaih ha aw. Cha khai tawhta riehmo lâ a ngia thei aw ta, châhrasala a poh o khôtho liata noh sari a y chy awpa a châ.

⁹ A noh sarina noh ta a luh sâ zydua, a kâhhmi nata a hmaohmi zydua nata a mokhitlâh hmi zydua â ngyu aw. A hmi zydua â ngyu khai awpa a châ. A chysiazy pasupa ta, ti ta a ngai a si aw ta, chatanachata a pathaih ha aw.

¹⁰ “A noh chariena noh ta mietakutaw chapawpa seina hnei leipa pô no, mietakutaw chanôpa kô khapa seina hnei leipa pô kha nata niepa hlâna châta viahdie dipa sathaw pahlaopa kachu su hrawh su thôh nata sathaw chhiehraôh ôh kha a hlâ aw.

¹¹ A pathaisatuhpa theihthaipa ta a pathaisa awpa chyhsa nata cha hmozy cha ahmaohna poh o chhikao liata Abeipa hmiakô ta a soh aw.

¹² Theihthaipa ta mietakutaw chapawpa pô kha cha sathaw byh chhaota la aw ta, thaileichâna hlâna châta hlâ aw ta, chaluahpa hlâna châta Abeipa hmiakô liata a chaluah aw.

¹³ Moleina hlâna nata raopa hlâna ama thie tyhna su, supathaihpa liata mietakutaw chapawpa cha a thie aw. Moleina hlâna cha theihthaipa tovyuh a châpa hawhta, thaileichâna hlâna chhao theihthaipa tovyuh a châ hra. Cha cha pathaih ngaitapa a châ.

¹⁴ Theihthaipa ta thaileichâna hlâna thisaih cha la aw ta, a pathaisa awpa nakao chachâh lâ pawhmao nata a chachâh lâ kupi nata pheipi zy liata a hnia aw.

¹⁵ Theihthaipa ta sathaw ôh liata sathaw chyhta a chavei lâ kupazah liata bô aw ta,

¹⁶ cha liata a chachâh lâ kudy ny aw ta, a kudy ta Abeipa hmiakô liata ei sari a thia aw.

¹⁷ Theihthaipa ta a ku liata sathaw laibâhpazy cha a pathaisa awpa nakao chachâh lâ pawhmao nata a chachâh lâ kupi nata pheipi zy liata a hnia aw. Chazy cha thaileichâna hlâna thisaih a thiapa chô liata a hnia thlu aw.

¹⁸ Chatawhcha theihthaipa ta a ku liata sathaw laibâhpazy cha a pathaisa awpa luh liata hnia aw ta, Abeipa hmiakô liata chatlaina a taopa aw.

¹⁹ “Theihthaipa ta moleina hlâna hlâ aw ta, a pathaih leina tawhta pathaisa awpa châta chatlaina taopa aw ta, cha khai tawhta raopa hlâna a thie aw.

²⁰ Theihthaipa ta raopa hlâna nata niepa hlâna cha maisâh liata a hlâ aw. Cha hawhna chata theihthaipa ta chatlaina taopa aw ta, a vaw pathaih ha aw.

²¹ “Dyhchhiepa châ sala, a hneina ta a tloh leipa khiahta cha, mietaku chapawpa pô kha cheih aw ta, ano châta chatlaina tao nawpa ta, thaileichâna hlâna châta chaluahpa a châ aw. Niepa hlâna châta viahdie dipa sathaw pahlaopa kachu su hrawh su kha nata sathaw chhiehraôh ôh kha cheih aw ta,

²² vachhuh pô no tlyma, pivawtaw pô no tlyma, a hnei viapa thithaw cheih hra aw ta, pô kha cha moleina hlâna châta châ aw ta, ahropa cha raopa hlâna châta a châ aw.

²³ “Chazy cha, phawhpa ta ano pathaisa nawpa ta, a noh chariena noh ta, theihthaipa lâ a cheih awpazy châ ta, ahmaohna poh o chhikao liata Abeipa hmiakô ta a cheih awpa a châ.

²⁴ Theihthaipa ta thaileichâna hlâna mietakutaw nata sathaw chhiehra ôh kha la aw ta, chaluahpa hlâna châta Abeipa hmiakô liata a chaluah aw.

²⁵ Cha khai tawhta theihthaipa ta thaileichâna hlâna mietakutaw cha a thie aw. Thaileichâna hlâna thisaih cha la aw ta, a pathaisa awpa nakao chachâh lâ pawhmao nata a chachâh lâ kupi nata pheipi zy liata a hnia aw.

²⁶ Chatawhcha theihthaipa ta sathaw chyhta a chavei lâta kupazah liata bô aw ta,

²⁷ a ku chavei lâta sathaw cha, a ku chachâh lâta kudy ta Abeipa hmiakô liata ei sari a thia aw.

²⁸ Theihthaipa ta a ku liata sathaw cha a pathaisa awpa nakao chachâh lâ pawhmao nata a chachâh lâ kupi nata pheipi zy liata thaileichâna hlâna thisaih a hniana su chô liata a hnia thlu aw.

