THEIHTHAINA 11 - Mara Bible RV (BSI)

Sa pathaihpa nata pathaih leipa

¹ Abeipa ta Mawsi nata Arawna chho ta, ama hnohta,

² “Izarei sawzy hetana heta chho teh u: Hezy he alei chô liata hrona a hneipa sa zydua hry tawhta nama nie thei awpazy a châ:

³ Sazy hry liata a chakie pachiah ta, a chakie miano ta â pachhaihpa ta, thie a chaeihpa maih nama nie thei aw.

⁴ Thie chaeihpa ta a chakie a pachhaih hra sala, hezy deikua cha nama nie awpa châ vei: Râraoseihpa cha a thie chaeih hra sala, a chakie â pachhaih leipa vâta, nama châta pathaih leipa a châ.

⁵ Tlâh pazupi chhao a thie chaeih ta, châhrasala a chakie â pachhaih leipa vâta nama châta pathaih leipa a châ.

⁶ Pazupi chhao a thie chaeih ta, châhrasala a chakie â pachhaih leipa vâta, nama châta pathaih leipa a châ.

⁷ Vao he a chakie cha pachiah ta, a chakie miano ta a pachhaih ta, châhrasala a thie a chaeih leipa vâta, nama châta pathaih leipa a châ.

⁸ A sa nama nie awpa châ leipa ta, a thiruapa chhao nama hria awpa châ vei. Nama châta pathaih leipa a châ.

⁹ “Ti liata a pahrâpa zydua hry liata hezy he nama nie thei aw. Tilaipi liata tlyma, chavah liata tlyma, ti liata a pahrâpa, mathlaw nata phuhlu a hneipa maih nama nie thei aw.

¹⁰ Tilaipi nata chavah liata a pahrâpa zydua nata ti liata hmohrohneipa a ypa zydua hry liata mathlaw nata phuhlu a hnei leipa maih cha, nama châta pasichhihpa a châ.

¹¹ Chazy cha nama châta pasichhihpa ta nama pachâ awpa châ ta, ama sa nama nie awpa châ leipa ta, a thiruapazy chhao nama pasi ngaita awpa a châ.

¹² Ti liata a ypa mathlaw nata phuhlu a hnei leipa maih nama châta pasichhihpa a châ.

¹³ “Pavaw hry liata, hezy he nama pasi ngaita awpa châ ta, nama nie awpa châ vei, pasichhihpa ama châ: Pahmôhpi, vâkhieh kâhhmi hneipa, tilaipi pahmôhpi,

¹⁴ hmôchhih, riarâtaoh chi to,

¹⁵ raawh chi to,

¹⁶ vawpô, valâtla, nârâ seihhaohpa, pahmôh chyhpa chi to,

¹⁷ vaku chyhpa, tyhphy nga a niepa, tutahlupa,

¹⁸ vaku râhpa, ti pavaw hmaotô laipa, vâkhieh sa thiruapa a niepa,

¹⁹ varâh keihseihpa, riasi chi to, nôpinô nata pazu tâbalâpa zy cha nama nie awpa châ vei.

²⁰ “Lôvâpa mathlaw hnei ta, phei palih ta a siepa zydua nama châta pasichhihpa a châ.

²¹ Mathlaw hnei ta, phei palih ta a siepa chi hry liata, alei liata a chapie nawpa ta ama phei chô lâta byhpi a pazaopa zydua deikua nama nie thei.

²² Khawsu chi to, khawsu hmi leipa chi to, chiacharipa chi to nata khawthlôhraihpa chi to chhao nama nie thei.

²³ Mathlaw ta a zaw ta, phei palih a hneipa lôvâ hropa zydua deikua, nama châta pasichhihpa a châ khai.

²⁴ “Hezy vâna heta pathaih leipa nama châ aw: Ahy rai sa pathaih leipa thiruapa a hriapa cha, zâlâ taih pathaih leipa a châ aw.

²⁵ Ahy rai cha hawhpa sa thiruapa a phaohpa cha, a chysiazy pasu aw ta, zâlâ taih pathaih leipa a châ aw.

²⁶ Sa a chakie pachiah ta, châhrasala a chakie miano ta a pachhaih leipa nata thie a chaeih leipa chi maih cha, nama châta pathaih leipa châ ta, ahy rai cha hawhpa sa thiruapa a hriapa cha pathaih leipa a châ aw.

²⁷ Phei palih ta a siepa sa hry liata phei pazah ta a siepa maih cha nama châta pathaih leipa châ ta, cha hawhpa sa thiruapa a hriapa cha zâlâ taih pathaih leipa a châ aw.

