RYUREITUHPAZY 20 - Mara Bible RV (BSI)

Izarei nata Benzami chi adyuhna

¹ Izarei saw zydua, Dânâ tawhta Besebâ taihta, Kilia râh chhao a hlaopa ta pua ei ta, reih kha tlapa ta Mizpâ khih liata Abeipa hmiakô ta a hmaoh ei ta.

² Izarei chi zydua tawhta chi to chhituhpazy cha, Khazohpa phopi pakhypi liata ama su chyu pahrâpa ta a duah ei ta. Zaozi a chabapa alei pheisaih 400,000 ama y.

³ Izarei sawzy Mizpâ khih lâ ama khypa thâtih cha Benzami mo ta vaw thei ei ta. Izarei sawzy ta, “He moleina he kheihta ma a vaw y, miah chho teh u?” tah ei ta.

⁴ Livai chi, chanô ama thiepa vahpa ta a chhy ta, “Benzami chi Kibia liata a rie awpa ta, kei nata ei nôtho vaw tlô pi ta.

⁵ Kibia chhituhpazy ta thie nâ chhuah ei ta, zâ ta nâ vyhnaopa ta, ei tlôna o vaw dôh ei ta. Ei nôtho patupakhi ei ta, a thina taihta ama ykhei.

⁶ Hmo pasichhihpa nata nozachhihpa Izarei liata ama taopa vâta, ei nôtho ri cha la na ta, a vyuh vyuh ta pachhaih na ta, Izarei ryuto râh zydua lâ ei paphao ei.

⁷ Nâmo Izarei sawzy saih u, nama zydua ta pachâ u la, nama pachâna nata ryhraona zy thyupakhy teh u,” tah ta.

⁸ Zawpi zydua cha reih kha tlapa ta thyu ei ta, “Ahy hmahta eima poh o lâ a di leipa aw pi ta, ahy hmahta eima o lâ a lie aw ma pi.

⁹ He hmo he Kibia chô liata eima tao aw: nuby a dao aw pi ta, eima khyhnao aw.

¹⁰ Pheisaihzy niedo a hlâ awpa ta, Izarei chi zydua hry tawhta chyhsa za kha liata pahrawh, sâh kha liata za kha, thy kha liata sâh kha lymâ ta eima la aw. Chatanachata pheisaihzy ta Benzami chi Kibia khihpi cha siehnao aw ei ta, Izarei liata hmo pasichhih ngaitapa ama taopa cha viari ama vaw thô aw,” tah ei ta.

¹¹ Cha hawhna chata Izarei chyhsa zydua cha reih kha tlapa ta, Kibia khihpi a dyuh awpa ta a hmaoh ei ta.

¹² Izarei chizy ta Benzami chi yna zydua lâ chyhsazy tuah ei ta, ama hnohta, “Nama hry liata he hawhpa hmo a vaw y thlâh hapa he, kheihawhpa moleina ma a châ tly?

¹³ Chavâta tahmâ Kibia liata moleipa chyhsazy cha miah vaw hlâ teh u, chatanachata âmo cha thie aw pi ta, moleina cha Izarei tawhta eima papai aw,” tah ei ta. Châhrasala Benzami mo ta ama unawhpa Izarei sawzy biereipa cha nathlie khoh leipa ei ta.

¹⁴ Izarei sawzy a dyuh awpa ta,Benzami sawzy cha ama khihpizy tawhta pua ei ta, Kibia liata a tyhpakhy ei ta.

¹⁵ Cha noh ta, Benzami sawzy ta ama khihpizy tawhta a puapa zaozi a chabapa pheisaih maluh ama rei theipa cha, Kibia mo ta pheisaih 700 amâ tlyhpazy rei pâ leipa ta, ama zydua ta 26,000 ama châ.

¹⁶ Chazy hry liata chyhsa 700 a tlyh eihpazy y ei ta, âmo he chaveipa châ ei ta, cheisiah lô ta sâbu tiepa siah ta, a chhei leipa sai ama châ.

¹⁷ Izarei mo cha, Benzami mo rei leipa ta, zaozi a chabapa sai ta 400,000 châ ei ta, ama zydua ta pasaiphazy ama châ.

