RYUREITUHPAZY 7 - Mara Bible RV (BSI)

Kidia ta Midia mo a pahnie

¹ Zerubâlâ ama tahpa Kidia nata a hnohta a ypa zydua cha thyu patoh ei ta, Hârôdi chavah kiapâh liata a rie ei ta. Midia mo riehmo cha ama yna tawhta maw lâ Mawre tlâh kiapâh saikao liata y ta.

² Abeipa ta Kidia hnohta, “Na hnohta a ypa chyhsazy kha ama ku liata Midia mo ei pie nawpa ta ama hluh tu haw. Chataleipatala Izarei ta, ‘Keima ku ta eina pachha’ tahpa ta einâ palai thlu pathlei aw.

³ Chavâta zawpi nah theina liata phuah la, ‘Ahy rai a chipa nata a chalyupa maih cha o lâ kua sala, Kilia tlâh tawhna heta a chatliepa ta sie mawh sy,’ tahpa ta reih teh,” tah ta. Zawpi hry tawhta 22,000 kua ei ta, 10,000 amâ ngua.

⁴ Abeipa ta Kidia hnohta, “Chyhsa ama hluh tu thlâh chy. Zawpizy kha chavah lâ zukhei la, cha liata kei ta ei cha pasiapa aw. ‘He chyhsa he na hnohta a sie aw,’ ei tahpa deita na hnohta sie aw ta, ‘He chyhsa he cha na hnohta sie aw vei,’ ei tahpa cha sie aw vei,” tah ta.

⁵ Chatanachata zawpizy cha chavah lâ zukhei ta. Abeipa ta Kiadia hnohta, “I hawhta a paleih ta ti a paliepa maih panano lymâ la, cha hawhna chata a pakhu paneih ta ti a dohpa maih panano hra teh” tah ta.

⁶ Ama ku ta ti li ei ta, a paliepa cha chyhsa 300 châ ei ta, ahropa zydua cha pakhu paneihpa ta ti a sypa ama châ.

⁷ Abeipa ta Kidia hnohta, “Ti a paliepa chyhsa 300 hmâpa ta cha pachha aw ei na ta, na ku liata Midia mo ei cha pie aw. Ahropa zydua cha ama o lâ chyu padisa khai teh,” tah ta.

⁸ Chatanachata Kidia ta chyhsa 300 pangua ta, Izarei chyhsa hropa zydua cha ama poh o lâ padisa khai ta. Chyhsa 300 chata zawpizy niedo nata chiahmiezy la ei ta. Midia mo riehmo cha ama nohdi saikao liata y ta.

⁹ Cha zâ ta Abeipa ta Kidia hnohta,“Thyu la, Midia mo riehmo za chho teh. Na ku liata ei cha pie haw.

¹⁰ Za chho awpa na chi khiahta deikua cha, châ chakaotuhpa Purâ kha a chhi la riehmo lâ cha zu mah y.

¹¹ Ama biereipa thei aw chi ta, cha khai tawhta cha na ku thapatlôpa ta y aw ta, riehmo cha na za chho ngâh aw,” tah ta. Chatanachata Kidia cha a chakaotuhpa Purâ a chhi ta, pheisaihzy riehmo tytua chaipa lâ zu ta.

¹² Midia mo, Amale mo nata nochhi chyhsa zydua cha khawsu hawh tlai ta hluhpa ta saikao liata vaw y ei ta. Ama râraoseihpazy cha rei tiah awpa châ leipa ta, tilaipi ngiahkâ liata sadi hawh tlai ta ama hluh.

¹³ Kidia a za tlô daihti cha, chyhsa pakha ta a viasa hnohta a mâ a vaw chho hai no châ ta. Cha chyhsa chata, “Pachâ tua, mâ sa na ta, bâli viahchhâ tlâ tlai cha Midia mo riehmo lâ he a zâ hluah lymâ ta, poh o za su ta, â theih lâta papao ta, poh o cha alei liata â chahyh thlâh haw,” tah ta.

¹⁴ A viasapa ta a chhy ta, “Cha cha hmo hropa châ vei. Izarei chyhsa Zôasâ sawchapawpa Kidia zaozi a châ chuh. Khazohpa ta Midia mo nata riehmo zydua he a ku liata a pie ha chuh,” tah ta.

¹⁵ Kidia ta mâ nata a chhopasiana cha a thei nahta, Khazohpa a chhy ta. Izarei riehmo lâ a lie ta, “Thyu teh u, Abeipa ta Midia pheisaihzy cha nama ku liata a cha pie ha ei,” tah ta.

¹⁶ A pheisaih 300 cha py thôh ta pachhaih ta, ama zydua ta chiahmie nata râchâ ruapazy chabasa chyu ta, râchâzy chhôh liata meirei soh ta.

¹⁷ Ama hnohta, “Na moh u la, ei taopa hawhta tao lymâ hra muh vy. Riehmo tytua chaipa ei tlô nahta, ei taopa hawhta tao hra muh vy.

¹⁸ Kei nata ei hnohta a ypazy ta chiahmie eima tô nahta, riehmo su toti tawhta chiahmie vaw tô hra aw ei chi ta, ‘Abeipa nata Kidia châta’ tahpa ta nama vaw awh aw,” tah ta.

¹⁹ Kidia nata a hnohta a ypa chyhsa zakha cha, zâ riahvaina chhâh nona â thaona, riah ama vai pathao daihti liata riehmo tytuapa cha tlô ei ta. Chiahmie tô ei ta, râchâ ama chabapazy cha pakei ei ta.

²⁰ Py thôh ta chiahmie tô ei ta, râchâzy pakei ei ta. Ama chavei lâta meirei chaba ei ta, ama chachâh lâta chiahmie tô awpa chaba ei ta. “Abeipa nata Kidia Zaozi!” tahpa ta awh ei ta.

²¹ Chyhsa to riehmo chadôpa ta amâ duana su chyu liata a duah ei ta. Midia pheisaih zydua cha a râpai ei ta. Chipa ta awsâh laihna chôta a râ ei ta.

²² Kidia pheisaihzy ta chiahmie 300 ama tô nahta, Abeipa ta Midia pheisaih zydua cha âmo nata âmo pathyuhnaosa ta, zaozi ta a chhawh chaimâh ei ta. Zererâ lâchhâh ta a ypa Besitâ taihta a râpaipa ta, Tâbâ kiapâh ta a ypa Abemehôlâ râhri taihta a râpai ei ta.

²³ Izarei sawzy cha Nâthalai, Asera nata Manase chizy tawhta awpakhy ei ta, Midia mo cha a chadai ei ta.

²⁴ Kidia ta Epharai tlâh râh zydua lâ zikyu parâsa ta, ama hnohta, “Midia mo a zâ dyuh u la, Bebârâ taihta ti yna zydua la u la, Zawdâh chavah chhao la teh u,” tah ta. Chatanachata Epharai pathla zydua cha a hmaohpakhy ei ta, Bebârâ taihta ti yna zydua la ei ta, Zawdâh chavah chhao la ei ta.

²⁵ Midia bei pano Ôrebâ nata Zibâ zy patu ei ta. Ôrebâ cha Ôrebâ lôpanô liata thie ei ta, Zibâ cha Zibâ kre saohna liata ama thie haw. Midia mo cha a chadai lymâ ei ta, Ôrebâ nata Zibâ luh cha Kidia yna Zawdâh haosâ lâ vaw phaoh ei ta.