²⁹ Theihthaipa ta a ku liata sathaw laibâhpazy cha a pathaisa awpa luh liata thu aw ta, Abeipa hmiakô liata chatlaina a taopa aw.

³⁰ Vachhuhzy tlyma, pivawtawzy tlyma, a hneipa thithaw theihthaipa ta hlâ aw ta,

³¹ moleina hlâna châta pô kha hlâ aw ta, raopa hlâna châta pô kha, niepa hlâna chhaota hlâ aw ta, pathaisa awpa châta Abeipa hmiakô liata chatlaina a taopa aw.

³² Cha cha phawhpa hri pathaisana hmohlâpa ryhpa hawhta a tao thei leipazy châta pathaisana ryhpa a châ,” tah ta.

O pathaisana ryhpa

³³ Abeipa ta Mawsi nata Arawna chho ta, ama hnohta,

³⁴ “Nama ryuto châta Kâna râh ei cha piepa ei namâ ngia tita, nama ryuto râh liata kheihawhpa o lia rai ta phawhpa hri ei soh khiahta cha,

³⁵ o hneituhpa ta theihthaipa lâ vawh aw ta, ‘Ei o liata hri a lyupa a ypa hawhta ei pahno,’ tahpa ta a chho aw.

³⁶ O chhôh liata hmo a ypa zydua pathaih leipa a châ pathlei lei nawpa ta, theihthaipa ta hri moh awpa ta â ngia hlâta, o cha parua awpa ta bie a pie aw. Cha khai tawhta o moh awpa ta theihthaipa cha â ngia aw.

³⁷ Hri cha moh aw ta, hri chata a rôh hrohpâpa ta tlyma, saihpâpa ta tlyma, pâhchhô nie sala, pâhchhô hlâta a thu viapa ta â lâ khiahta cha,

³⁸ theihthaipa cha o tawhta chhikao lâ pua aw ta, o cha noh sari a khaw aw.

³⁹ A noh sarina noh ta, theihthaipa cha a vy heih aw ta, moh aw ta, hri cha pâhchhô liata a kawh laih khiahta cha,

⁴⁰ hri yna pâhchhô alôzy la ta, khihpi khôtho lâ su sithai leipa liata thy awpa ta bie a pie aw.

⁴¹ Theihthaipa ta o chhôh zydua pahaosa khai aw ta, ama haona paohpazy cha khihpi khôtho lâ su sithai leipa liata ama patlai khai aw.

⁴² Alô hropazy la aw ei ta, alô ama thy hapa suzy liata soh aw ei ta, beihlei hropa la aw ei ta, o cha ama pamih pathi aw.

⁴³ “Alôzy thy khai tawh chhao ta nata o cha hao khaipa ta pamih pathi khaipa a châ tawh chhao ta, o liata hri a vaw pua heih khiahta cha,

⁴⁴ theihthaipa ta a ngia aw ta, a moh heih aw. Hri cha o liata a kawh via laih khiahta cha, a kawh theipa phawhpa hri o liata a ypa châ ta, o cha pathaih leipa a châ.

⁴⁵ O cha phiepa châ aw ta, alôzy, thozy nata pachawh pâna beihlei zydua cha khihpi khôtho liata su sithai leipa lâ paly awpa a châ.

⁴⁶ Cha o khaw chhôh ta a ngiapa maih zâlâ taih pathaih leipa ama châ aw.

⁴⁷ Cha o liata a riepa maih cha ama chysiazy pasu aw ei ta, cha o liata pati a niepazy chhao ama chysiazy ama pasu awpa a châ.

⁴⁸ “Theihthaipa ta moh awpa ta a vy ta, hri cha o pamih pathipa a châ tawhta a kawh via laih leipa khiahta cha, theihthaipa ta o cha pathaihpa ta a phuah aw. Hri cha a pai hapa a châ.

⁴⁹ O pathaisa nawpa ta pavaw pô no, sidy tho, pala saihlawpa nata hisaw cheih aw ta,

⁵⁰ pavaw pô kha cha alei beih chhôh liata chavah ti pathaihpa chô liata a thie aw.

⁵¹ Sidy tho, hisaw, pala saihlawpa nata pavaw hrohpa cha la aw ta, pavaw thiepa thisaih nata pahlaopa chavah ti liata ny aw ta, o cha ei sari a thia aw.

⁵² Chatanachata o cha pavaw thisaih, chavah ti, pavaw hrohpa, sidy tho, hisaw nata pala saihlawpa zy ta a pathaisa aw.

⁵³ Pavaw hrohpa cha khihpi tawhta lyurâhpa lâ pathlie aw ta, cha hawhna chata o châta chatlaina taopa aw ta, o cha a vaw pathaih ha aw,” tah ta.

⁵⁴ Cha cha phawhpa hri chi to nata riatha kyh liata ryhpa a châ.

⁵⁵ Chysia liata phawhpa a ypa nata o liata a ypa,

⁵⁶ a byuhpa, riatha nata pabôpa zy kyh liata,

⁵⁷ pathaih leipa nata pathaihpa pahno nawpa ryhpa a châ. Cha cha phawhpa hri kyh liata ryhpa a châ.