RYUREITUHPAZY 9 - Mara Bible RV (BSI)

Abimele ryureina

¹ Zerubâlâ sawchapawpa Abimele cha a nô chhôhkhazy yna Sekhe lâ sie ta, a nô chhôhkhazy nata a nô phoheih zydua hnohta,

² “Sekhe khih nôpaw zydua nah theina liata reih u la, ‘Nama châta kheihawhpa ma a pha via aw, Zerubâlâ sawchapaw sysaripa zydua ta nama chô liata ryu ama reih awpa ma, mopakha ta nama chô liata ryu a reih awpa maw?’ tah tua muh vy. Kei he nama rupa nata nama sapa ei châpa chhao a thei muh vy,” tah ta.

³ A nô chhôhkhazy ta Sekhe khih nôpaw zydua nah theina liata, cha bie zydua cha ano vyuhpa ta reih lymâ ei ta. Chatanachata ama palôhzy cha Abimele pazi khona lâta tliah ha ta, “Ano cha eima unawhpa mah a châ tâh,” tah ei ta.

⁴ Bâlâberi achhyna o liata a ypa tâkâ tlaw sysari Abimele pie ei ta. Abimele ta cha tâkâ cha hmâpa ta, chyhsa dyutlaileipa nata chhorupazy hrua ta, chazy chata ano cha pazi ei ta.

⁵ Ôpharâ khih liata a paw o lâ vawh ta, a unawh sysari, Zerubâlâ sawchapawzy cha lôpanô miakha chô liata thie khai ta. Zerubâlâ sawchapaw seihnai chaipa Zôthâ deikua cha, â nyu hapa vâta pahlôhpa a châ.

⁶ Chatawhcha Sekhe khih nôpaw zydua nata Bemilô khih nôpaw zydua a pahmaoh ei ta, vawh ei ta, Abimele cha Sekhe lôbô kiapâh ta ôkâ tho ry liata bei ta tao ei ta.

⁷ Cha cha Zôthâ ama chho nahta, khy ta Kerizi Tlâh laki liata a kaw duah ta, ao paro ngaitapa ta awh ta, ama hnohta, “Nâmo, Sekhe khih nôpawzy saih u, ei bie reipa he nathlie u la, Khazohpa ta a cha nathlie hra aw ei.

⁸ Ei kha cha thozy ta ama bei sathawthu awpa ta pua ei ta, ôli tho hnohta, ‘Eima bei châ mah y,’ tah ei ta.

⁹ Châhrasala ôli tho ta ama hnohta, ‘khazohzy nata chyhsazy palyupalihna châta hmâpa ei thaw he siesaipa ta vawh aw na ta ma, thozy chô liata zua ei kei chaneichanâ aw?’ tah ha ta.

¹⁰ Chatawhcha thozy ta theiku kô hnohta, ‘A vy la, eima bei vaw châ teh,’ tah ei ta.

¹¹ Châhrasala theiku kô ta ama hnohta, ‘Ei thlôhna nata ei theilâ phapa he siesaipa ta vawh aw na ta ma, thozy chô liata zua ei kei chaneichanâ aw?’ tah ha ta.

¹² Chatawhcha thozy ta kre zôh hnohta, ‘A vy la, eima bei vaw châ teh’ tah ei ta.

¹³ Kre zôh ta ama hnohta, ‘khazohzy nata chyhsazy a palysatuhpa ei kresawhti he siesaipa ta vawh aw na ta ma, thozy chô liata zua ei kei chaneichanâ aw?’ tah ha ta.

¹⁴ Chatawhcha tho zydua ta ahloh buh hnohta ‘A vy la, eima bei vaw châ teh’ tah ei ta.

¹⁵ Ahloh buh ta thozy hnohta, ‘Palôh hmeiseihpa ta nama bei châta sathaw eina thu tlai khiah ei chi ta cha, a vy u la, ei nohdi liata a vaw pahâ teh u. Cha hawhta a châ vei khiahta deikua cha, ahloh buh tawhta mei vaw pua sala, Lebanaw sidy thozy cha kâ khai mawh sy,’ tah ta.

¹⁶ “Chavâta tahmâ Abimele bei ta nama taopa he palôh hmeiseihpa nata sia ngaitapa ta a taopa châ u la, Zerubâlâ nata a chhôhkhazy chô liata a phapa ta taopa ta, a hmotaopa nata â phuhpa ta a chô liata nama taopa a châ khiahta cha, a pha.

¹⁷ Ei paw ta chariah châ dyuhpa ei ta, a hrona sokhâhpa ta Midia ku tawhta a cha pachha ei.

¹⁸ Châhrasala tanoh ei paw chhôhkhazy cha thyuhnao ei chi ta, a sawchapaw sysari po lôpanô miakha chô liata thie ei chi ta, a seichanô sawchapawpa Abimele cha Sekhe nôpawzy chô liata bei ta nama tao. Nama unawhpa a châpa vâta cha hawhta nama taopa a châ.

