THEIHTHAINA 13 - Mara Bible RV (BSI)

Phawhna kyh ryhpazy

¹ Abeipa ta Mawsi nata Arawna chho ta, ama hnohta,

² “Chyhsa ta a pôhpa vo thlohpa tlyma, hmahchaku tlyma, pakheihpa tlyma hnei sala, phawhpa hri a châ awpa hawhta a pôhpa vo liata â lâ khiahta cha, theihthaipa Arawna lâ tlyma, a sawchapawzy hry liata theihthaipa pakha lâ tlyma a chhi awpa a châ.

³ Theihthaipa ta a pôhpa vo liata hri cha moh aw ta, hri yna liata hmi cha pawh sala, hri yna cha a pôhpa vo hlâta a thu viapa ta â lâ khiahta cha, phawhpa hri châ ta, theihthaipa ta ano cha moh aw ta, chyhsa pathaih leipa a châ tahpa a phuah aw.

⁴ A pôhpa vo pakheihpa cha vaw râh ta, a vo hlâta a thu viapa ta a lâ leipa sala, a hmi a pawh leipa khiahta cha, hri ohtuhpa cha theihthaipa ta noh sari chhôh ânano ta a khawhlôh aw.

⁵ A noh sarina noh ta, theihthaipa ta moh heih aw ta, a hri cha a ualua ta hmô sala, a kawh via leipa khiahta cha, theihthaipa ta noh sari ânano ta a khawhlôh via chy aw.

⁶ A noh sarina noh ta, theihthaipa ta ano cha moh heih aw ta, pakheihpa cha lei laihpa ta, a vo liata a kawh laih leipa khiahta cha, theihthaipa ta ano cha pathaihpa ta a phuah aw. A hri ohpa cha riatha rakhapa châ ta, a chysiazy pasu aw ta, pathaihpa a châ aw.

⁷ Pathaisa awpa ta theihthaipa â pamosa khai tawhta, riatha cha a vo liata a kawh lymâ khiahta deikua cha, theihthaipa â pamosa heih awpa a châ.

⁸ Theihthaipa ta moh aw ta, riatha cha a vo liata a kawh lymâpa a hmô khiahta cha, theihthaipa ta ano cha pathaih leipa a châ tahpa a phuah aw. Cha cha phawhpa hri a châ.

⁹ “Chyhsa ta phawhpa hri a oh khiahta cha, theihthaipa lâ a chhi awpa a châ.

¹⁰ Theihthaipa ta moh aw ta, a vo thloh sala, cha chata a hmi papawhpa ta, a thlohpa liata a sapa â kaw palie khiahta cha,

¹¹ phawhpa hri pakâhpâpa a vo liata a ypa châ ta, theihthaipa ta ano cha pathaih leipa a châ tahpa a phuah aw. Pathaih leipa a châpa â lâ hapa vâta, ânano ta khawhlôh byuh aw vei.

¹² A vo râhpa cha kawh laih sala, theihthaipa hmô theipa rakha liata, hri ohtuhpa cha a vo zydua, a luh tawhta a phei taihta vo râhpa ta a bu khiahta cha,

¹³ theihthaipa ta moh aw ta, vo râhpa ta a pôhpa zydua a bu khiahta cha, hri ohtuhpa cha a pathaih tahpa a phuah aw. A pôhpa duata a râh khai hapa vâta pathaihpa a châ.

¹⁴ A sapa â kaw palie khiahta deikua cha, pathaih leipa a châ aw.

¹⁵ Theihthaipa ta sapa a paliepa cha moh aw ta, cha chyhsa cha pathaih leipa a châ tahpa a phuah aw. Sapa a paliepa cha pathaih leipa, phawhpa hri a châ.

¹⁶ Sapa a paliepa cha vaw pha ha sala, a vaw râh heih khiahta cha, theihthaipa lâ a pangai heih awpa a châ.

¹⁷ Theihthaipa ta ano cha moh aw ta, hri cha a râh khiahta cha, theihthaipa ta hri ohtuhpa cha a pathaih tahpa a phuah aw. A pathaih hapa a châ.

¹⁸ “Pôhpa vo liata kheihluh thla ta, tlâh ha ta,

¹⁹ kheihluh yna su liata a râhpa ta a thlohpa tlyma, a saih tôlôhpa ta a pakheihpa tlyma a y khiahta cha, theihthaipa pamosa awpa a châ.

²⁰ Theihthaipa ta moh aw ta, vo hlâta a thu viapa ta a lâpa ta, a hmi a pawh khiahta cha, theihthaipa ta ano cha pathaih leipa ta a phuah aw. Phawhpa hri châ ta, kheihluh liata a vaw puapa a châ.

²¹ Theihthaipa ta moh ta, hmi pawhpa y leipa sala, vo hlâta a thu via leipa ta, hmah cha a chawh laih khiahta cha, theihthaipa ta noh sari ânano ta a khawhlôh aw.

