THEIHTHAINA 10 - Mara Bible RV (BSI)

Nâdâ nata Abihu moleina

¹ Arawna sawchapawpa Nâdâ nata Abihu ta ropahâhpa ama raona byh la chyu ei ta, a chhôh liata mei soh ei ta, ropahâhpa mia ei ta, Abeipa ta âmo bie a pie leipa mei hropa hmâpa ta Abeipa hmiakô liata hlâ ei ta.

² Abeipa tawhta mei vaw pua ta, âmo cha kâsao ta, Abeipa hmiakô liata thi ha ei ta.

³ Chatanachata Mawsi ta Arawna hnohta, “He he Abeipa ta, Nâ hniatuhpazy hry liata Pathaihpa ta a luah aw na ta, Chyhsa zydua hmiakô liata Palyupalihpa ta ei y aw, A tahpa kha a châ hih,” tah ta. Arawna cha a chalih thlâh ha ta.

⁴ Mawsi ta Arawna paw unawhpa Uzie sawchapaw Misela nata Elzaphâ aw ta, ama hnohta, “A vaw hnia u la, nama unawhzy he su pathaihpa tawhna heta a sy u la, riehmo khôtho lâ puakhei teh u,” tah ta.

⁵ Mawsi reipa hawhta a vaw hnia ei ta, ama viahkao ta âmo cha a sy ei ta, riehmo khôtho lâ ama puakhei haw.

⁶ Mawsi ta Arawna nata a sawchapaw Eliaza nata Ithamâ zy hnohta, “Nama sâ pathliah leipa u la, nama chysiazy hrie hra khuh vy. Chataleipatala thi aw ei chi ta, zawpi zydua chô liata Abeipa hiehâhna a vaw tlô pathlei aw na. Nama chiheih Izarei chhôhkha zydua deikua ta, Abeipa ta mei ta a pakâsao hapazy cha chakhei mawh ei sy.

⁷ Abeipa sathaw pathaihpa nama chô liata y ta, chavâta ahmaohna poh o chhikao tawhta nama pua awpa châ vei, chataleipatala nama thi pathlei aw na,” tah ta. Mawsi bie hawhna chata tao ei ta.

⁸ Abeipa ta Arawna hnohta,

⁹ “Nâ tlyma, na hnohta a ypa na sawchapawzy tlyma, ahmaohna poh o chhôh lâ namâ ngia tita, kresawhti tlyma, sahma thatlôpa tlyma nama doh awpa châ vei. Chataleipatala nama thi pathlei aw. Cha cha nama chhâ zydua châta chhâzaw ryhpa a châ aw.

¹⁰ Hmo ziehchhôhpa nata hmo vâtlâhpa panano aw ei chi ta, hmo pathaih leipa nata pathaihpa nama panano awpa a châ.

¹¹ Abeipa ta Mawsi hmâpa ta Izarei sawzy hnohta bieraopa a reipa zydua cha, âmo nama pachu lymâ awpa a châ,” tah ta.

¹² Chatawhcha Mawsi ta Arawna nata a sawchapaw a hrohpa Eliaza nata Ithamâ hnohta, “Abeipa lâta mei ta hmohlâpa niepa hlâna laibâhpazy la u la, hmo pathaih ngaitapa a châpa vâta, thinô pahlao leipa ta maisâh kiapâh liata nie teh u.

¹³ Abeipa lâta mei ta hmohlâpa tawhta nâ nata na sawchapawzy tovyuh a châpa vâta, su pathaihpa liata nama nie awpa a châ. Cha hawhta tao awpa ta biepiepa ei châ.

¹⁴ A palôh chaluahpa nata a phei chachâh lâ chalopa cha, nâ nata na hnohta a ypa na sawchapawzy nata sawchanôzy ta su pathaihpa liata nama nie aw. Cha cha Izarei sawzy châta aryhna hlâna atheihnazy tawhta, nâ nata na sawzy tovyuh châta raopazy a châ.

¹⁵ A phei chalo awpa nata a palôh chaluah awpazy cha, chaluahpa hlâna châta Abeipa hmiakô liata chaluahpa a châ thei nawpa ta, mei ta hlâ awpa a thawzy chhaota ama vaw cheih aw. Abeipa biepiepa hawhta, cha cha nâ nata na sawchapawzy châta chhâzaw ta nama tovyuh a châ aw,” tah ta.

¹⁶ Mawsi ta moleina hlâna châta hlâpa mie thâtih cha pakhâta ta patluah ta, rao hapa a châpa pahno ta. Chavâta Arawna sawchapaw a hrohpa Eliaza nata Ithamâ chô liata a hiehâh kaw ta, ama hnohta,

¹⁷ “Khazia moleina hlâna sa cha, supathaihpa su liata nama nie vei? Cha cha hmo pathaih ngaitapa châ ta, zawpi thaileichâna phaoh ta, Khazohpa hmiakô liata âmo châta chatlaina tao nawpa ta nama hnohta piepa châ vei ma?

¹⁸ Ei biepiepa hawhta, supathaihpa chhôh liata nama nie tlai awpa châ ta, châhrasala supathaihpa chhôh lâ a thisaih a ngiakhei veih ei chi,” tah ta.

¹⁹ Arawna ta Mawsi hnohta, “Pachâ teh, tanoh he ama moleina hlâna nata ama raopa hlâna Abeipa hmiakô liata hlâ ei ta, cha nota, kha hawhpa hmo kha ei chô liata vaw tlô ta, chavâta tanoh he moleina hlâna nie aw sah la, Abeipa mohmô ta hmo phapa a châ aw ma?” tah ta.

²⁰ Cha bie cha a thei nahta Mawsi cha a palôh tlâh ha ta.