¹⁸ Izarei sawzy cha thyu ei ta, Bethel lâ khy ei ta, Khazohpa a saohiah ei ta, “Benzami sawzy a dyuh awpa ta ahy ma a khy tuachai aw?” tah ei ta. Abeipa ta, “Zudâh ta a khy tuachai aw,” tah ta.

¹⁹ Chatawhcha Izarei sawzy cha mydi ta thyu ei ta, Kibia chadôpa ta riehmozy paryh ei ta.

²⁰ Izarei pheisaihzy cha Benzami a dyuh awpa ta pua ei ta, Kibia liata a dyuh awpa ta Izarei pheisaihzy cha a pachyh ei ta.

²¹ Benzami sawzy cha Kibia tawhta vaw pua ei ta, cha noh liata Izarei pheisaih 22,000 thie ei ta, alei liata ama papao haw.

²² Izarei pheisaih zawpizy cha a pachyu heih ei ta, amâ dyuh tua nota amâ duana su liata a duahpa ta a dyuh awpa ta a pachyh heih ei ta.

²³ Izarei sawzy cha khy ei ta, Abeipa hmiakô liata zâlâ taihta cha ei ta, “Eima unawhpa Benzami sawzy a dyuh awpa ta eimâ thao heih aw ma?” tahpa ta Abeipa a saohiah ei ta. Abeipa ta, “A kaw dyuh heih teh u,” tah ta.

²⁴ Chatanachata a noh nona liata, Izarei sawzy cha Benzami sawzy a dyuh awpa ta a thao heih ei ta.

²⁵ A noh nona liata, Benzami chhao ta Izarei sawzy a dyuh awpa ta Kibia tawhta pua heih ta, Izarei saw chyhsa 18,000 thie ei ta, alei liata ama papao haw. Cha zydua cha zaozi a chabapa pheisaih sai ama châ.

²⁶ Chatawhcha Izarei pheisaih zydua cha Bethel lâ khy ei ta, cha ei ta. Cha liata Abeipa hmiakô ta a tyuh ei ta, cha noh liana cha zâlâ taihta kâhvileipa ta ypa ta, raopa hlâna nata aryhna hlânazy Abeipa lâ hlâ ei ta.

²⁷ Izarei sawzy cha Abeipa a saohiah ei ta. Cha daihti cha Bethel liata Khazohpa Biehrai Byh a y no châ ta,

²⁸ Arawna sawchapawpa Eliaza sawchapawpa Phinehâ ta Khazohpa Biehrai Byh hmiakô liata a chakao daihti a châ. Izarei sawzy ta, “Eima unawhpa Benzami sawzy a dyuh awpa ta eima khy heih aw ma, eimâ chalih ha bâ hri aw ma?” tah ei ta. Abeipa ta, “Khy teh u, mylâ nama ku liata âmo ei cha pie aw ei,” tah ta.

²⁹ Chatawhcha Izarei ta Kibia khih chaby liata a byhtuhpazy soh ta.

³⁰ Izarei sawzy cha Benzami sawzy a dyuh awpa ta a noh thôhna noh ta a thao heih ei ta, noh hro hawhna khata Kibia a dyuh awpa ta a pachyh heih ei ta.

³¹ Benzami sawzy chhao ta Izarei phopi a dyuh awpa ta pua heih ei ta. Ama chariahpa cha khihpi tawhta lâhla pi taihta a chadai ei ta. Noh hro hawhna khata, Izarei pheisaihzy cha lyu liata nata Bethel lâ khyna nata Kibia lâ siena lâlaizy liata a dyuhpa ta thie pathao ei ta, Izarei pheisaih sythôh rachhôh cha ama thie hmâ haw.

³² Benzami sawzy ta, “Hmialâ hawhna khata eima hmiakô liata ama nawh haw,” tah ei ta. Châhrasala Izarei sawzy ta, “A râ sih la, miah a vaw chadai ei sala, khihpi tawhta lâlaizy lâ papuasa ha ei suh u,” ama tahpa vâta a châ.