¹⁹ Tanoh he Zerubâlâ nata a chhôhkha­zy chô liata palôh hmeiseihpa nata sia ngaitapa ta a taopa nama châ khiahta cha, Abimele chô liata a ly teh u, ano chhao nama chô liata a ly mawh sy.

²⁰ Cha hawhta a châ vei khiahta deikua cha, Abimele tawhta mei vaw pua sala, Sekhe nata Bemilô khih nôpawzy kâsao khai mawh sy. Sekhe nata Bemilô khih nôpawzy tawhta mei vaw pua sala, Abimele kâsao mawh sy,” tah ta.

²¹ Chatawhcha Zôthâ cha a unawhpa Abimele a chipa vâta Berâ khih lâ a râ ta, cha liata pahrâ ta.

Abimele paona

²² Abimele cha Izarei chô liata kô thôh ryureih ta.

²³ Khazohpa ta Abimele nata Sekhe khih nôpawzy likah liata thlahpa chhiepa vaw tuah ta. Sekhe khih nôpawzy ta Abimele chô liata piehpie ngaitapa ta hmo tao ei ta.

²⁴ Cha hmo cha Zerubâlâ sawchapaw sysarizy chô liata nôchhie ngaitapa ta ama taopa kha âmo chô liata palie thlusapa ta, ama thisaih maoh cha âmo a thietuhpa ama unawhpa Abimele chô liata paphaosa ta, a unawhzy thie awpa ta a ku tha a patlôtuhpa Sekhe mo chô liata chhao paphaosapa ta a y thei nawpa ta taopa a châ.

²⁵ Chatanachata Sekhe khih nôpawzy ta arulâta Abimele a byh awpa ta tlâh lakizy liata chyhsazy soh ei ta. Cha lâpi lâ tawhta âmo a vaw chapiapa maih ama hrao lymâ. Cha kyh cha Abimele chhopa châ ta.

²⁶ Ebe sawchapawpa Kalâ cha a unawhzy chhaota vaw thyu ta, Sekhe lâ sie ei ta. Sekhe khih nôpawzy ta ano cha ngâ kaw ei ta.

²⁷ Lyu lâ sie ei ta, ama kre sadôzy liata kre theizy lyu ei ta, tly ei ta. Kyhchhi tao ei ta, ama khazoh o liata a ngiapa ta, niedoh ei ta, Abimele cha reipachhie ei ta.

²⁸ Ebe sawchapawpa Kalâ ta, “Abimele cha ahy ma châ ta, keimo Sekhe mo pi he ahyzy ma eima châ tly? Khazia ano cha zua eima chakao aw? Ano cha Zerubâlâ sawchapawpa tlâ châ vei ma? Zebula chhao he ano ta hyutuhpa ta a taopa châ vei ma? Sekhe paw Hamô chyhsazy chakao hri teh u. Khazia ano cha eima chakao aw?

²⁹ He chyhsazy he ei ku ry liata a ypa châ ei sala ei tah kaw dia! Abimele he ei pabâh ha awpa tlai! Abimele hnohta, ‘Na pheisaih pakhy via la vaw thyu teh,’ ei tah awpa tlai,” tah ta.

³⁰ Khihpi ryureituhpa Zebula ta Ebe sawchapawpa Kalâ bie reipa cha a thei nahta, a hiehâh ngaita ta.

³¹ Zikyurâtuhpazy Abimele lâ arulâta tuah ta, a hnohta, “Pachâ teh, Ebe sawchapawpa Kalâ nata a unawhzy Sekhe lâ a vy ei ta, châ dyuh awpa ta khihpi ama pasyu.

³² Chavâta nâ nata na hnohta a ypa chyhsazy azo ta thyu u la, lyu liata a byh teh u.

³³ My noh a vaw chhipa nahta, thyu patoh aw chi ta, khihpi he na vaw siehnao aw. Ano nata a hnohta a ypa chyhsazy châ dyuh awpa ta vaw pua aw ei ta, na ku ta tao awpa a hmôpa lymâ hawhta ama chô liata vaw tao mah y,” tah ta.

³⁴ Abimele nata a hnohta a ypa chyhsazy cha azo ta thyu ei ta, py palih ta a pachhaihpa ta Sekhe khih kiapâh liata a nyu ei ta.

³⁵ Ebe sawchapawpa Kalâ cha kei pua ta, khihpi angiana thokhy chhikao liata a kei duah ta. Abimele nata a hnohta a ypa chyhsazy cha amâ nyuna su tawhta kaw thyu ei ta.

³⁶ Kalâ ta chyhsazy cha a hmô nahta, Zebula hnohta, “Moh tua, tlâh laki tawhta chyhsazy amâ zu khi,” tah ta. Zebula ta a hnohta, “Tlâhzy nohpahlipa hao na chyhsapazy hawhta na hmôpa a châ aw,” tah ta.

