Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

RYUREITUHPAZY 3 - Mara Bible RV (BSI)


Izarei pasia nawpa ta phopi pahlôhpazy

1 Hezy he Kâna râh liata adyuhna a tyh mâh leipa Izarei saw zydua pasia nawpa châta pahlôhpa phopizy ama châ.

2 Adyuhna a pahno mâh leipa Izarei chhâ vaw y lymâ awpazy ta adyuhzie ama pahno thei nawpa ta, pachuna châta pahlôhpa ama châ.

3 Phopi pahlôhpazy cha, Philistinâ bei papangawh, Kâna mo zydua, Sidaw mo zydua nata Lebanaw Tlâh nata Bâlâhâmaw Tlâh tawhta Lebôhamâ taihta a pahrâpa Hivi mo zydua ama châ.

4 Abeipa ta Mawsi hmâpa ta ama pathlatuhpazy hnohta a biepiepazy Izarei ta a zyh ma tahpa pasia nawpa ta âmo cha pahlôhpa ama châ.

5 Chatanachata Izarei sawzy cha Kâna mo, Hiti mo, Amawri mo, Perizi mo, Hivi mo nata Zebu mozy hry liata pahrâ ei ta.

6 Ama sawchanôzy lapinô ta hnei ei ta, âmo sawchanôzy chhao ama sawchapawzy pie ei ta, ama khazohzy ama chakao.


Ryureituhpa Ôthane

7 Izarei sawzy cha Abeipa mohmô ta moleina hmo tao ei ta. Abeipa ama Khazohpa cha mypa ta, Bâlâ nata Aserô chakao ei ta.

8 Chavâta Izarei chô liata Abeipa a pathi ia ta, Izarei sawzy cha Mesôpôtamia bei Kusarisathai lâ a zuah ha ei. Izarei sawzy cha Kusarisathai ry liata kô charie y ei ta.

9 Châhrasala Izarei sawzy ta Abeipa ama pado nahta, Abeipa ta Izarei sawzy châta pachhatuhpa padua tyh ta. Kâlebâ nawhta Kenâza sawchapawpa Ôthane cha Izarei pachha awpa ta Abeipa ta a padua.

10 Abeipa thlahpa a chô liata vaw tlô ta, Izarei chô liata ryureih ta. Ôthane cha adyuhna lâ sie ta, Abeipa ta Mesôpôtamia bei Kusarisathai cha a ku liata pie ta, Kusarisathai cha a pahnie haw.

11 Chatanachata râh cha kô sypalih chhôh thlalôhpa ta y ta. Chatawhcha Kenâza sawchapawpa Ôthane cha thi ha ta.


Ryureituhpa Ehu

12 Izarei sawzy cha Abeipa mohmô ta moleina hmo tao heih ei ta. Abeipa mohmô ta moleina ama taopa vâta, Abeipa ta Môabâ bei Ekalaw cha Izarei pahnie awpa ta a tha patlô ta.

13 Ekalaw ta Amawna mo nata Amale mo cha ano bao awpa ta hrua ta. Sie ta Izarei cha pahnie ta, thiahrâ khihpi chhao la ta.

14 Chatanachata Izarei sawzy cha Môabâ bei Ekalaw ry liata kô hrawh hleicharie y ei ta.

15 Izarei sawzy ta Abeipa pado ei ta, Abeipa ta Benzami chi Kerâ sawchapawpa, chavei lâ a paohpa Ehu cha âmo pachhatuhpa ta padua ta. Môabâ bei Ekalaw lâ râhpaw pie awpa ta Izarei sawzy ta Ehu cha tuah ei ta.

16 Ehu ta zaozi hâh nopa, dy kha a seihpa daih ta, cha cha a chysiazy ry liata nyupa ta, a chachâh lâ byhpi liata chahry pâ ta.

17 Râhpaw cha Môabâ bei Ekalaw hnohta pie ta. Ekalaw cha chyhsa thawh kawpa châ ta.

18 Ehu ta râhpaw a hlâ khai nahta, râhpaw a vaw phaohtuhpazy cha pasiesa ta.

19 Châhrasala ano cha Kilkal kiapâh liata alô nothlahpa khazohzy yna su tawhta a lie heih ta, Ekalaw hnohta, “Hy abei y, bieparu cha chho awpa ei hnei,” tah ta. Abei ta, “A chalih teh u,” tah ta. A chakaotuhpa zydua a mohmô tawhta pua ei ta.

20 Bei Ekalaw cha a o chô lâta chhôhpadâhpa chakuapa liata ano deita ta â tyuh thlâh no châ ta. Ehu ta kei pangai ta, a hnohta, “Na châta Khazohpa tawhta bietapa ei hnei,” tah ta. Ekalaw cha a dyuchhai tawhta kaw thyu ta.

21 Ehu ta a chavei lâta ku ta a chachâh lâta byhpi liata zaozi cha phia ta, Ekalaw py liata vieh ta.

22 Zaozi cha a ngaih chhaota a pamôh ta, a thaw ta zaozi hâh a pamai hapa vâta, zaozi cha a py tawhta phia thei khao leipa ta, a ky lâ a puapahlie haw.

23 Ehu cha okah lâ pua ta, o chô chhôhpadâhpa ochhizy khaw ta, Ekalaw cha hraikhâh ta.

24 Ehu a pua tawhta bei chakaotuhpazy a vy ei ta, o chô chhôhpadâhpa ochhizy â hraipa hmô ei ta, “A chhôhpadâh chakuapa liata â pahâ chypa a châ aw hih,” tah ei ta.

25 Vâropi tlai, nôpo khai hana taihta hâ ei ta, o chô chhôhpadâhpa ochhizy a pahy khao lei nahta, châhbi la ei ta, pahy ei ta, ama zibeipa cha thiruapa ta siphiah liata â vaw hluah thlâh hapa hmô ei ta.

26 Abei ama hâ chhôh ta Ehu cha a râ syulyu ha ta. Alô nothlahpa khazohzy yna khô ta, Seirâ lâ a râ ta.

27 A tlô nahta, Epharai tlâh râh liata chiahmie tô ta, Izarei sawzy cha a hnohta tlâh râh tawhta zu ei ta, Ehu ta âmo cha chhihtha ta.

28 Ama hnohta, “Na zi teh u, Abeipa ta nama chariahpa Môabâ mo he nama ku liata a cha pie ha ei,” tah ta. Chatanachata Ehu cha pazipa ta zu ei ta, Môabâ râh daih lâta Zawdâh chaka theina su cha la ei ta, ahy hmah chakasa veih ei.

29 Cha daihti liata Môabâ mo 10,000 rachhôh, chyhsa thatlôpa nata riahphapazy thie ei ta, pakha hmah a râpa y veih ei.

30 Cha noh liata Môabâ cha Izarei ku ta pahniepa ta y ta. Chatanachata râh cha kô sycharie chhôh thlalôhpa ta y ta.


Ryureituhpa Sâkâ

31 Ehu khai tawhta Anathâ sawchapawpa Sâkâ cha ryureituhpa vaw châ ta. Ano cha viahchao tona chôchahrei ta Philistinâ mo 600 a thiepa a châ. Ano chhao cha Izarei pachhatuhpa a châ hra.

The Bible Society of India

© 2023, Used by permission. All rights reserved.

Bible Society of India
ကြှနျုပျတို့နောကျလိုကျပါ:



ကြော်ငြာတွေ