RYUREITUHPAZY 4 - Mara Bible RV (BSI)

Debawrâ nata Bâraka

¹ Ehu a thi tawhta Izarei sawzy cha Abeipa mohmô ta moleina hmo tao heih ei ta.

² Chavâta Abeipa ta âmo cha Hâzaw liata ryu a reihpa Kâna bei Zabi hnohta a zuah ha ei. Zabi pheisaihzy hyutuhpa cha Hârôse Hâkôi liata a pahrâpa Siserâ a châ.

³ Zabi cha thua talailih 900 hnei ta, Izarei sawzy cha kô kih tlai tlybaipa ta ama rie thata a pathei. Chavâta Izarei sawzy ta Abeipa pado ei ta.

⁴ Cha daihti liata Izarei ryureituhpa cha Lapidô lapinô hrohsonô Debawrâ a châ.

⁵ Debawrâ cha Epharai tlâh râh liata Râmâ nata Bethel likawh ta thiahrâ kô ry liata a tyuh tyh ta. Izarei sawzy ta ama bie pachiapa awpa ta ano lâ ama pangai tyh.

⁶ Debawrâ ta Kedesâ Nâthalai râh liata Abinôâ sawchapawpa Bâraka kei paawsa ta, a hnohta, “Zehôvâh, Izarei Khazohpa ta hetana heta a tah, ‘Sie la, Tabaw tlâh lâ pangai la, Nâthalai nata Zebulawna chizy tawhta pheisaih 10,000 a chhi teh.

⁷ Zabi pheisaihzy hyutuhpa Siserâ cha nâma châ dyuh awpa ta a talailih nata pheisaih zydua chhaota Kisaw chavah lâ vaw pavysa aw na ta, ano cha na ku liata ei cha pie aw,’ tahpa ta bie a cha pie,” tah ta.

⁸ Bâraka ta Debawrâ hnohta, “Eina sielâh khiah chi ta cha, ei sie aw. Eina sielâh vei khiah chi ta cha, sie aw va na,” tah ta.

⁹ Debawrâ ta, “Ei cha sielâh aw, anodeikua na lâpi a chhihpa he na châta rônahna cha tlôkhei aw vei, Abeipa ta Siserâ cha chanô ku liata a zuah awpa vâta,” tah ta. Chatawhcha Debawrâ cha thyu ta, Bâraka hnohta Kedesâ lâ cha sie ta.

¹⁰ Bâraka ta Zebulawna nata Nâthalai chizy Kedesâ liata awpakhy ta. Chyhsa 10,000 ta zi ei ta, Debawrâ chhao a hnohta sie hra ta.

¹¹ Keni chyhsa Hebe cha a chiheih Keni mo hry tawhta a panano ta, âmo tawhta â hla kawpa ta Kedesâ kiapâh ta Zanâni liata ôkâ tho thih liata poh o rai ta. Keni mo he Mawsi puhpa Hôbâ pathlazy ama châ.

¹² Abinôâ sawchapawpa Bâraka Tabaw Tlâh lâ a khy haw tahpa Siserâ chho ei ta.

¹³ Siserâ cha a talailih zydua pahmaoh ta, thua talailih 900 hnei ta, Hârôse Hâkôi tawhta Kisaw chavah taihta a awpakhypa a chyhsa zydua a hnohta y ei ta.

¹⁴ Debawrâ ta Bâraka hnohta, “Thyu teh! Tanoh he Abeipa ta na ku liata Siserâ a cha piena noh a châ hih. Na hmia lâta Abeipa a sie haw,” tah ta. Chatanachata Bâraka cha Tabaw Tlâh tawhta zu ta, chyhsa 10,000 ta zi ei ta.

¹⁵ Abeipa ta Siserâ nata a talailih zydua nata a pheisaih zydua cha zaozi ta a dyuh ta, Bâraka hmiakô liata âmo cha patypamâ ta. Siserâ cha talailih tawhta chô ta, a phei ta a râ ta.

¹⁶ Bâraka ta talailihzy nata pheisaihzy cha Hârôse Hâkôi taih a chadai ta. Siserâ pheisaih zydua cha zaozi ta thi khai ei ta, pakha hmah ahrohpa y veih ei.

¹⁷ Siserâ cha Keni chyhsa Hebe lapinô Zaeli poh o lâ a phei ta a râ ta. Hâzaw bei Zabi nata Keni chi Hebe pathlazy likah liata adyuhna a ypa vâta ano lâ a râpa a châ.

¹⁸ Zaeli cha Siserâ dy awpa ta pua ta, a hnohta, “A vaw ngia teh, ei zibeipa, kei lâ a vaw ngia teh, chi khah y,” tah ta. Chatanachata Siserâ cha Zaeli poh o chhôh lâ a ngia ta, Zaeli ta poh chypa ta khu ta.

¹⁹ Siserâ ta Zaeli hnohta, “Ngiachhiepa ta ti do awpa a chyhta na vaw pie teh, ei dâh na a phi kaw,” tah ta. Sâhpiti ôh pahy ta, padosa ta, Siserâ cha poh chypa ta khu heih ta.

²⁰ Siserâ ta Zaeli hnohta, “Poh o chhikao liata a duah la, chyhsa ahy rai a vy sala, ‘He liata chyhsa a y ma,’ tahpa ta a cha hiahri khiahta cha, ‘Y vei’ tah lymâ mah y,” tah ta.

²¹ Siserâ cha a thachhâ kawpa vâta mokuh pahâh ngaitapa ta â mô chhôh ta, Hebe lapinô Zaeli cha poh o khaipâna la ta, syulô chaba ta, Siserâ cha chadi ta, a siali liata a puapahliena taihta khai ta, thi ha ta.

²² Bâraka ta Siserâ cha a vaw chadai ta. Zaeli cha ano dy awpa ta vaw pua ta, a hnohta, “A vy teh, na chyhsa tluapa ei cha pahmô aw,” tah ta. A hnohta vawh ta, Siserâ cha a siali liata poh o khaipâna achalohna chôta thiruapa ta â vaw zawh thlâh hapa hmô ta.

²³ Cha noh liata Khazohpa ta Kâna bei Zabi cha Izarei sawzy hmiakô liata a panawh haw.

²⁴ Izarei sawzy ku ta Kâna bei Zabi cha ama pahniena taihta thatlô viapa ta tôh lymâ ta, chatanachata Kâna bei Zabi cha ama pahleipadia haw.