Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

RYUREITUHPAZY 8 - Mara Bible RV (BSI)


Kidia ta Midia a pahnie

1 Chatawhcha Epharai mo ta Kidia hnohta, “Khazia he hawhta eima chô liata na tao? Midia mo a dyuh awpa ta na sie nona kha khazia miah na hrua hra vei?” tah ei ta. Thata maochhie ei ta.

2 Kidia ta ama hnohta, “Nâmo hlâta khâpa ma ei tao via hlei? Epharai mo kre thei kâmo thohpa rakhapa hmahta Abieze mo kre thei lyupa zydua hlâta hluh via vei ma?

3 Khazohpa ta Midia bei Ôrebâ nata Zibâ zy nama ku liata cha pie ei ta, nâmo hlâta khâpa ma ei tao thei via hlei?” tah ta. Cha biezy a rei nahta, a chô liata ama hiehâhna dia ha ta.

4 Kidia nata a hnohta chyhsa 300 a ypazy cha Zawdâh chaka ei ta, ama thachhâ kaw ta. Châhrasala ama chariahzy cha a chadai lymâ ei ta.

5 Kidia ta Sukô mo hnohta, “Ngiachhiepa ta nâ zipa chyhsazy he viahchhâ tlâzy pie teh u, ama tha a chhâ ngaita hih. Midia bei Zebâ nata Zalmunâ ei chadai ei,” tah ta.

6 Châhrasala Sukô khih nôpawzy ta, “Khazia na pheisaihzy cha viahchhâ eima pie aw? Zebâ nata Zalmunâ cha na ku liata ama y ha ma?” tah ei ta.

7 Kidia ta, “A pha, Abeipa ta Zebâ nata Zalmunâ ei ku liata eina pie tita, râhchawhpa ahloh nata ahloh buhzy ta nama sapa ei cha hriechheih khai aw ei!” tah ta.

8 Cha tawhna chata Penia lâ sie ta, Sukô liata a reipa hawhta ama hnohta reih heih ta, Penia mo chhao ta Sukô mo achhyna hawh pyly ta a chhy ei ta.

9 Kidia ta Penia mo hnohta, “Thlalôhpa ta ei vaw lie tita, he o sâhpa he ei pacho aw,” tah ta.

10 Zebâ nata Zalmunâ cha, nochhi chyhsa pheisaih a thi bâhpa 15,000 chhaota Kakô liata y ei ta. Zaozi a chabapa pheisaih sai ta 120,000 ama thi hapa a châ.

11 Kidia cha Nôbâ nata Zôbehâ nochhi lâta poh o liata a pahrâpazy lâpi lâta khy ta, pheisaihzy cha a kaw dyuh ta. Pheisaihzy cha thlalôhpa ta vaw y thlâh ha ei ta.

12 Zebâ nata Zalmunâ cha a râ ei ta. Kidia ta âmo cha a chadai ta, Midia bei pano Zebâ nata Zalmunâ cha patu ta. Kidia ta Midia pheisaih zydua cha thata chalyusa ta.

13 Chatawhcha Zôasâ sawchapawpa Kidia cha adyuhna tawhta Here chakhâ lâpi lâta a vaw lie ta.

14 Sukô satlia pakha patu ta, bie hiahri ta. Satlia chata Sukô khih liata hyutuhpa nata machâ sysari nata pasari mohzy ropa ta.

15 Kidia cha Sukô mo lâ khy ta, ama hnohta, “Zebâ nata Zalmunâ he moh teh u, âmo kyh liata na pasipasawh ei chi ta, ‘Khazia na chyhsa thachhâpazy cha viahchhâ eima pie aw? Zebâ nata Zalmunâ cha na ku liata ama y ha ma?’ nama tahpazy kha ama châ hih,” tah ta.

16 Khihpi machâzy cha patu ta, râhchawhpa ahloh nata ahloh buhzy ta chheipa ta Sukô mo cha hrie ta.

17 Penia o sâhpa pacho ta, khihpi liata chyhsazy thie ta.

18 Chatawhcha Zebâ nata Zalmunâ hnohta, “Tabaw liata chyhsa nama thiepazy kha kheihawhpa chyhsazy ma ama châ?” tah ta. Âmo ta, “Nâma hawhpa he ama châ, abei saw lyuna ama hnei chyu,” tah ei ta.