²² Hmah cha vo liata a kawh laih khiahta deikua cha, theihthaipa ta ano cha pathaih leipa ta a phuah aw. Cha cha hri chhiepa a châ.

²³ A saih tôlôhpa ta a pakheihpa cha, a yna ualua liata y sala, a kawh via leipa khiahta cha, kheihluh hmahdawpa dei châ ta, theihthaipa ta ano cha pathaihpa ta a phuah aw.

²⁴ “Pôhpa vo liata mei kâna y sala, mei kâna sapa a paliepa cha a saih tôlôhpa ta tlyma, a râhpa ta tlyma a pakheih khiahta cha,

²⁵ theihthaipa ta moh aw ta, a pakheihpa liata hmi cha pawh sala, vo hlâta a thu viapa ta â lâ khiahta cha, phawhpa châ ta, mei kâpa liata â vaw luahpa a châ. Theihthaipa ta ano cha pathaih leipa ta a phuah aw. Cha cha phawhpa hri a châ.

²⁶ Châhrasala theihthaipa ta moh ta, pakheihpa liata hmi pawhpa y leipa sala, mei kâna hmah cha vo hlâta a thu via leipa ta, a chawh ha khiahta cha, theihthaipa ta noh sari chhôh ânano ta a khawhlôh aw.

²⁷ Theihthaipa ta noh sarina noh ta moh aw ta, hmah cha vo liata a kawh lymâ khiahta cha, theihthaipa ta ano cha pathaih leipa ta a phuah aw. Cha cha phawhpa hri a châ.

²⁸ Pakheihpa cha a yna ualua liata ypa ta, vo liata kawh laih leipa sala, a chawh laih khiahta cha, mei kâna thlohpa châ ta, theihthaipa ta ano cha a pathaih tahpa a phuah aw. Cha cha mei kâpa hmahdawpa dei a châ.

²⁹ “Chapaw tlyma, chanô tlyma ta, a luh liata tlyma, a kâh liata tlyma hri a hnei khiahta cha,

³⁰ theihthaipa ta hri cha moh aw ta, vo hlâta a thu viapa ta a lâ sala, hmi di maihpa a y khiahta cha, theihthaipa ta ano cha pathaih leipa ta a phuah aw. Pathapa hri châ ta, luh nata kâh liata phawhpa hri a châ.

³¹ Theihthaipa ta pathapa hri cha moh aw ta, vo hlâta a thu via leipa ta a lâ sala, hmi vyhpa a y leipa khiahta cha, theihthaipa ta pathapa hri a hneituhpa cha noh sari chhôh ânano ta a khawhlôh aw.

³² A noh sarina noh ta, theihthaipa ta hri cha moh aw ta, pathapa hri cha kawh leipa sala, hmi maihpa y leipa ta, pathapa hri cha vo hlâta â thu via leipa khiahta cha,

³³ a kâhhmi a ngyu aw ta, pathapa hri yna hmi deikua cha a ngyu awpa châ vei. Theihthaipa ta pathapa hri a hneipa cha noh sari ânano ta a khawhlôh via aw.

³⁴ A noh sarina noh ta, theihthaipa ta pathapa hri cha moh heih aw ta, pathapa hri cha vo liata kawh leipa sala, vo hlâta a thu viapa ta â lâ leipa khiahta cha, theihthaipa ta ano cha pathaihpa ta a phuah aw. A chysiazy pasu aw ta, chatanachata a pathaih aw.

³⁵ Pathaisapa a châ khai tawhta, pathapa hri a vo liata a kawh laih khiahta cha,

³⁶ theihthaipa ta a moh heih awpa a châ. Pathapa hri cha vo liata a kawh laih khiahta cha, hmi maihpa a y ma tahpa theihthaipa ta a mo awpa byuh vei. Pathaih leipa a châ.

³⁷ Pathapa hri cha a yna ualua liata a ypa ta hmô sala, hmi vyhpa a kaw thao khiahta deikua cha, pathapa hri cha a tlâh hapa châ ta, a pathaih hapa a châ. Theihthaipa ta ano cha pathaihpa ta a phuah aw.

³⁸ “Chapaw tlyma, chanô tlyma, a pôhpa vo liata pakheihpa y sala, pakheihpa cha a râhpa a châ khiahta cha,

³⁹ theihthaipa ta moh aw ta, a pôhpa vo liata pakheihpa cha phiephuh râhpâh dei a châ khiahta cha, pakheih chakhyhpa vo liata a vaw puapa châ ta, ano cha a pathaih.

⁴⁰ “Chyhsa a sâ a py khai ha khiahta cha, luh pôlôpa châ ta, châhrasala pathaihpa a châ.

⁴¹ A khi sâ a py khai ha khiahta cha, khi tlyhpa châ ta, châhrasala pathaihpa a châ.