²⁸ Cha hawhpa sa thiruapa a phaohpa cha a chysiazy pasu aw ta, zâlâ taih pathaih leipa a châ aw. Chazy cha nama châta hmo pathaih leipa a châ.

²⁹ “Alei liata alyhpasa chizy hry liata, Zabih, siahloh, sawsâ chi to,

³⁰ taokieh, tisadâh, ohâpa, tlypahniapa nata kauapa zy cha nama châta a pathaih leipa a châ.

³¹ Chazy cha alyhpasa zydua hry liata nama châta pathaih leipazy châ ta, ahy rai cha hawhpa sa thiruapa a hriapa cha zâlâ taih pathaih leipa a châ aw.

³² Alyhpasa pathaih leipa thiruapa ta a tla thlupa hmobaoh chhao pathaih leipa a châ aw. Tho hmobaoh tlyma, chysia tlyma, savo tlyma, sykhao tlyma, kheihawhpa châta hmâpa hmobaoh rai châ sala, ti liata pachie awpa châ ta, zâlâ taih pathaih leipa a châ aw. Cha khai tawhta a pathaih aw.

³³ Alyhpasa thiruapa ta alei beih chhôh liata a tla khiahta cha, beih chhôh liata a ypa zydua pathaih leipa châ aw ta, beih cha nama pakei ha awpa a châ.

³⁴ Nie thei awpa niedo kheihawhpa rai, cha beih liata ti ta a hria hapa cha pathaih leipa a châ aw. Dopa chi zydua chhao, cha hawhpa beih chhôh liata a ypa cha pathaih leipa a châ aw.

³⁵ Hmo khâpa rai, cha hawhpa sa thiruapa ta a tla thlupa cha pathaih leipa a châ lymâ aw. Viahchhâ taona beih tlyma, beih kheihawhpa rai châ sala, a tlawh ta pakeichheih khai awpa a châ. Pathaih leipa châ ha ta, nama châta pathaih leipa a châ lymâ aw.

³⁶ Tihnawh tlyma, tikhaoh tlyma deikua cha, pathaih leipa ta y leipa aw ta, a chhôh liata alyhpasa thiruapa a hriapa deikua pathaih leipa a châ aw.

³⁷ Chikao chei awpa kheihawhpa rai, alyhpasa thiruapa ta a tla thlu khiahta cha, pathaih leipa châ aw vei.

³⁸ Alyhpasa thiruapa ta a tla thlupa chikao cha, ti liata pachie chiehpa a châ khiahta deikua cha, nama châta pathaih leipa a châ.

³⁹ “A sa nama nie theipa chi kheihawhpa tlyma thi sala, cha sa thiruapa a hriapa cha, zâlâ taih pathaih leipa a châ aw.

⁴⁰ Cha thiruapa sa a niepa cha, a chysiazy pasu aw ta, zâlâ taih pathaih leipa a châ aw. Sa thiruapa a phaohpa chhao, a chysiazy pasu aw ta, zâlâ taih pathaih leipa a châ aw.

⁴¹ “Alei chô liata alyhpasa chi zydua pasichhihpa châ ei ta, nie awpa châ vei.

⁴² A py ta a lyhpa chi tlyma, phei palih ta a siepa chi tlyma, phei hluhpi a hneipa chi tlyma, alei chô liata a lyhpa chi zydua cha pasichhihpa châ ei ta, nama nie awpa châ vei.

⁴³ Alyhpasa vâta nâmosasyh pasichhihpa ta namâ tao awpa châ leipa ta, âmo vâta nâmosasyh a papuapaleipa ta, pathaih leipa ta nama y awpa châ vei.

⁴⁴ Kei he Abeipa nama Khazohpa ei châ. Kei pathaih tlôh na ta, chavâta a pathai u la, pathaihpa ta y teh u. Alei chô liata alyhpasa kheihawhpa ta hmah namâ papuapalei awpa châ vei.

⁴⁵ Kei he nama Khazohpa châ awpa ta Izi râh tawhta châ kaw chhi papuatuhpa Abeipa ei châ. Kei pathaih tlôh na ta, chavâta nâmo chhao nama pathaih awpa a châ.

⁴⁶ “Chazy cha sa nata pavaw nata ti liata a pahrâpa hmohrohneipa to nata alei liata alyhpasa chi tozy kyh liata ryhpa a châ.

⁴⁷ Pathaihpa nata pathaih leipa panano awpa châ ta, hmohrohneipa nie theipa nata hmohrohneipa nie lei awpa chi chhao panano awpa a châ,” tah ta.