19 Kidia ta, “Âmo kha ei unawh, ei nô sawchapawzy ama châ khawh. Abeipa hrona reipa ta ei reih, âmo kha vaw pahlôh ha u la cha, nâmo chhao ei cha thie lei awpa ei tlai,” tah ta.

20 A sawchapaw uhtheipa Zethe hnohta, “Thyu la, he chyhsazy he thie teh,” tah ta. Châhrasala satliapa dei a châ chypa vâta chi ta, a zaozi phia ngâh leipa ta.

21 Zebâ nata Zalmunâ ta, “Nâma tlai kha thyu la, miah vaw thie teh, chapawsaw thatlôpa na châ khawh,” tah ei ta. Kidia cha thyu ta, Zebâ nata Zalmunâ cha thie ta, ama râraoseihpazy rao liata tobina raopakyzy la ta.


Kidia hmotaopazy

22 Chatawhcha Izarei chyhsazy ta Kidia hnohta, “Eima chô liata ryureih mah y. Nâ nata na sawchapawpa nata na samohpa taihta ryureih lymâ teh u. Midia mo ku tawhta miah na pachha ha hih,” tah ei ta.

23 Kidia ta ama hnohta, “Kei ta nama chô liata ryureih leipa aw na ta, ei sawchapawpa chhao ta nama chô liata ryureih hra aw vei. Abeipa ta nama chô liata ryu tlao a reih aw,” tah ta.

24 Kidia ta ama hnohta, “Hmo miakha deikua ei châ haw khoh ei. Hraona hmo nama lapa tawhta rahyzy kha nama zydua ta na vaw pie teh u,” tah ta. Chariah ama hraopazy cha Ismela mo ama châpa vâta, ngôh rahy a hneipazy ama châ.

25 Âmo ta, “A ly kawpa ta eima cha pie aw,” tah ei ta. Poh phaw ei ta, chyhsa to ta rahy ama hraopazy cha vaw soh ei ta.

26 Kidia hnohta ngôh rahy ama piepa zydua cha sekel 1,700 a châ. Chazy hleikhô ta, raopakyzy, rahy bangiehpazy, Midia beizy a kypa chysia saihlawpazy nata ama râraoseihpa raopakyzy chhao â hlao.

27 Chatawhcha Kidia ta ngôh ta ephaw tao ta, ano khihpi Ôpharâ liata soh ta. Cha nothlahpa liana cha Izarei zydua ta sihryh ei ta, cha hmo cha Kidia nata a chhôhkha châta khoheih lâta â lie haw.

28 Midia cha Izarei sawzy hmiakô liata pahniepa ta y ta, ama luh pachhua thei khao veih ei. Chatanachata Kidia hro chhôh ta, râh cha kô sypalih chhôh thlalôhpa ta a y.


Kidia thina

29 Zôasâ sawchapawpa Zerubâlâ cha sie ta, ano o liata kei pahrâ ta.

30 Kidia cha lapinô hluhpi a hneipa vâta, ano kalachhôh tawhta a puapa tlai sawchapaw sysari hnei ta.

31 Sekhe khih liata a nôtho chhao ta sawchapaw sapa hra ta, a moh Abimele a bi.

32 Zôasâ sawchapawpa Kidia cha chhâ palopa ta thi ta, Abieze mo khih Ôpharâ liata a paw Zôasâ thlâ liata ama pabu.

33 Kidia a thipa nahta, Izarei sawzy ta Abeipa cha tleisai heih ei ta. Bâlâzy liata sihryhpa ta, Bâlâberi cha ama khazoh ta tao ei ta.

34 Su to liata ama chariahzy ku tawhta âmo pachhatuhpa Abeipa ama Khazohpa cha Izarei sawzy ta a thei khao veih ei.

35 Zerubâlâ, Kidia ama tahpa khata, Izarei sawzy châta hmo phapa hluhpi vaw tao ta, châhrasala a chhôhkha chô liata phana ama palâsa awpa hawhta palâsa khao veih ei.

The Bible Society of India

© 2023, Used by permission. All rights reserved.

Bible Society of India
ကြှနျုပျတို့နောကျလိုကျပါ:



ကြော်ငြာတွေ