³⁷ Kalâ ta, “Moh châh chi, râh liah khophie tawhta chyhsazy amâ zu hao zaw. Py khapa chhochhi cha Môneni ôkâ tho lâpi lâ tawhta amâ vy huh,” tah ta.

³⁸ Zebula ta a hnohta, “Abimele cha ahy ma a châ tly? Khazia ano cha eima chakao aw, na tah vei ma kha? Tahmâ he na pakah khataih lâ a vaw haw? Âmo cha na mohnao kawpa phopi kha châ veih ei ma? Tahmâ pua la, a kei dyuh châh chi,” tah ta.

³⁹ Kalâ cha pua ta, Sekhe nôpawzy hmia lâta sie ta, Abimele cha a kei dyuh ta.

⁴⁰ Abimele ta a vaw chadai ta, Kalâ cha a râ ta. Khihpi angiana chhikao tlôna taihta chyhsa hluhpi hmah phaopa ta pao ei ta.

⁴¹ Abimele cha Arumâ khih liata pahrâ ta. Zebula ta Kalâ nata a unawhzy cha Sekhe khih liata y thei lei awpa ta a papua khai ha ei.

⁴² A mylâ ta, chyhsazy cha lyu lâ sie ei ta. Cha cha Abimele chho ei ta.

⁴³ A chyhsazy a chhi ta, py thôh ta pachhaihpa ta, lyuzy liana cha a byh ei ta. Abimele cha mohmia pasaih ta, chyhsazy khihpi tawhta ama vaw puapa hmô ta. Thyu ta, âmo cha a dyuh ta, thie ta.

⁴⁴ Abimele nata a hnohta a ypa py cha hmia lâ a râ ei ta, khihpi angiana thokhy chhikao liata a kei duah ei ta. Cha nota, py nopazy ta lyu liata a ypa zydua a râhnao ei ta, thie ei ta.

⁴⁵ Cha noh ta, Abimele ta khihpi cha noh y ta a dyuh ta. Khihpi cha la ta, a khihsawzy thie ta. Khihpi cha tlokhuh parao ta, alôh a hie thlu haw.

⁴⁶ Sekhe o sâhpa liata a ypa chhituhpa zydua ta, cha kyh cha ama thei nahta, Elberi achhyna o thokhy chhôh lâ a ngia ei ta.

⁴⁷ Chhituhpa zydua Sekhe o sâhpa liata ama y pakhypa kyh Abimele chho ei ta.

⁴⁸ Abimele nata a hnohta a ypa chyhsa zydua Zalmaw Tlâh lâ kiah ei ta. Abimele cha ahrei a chei ta, thopahrei ty kha pakhy ta, chalo ta a ngiatlâh ta a pia ta. A hnohta a ypa chyhsazy hnohta, “Ei taozie he hmô ei chi ta, ei taopa hawhna heta nâmo chhao tao para teh u,” tah ta.

⁴⁹ Cha hawhna chata ama zydua ta thopahrei pakhy chyu ei ta. Abimele cha pazi ei ta, thokhy cha thopahrei pacho thlu ei ta. Thokhy chhôh liata a ypazy cha ama chô lâ tawhta mei ta rao thlu ei ta. Sekhe o sâhpa liata chyhsa zydua thi khai ei ta, chapaw nata chanô sâh kha rachhôh ama châ.

⁵⁰ Chatawhcha Abimele cha Thebe lâ sie ta, Thebe khihpi cha dôh ta, la ta.

⁵¹ Khihpi chhôh liata o sâhpa a icha kawpa y ta. Khihpi liata chapaw nata chanô zydua nata khih nôpawpa zydua ta cha lâ cha a râ ei ta. A khawhlôh ei ta, o sâhpa vâphuh lâ kiah ei ta.

⁵² Abimele cha o sâhpa lâ vawh ta, a dyuh ta, mei ta rao awpa ta o sâhpa chhikao a kei hnia ta.

⁵³ Chanô pakha ta sâh chariehna lô Abimele luh liata za pathla thlu ta, a luh rupa kei ha ta.

⁵⁴ A chariah chhaichhi chabatuhpa satliapa aw para ta, a hnohta, “Na zaozi kha phia la na vaw thie teh, chyhsa ta, ‘Chanô ta na a thie,’ eina tah pathlei aw ei na,” tah ta. Satliapa ta Abimele cha zaozi a puapahliena taihta vieh ta, thi ha ta.

⁵⁵ Izarei chyhsazy ta Abimele a thi haw tahpa ama pahno nahta, ama zydua ta ama o lâ chyu a di ha ei ta.

⁵⁶ Abimele ta a unawh sysarizy thie ta, a paw chô liata a hmotaopa moleina kha, Khazohpa ta cha hawhna chata viari a thô hapa a châ.

⁵⁷ Sekhe chyhsazy moleina zydua chhao, Khazohpa ta viari thôpa ta ama luh chô liata palie thlusa ta, Zerubâlâ sawchapawpa Zôthâ chhiesana ama chô liata a vaw tlô hapa a châ.