⁴² A luh pôlôpa liata tlyma, a khi tlyhpa liata tlyma, pakheihpa saih tôlôhpa a kaw pua khiahta cha, a luh pôlôpa liata tlyma, a khi tlyhpa liata tlyma phawhpa hri a vaw puapa a châ.

⁴³ Theihthaipa ta moh aw ta, a luh pôlôpa liata tlyma, a khi tlyhpa liata tlyma hri a kaw puapa cha, pôhpa vo liata phawhpa a vaw lâpa hawhta saih tôlôhpa ta a kaw pua khiahta cha,

⁴⁴ chyhsa phawhpa châ ta, pathaih leipa a châ. A luh liata a hri a ypa châ ta, theihthaipa ta ano cha pathaih leipa ta a phuah thlyu awpa a châ.

⁴⁵ “Phawhpa hri a ohpa cha chysia a hriepa a ky aw ta, a sâ pathliah aw ta, a hmao chô lâ khu aw ta, ‘Pathaih leipa, pathaih leipa,’ tahpa ta a awh awpa a châ.

⁴⁶ Hri a oh chhôh zydua pathaih leipa a châ. A pathaih leipa vâta, ânano ta y aw ta, a y nawpa su cha riehmo khôtho lâ a châ aw.

⁴⁷ “Sahmi chysia liata tlyma, pala rih dipa chysia liata tlyma, chysia liata phawhpa hri a kia khiahta cha,

⁴⁸ sahmi chysia nata pala rih dipa chysiazy sana thaitôh nata thaipheih liata zy, savo nata savo ta taopa hmobaoh liata zy,

⁴⁹ phawhpa hri y sala, cha hri cha chysia liata tlyma, savo liata tlyma, thaitôh liata tlyma, thaipheih liata tlyma, savo ta taopa hmobaoh liata tlyma, a rôh hrohpâpa ta tlyma, saihpâpa ta tlyma ta â vaw lâ khiahta cha, phawhpa hri châ ta, theihthaipa pamosa awpa a châ.

⁵⁰ Theihthaipa ta hri cha moh aw ta, hri kiapa hmo cha noh sari chhôh ânano ta a khawhlôh aw.

⁵¹ A noh sarina noh ta, hri cha moh aw ta, chysia liata tlyma, thaitôh liata tlyma, thaipheih liata tlyma, savo liata tlyma, savo cha kheihawhpa châ rai ta hmâpa a châpa chhao ta, a kawh lymâ khiahta cha, hri cha phawhpa hri a paka theipa châ ta, pathaih leipa a châ.

⁵² Chysia tlyma, sahmi pala tlyma, pala rih dipa tlyma, thaitôh tlyma, thaipheih tlyma, savo ta taopa hmobaoh kheihawhpa tlyma, phawhpa hri ta a kiapa maih cha, mei ta rao awpa a châ. Phawhpa hri cha a kawh theipa chi a châpa vâta, mei ta rao thlyu awpa a châ.

⁵³ “Theihthaipa ta moh aw ta, hri cha chysia liata tlyma, thaitôh liata tlyma, thaipheih liata tlyma, savo ta taopa hmobaoh liata tlyma, a kawh laih leipa khiahta cha,

⁵⁴ theihthaipa ta hri kiana hmo cha pasi awpa ta bie pie aw ta, noh sari ânano ta a khawhlôh via heih aw.

⁵⁵ Hri ta a kiapa hmo cha, pasi khaipa a châ tawhta, theihthaipa ta moh heih aw ta, phawhpa hri ta a chhôh lâ tlyma, a chô lâ tlyma rai kia ha sala, hri cha a kawh leipa chhao ta, a rôh â nano leipa khiahta cha, pathaih leipa châ ta, mei ta na rao awpa a châ.

⁵⁶ “Theihthaipa ta moh ta, hri yna cha pasi khaipa a châ tawhta, a rôh a lei khiahta cha, hri yna su cha chysia tawhta tlyma, savo tawhta tlyma, thaitôh tawhta tlyma, thaipheih tawhta tlyma a hrie pathlah awpa a châ.

⁵⁷ Hri cha chysia liata tlyma, thaitôh liata tlyma, thaipheih liata tlyma, savo ta taopa hmobaoh liata tlyma â vaw luah heih khiahta cha, a paka hapa châ ta, hri ta a kiapa hmo cha mei ta na rao awpa a châ.

⁵⁸ Chysia tlyma, thaitôh tlyma, thaipheih tlyma, savo ta taopa hmobaoh tlyma, na pasi khai tawhta hri ta a paisai khiahta cha, a einona ta pasi heih awpa châ ta, chatanachata a vaw pathaih aw.”

⁵⁹ “Cha cha sahmi chysia liata tlyma, pala rih dipa chysia liata tlyma, thaitôh liata tlyma, thaipheih liata tlyma, savo ta taopa hmobaoh liata tlyma, phawhpa hri a y tita, a pathaih nata pathaih lei phuah nawpa ryhpa a châ,” tah ta.