³³ Chatawhcha Izarei pheisaih zydua cha ama yna su tawhta thyu ei ta, Bâlâtamâ liata a pachyh ei ta, arulâta a byhtuhpa Izarei pheisaihzy chhao ta amâ byhnâ su Mârekebâ tawhta vaw pua ei ta.

³⁴ Izarei pheisaih pha chaipa 10,000 ta Kibia cha a dyuh ei ta. Adyuhna cha ru ngaita ta, châhrasala Benzami mo cha chhiena ta â hnia ha ei tahpa pahno veih ei.

³⁵ Abeipa ta Benzami cha Izarei hmiakô liata pahnie ha ta, cha noh liata, Izarei sawzy ta Benzami pheisaih 25,100 ama pahleipadia haw. Ama zydua ta zaozi a chabapa sai ama châ.

³⁶ Chatanachata Benzami sawzy cha ama nawh haw tahpa a pahno ha ei ta. Kibia chaby liata a byhtuhpa ama sopazy ama ngâpa vâta, Izarei pheisaihzy cha hnôh lâ a sypa ta, Benzami châta lâpi ama pahypa a châ.

³⁷ Arulâta a byhtuhpazy ta a chatliepa ta Kibia cha siehnao ei ta. Arulâta a byhtuhpazy cha pua ei ta, khihpi cha zaozi ta a dyuh ei ta.

³⁸ Izarei pheisaihzy nata arulâta a byhtuhpazy likah liata ngiana taopa châ ta, arulâta a byhtuhpazy ta khihpi tawhta meikhuh ru ngaitapa ama kaw papua tita,

³⁹ Izarei pheisaihzy cha a dyuh awpa ta amâ vaw lie awpa a châ. Benzami ta Izarei pheisaihzy a dyuh pathao ta, sythôh rachhôh a thie hmâ hapa kha châ ta. “Adyuhna hmiatuapa liata eima panawh hapa hawhna khata, eima hmiakô liata ama nawh ha heih hih,” tah ei ta.

⁴⁰ Châhrasala ngiana meikhuh tôh a kaw charih ta, khihpi tawhta a kaw puapata nahta, Benzami mo cha hnôh lâ a vaw heih ei ta, moh teh u, khihpi zydua cha meikhuh lâta a liepa ta avâ lâ kiah ngâ kaw ta.

⁴¹ Izarei pheisaihzy Benzami pheisaihzy cha a vaw liehnao ei ta. Benzami pheisaihzy cha chhiena ta a tlô thlu ha ei tahpa ama pahnopa vâta, ama thlazoh ngaita ta.

⁴² Chavâta Izarei pheisaihzy cha hnôhchhypa ta râhchawhpa lâ a râ ei ta. Châhrasala adyuhna cha a râsai thei leipa ei ta, khihpizy tawhta a vaw puapazy ta ama hry liata Benzami mo cha thie lymâ ei ta.

⁴³ Benzami mo cha dôh ei ta, a chadai ei ta, amâ pahâna su liata pha ei ta, nochhi lâta Kibia khih tlô chy taihta tlysao lymâ ei ta.

⁴⁴ Benzami pheisaih 18,000 thi ei ta, ama zydua ta pasaiphazy ama châ.

⁴⁵ Benzami pheisaihzy cha a sy ei ta, râhchawhpa liata Rimô lôkâhpa lâ a râ ei ta. Lâlaizy liata pheisaih 5,000 thiepa châ ei ta, Kidaw taih a chadai ei ta, pheisaih 2,000 thie via heihpa a châ.

⁴⁶ Chatanachata cha noh ta Benzami pheisaih a thipa zydua cha, zaozi a chabapa sai ta 25,000 châ ei ta, ama zydua ta pasaiphazy ama châ.

⁴⁷ Pheisaih 600 deikua cha kua ei ta, râhchawhpa liata Rimô lôkâhpa lâ a râ ei ta, Rimô lôkâhpa liana cha thla palih y ei ta.

⁴⁸ Izarei pheisaihzy ta Benzami sawzy cha vaw kuahnao heih ei ta, zaozi ta chhawhsao ei ta, khihpi pôhpalôhpa nata sahrohzy nata ama hmôpa maih chhawh lymâ ei ta. Khih ama hmôpa zydua chhao mei ta ama rao khai haw.