THEIHTHAINA 12 - Mara Bible RV (BSI)

Nawhkhutlô pathaisana

¹ Abeipa ta Mawsi hnohta,

² “Izarei sawzy chho la, ama hnohta hetana heta reih teh: Chanô ta saw phaoh sala, sawchapaw a sa khiahta cha, noh sari chhôh nawhkhutlô aw ta, chanô hnopasu daihti liata pathaih leipa hawhta pathaih leipa a châ aw.

³ A noh chariena noh ta, hawtipa cha a chopaw vo tai awpa a châ.

⁴ Noh sythôh nata noh thôh chhôh a sawsana thi lohpa tawhta pathaina tao awpa châ ta, pathaina noh â ki hlâlei cha, hmo pathaihpa a hria awpa châ leipa ta, supathaihpa liata â ngia awpa châ vei.

⁵ Sawchanô a sa khiahta cha, hnopasu daihti liata pathaih leipa hawhta, hâta ei no chhôh nawhkhutlô aw ta, noh sycharu nata noh charu chhôh a sawsana thi lohpa tawhta pathaina tao awpa a châ.

⁶ “Sawchapaw vâta tlyma, sawchanô vâta tlyma, â pathaina noh â ki nahta, raopa hlâna châta mietakutaw kô khapa nata moleina hlâna châta pivaw taw tlyma vachhuh tlyma, ahmaohna poh o chhikao liata theihthaipa lâta a cheih awpa a châ.

⁷ Theihthaipa ta Abeipa hmiakô liata hlâ aw ta, chatlaina taopa aw ta, chatanachata a thi lona tawhta a pathaih aw. Cha cha saw a sapa chanô, chapaw a sapa tlyma, chanô a sapa tlyma châta ryhpa a châ.

⁸ Mietakutaw a hnei thei leipa khiahta cha, vachhuh pô no tlyma, pivaw taw pô no tlyma cheih aw ta, pô kha cha raopa hlâna châta châ aw ta, ahropa cha moleina hlâna châta a châ aw. Theihthaipa ta chatlaina taopa aw ta, chatanachata a pathaih aw,” tah ta.