RYUREITUHPAZY 2 - Mara Bible RV (BSI)

Bôkhi liata Abeipa vâlyuhchâpa

¹ Abeipa vâlyuhchâpa cha Kilkal tawhta Bôkhi lâ khy ta, Izarei sawzy hnohta, “Izi râh tawhta châ kaw chhi papua ei na ta, châ pathlatuhpazy hnohta bie ei taihpa râh liata châ ngiakhei ei na ta, ‘Nama hnohta bie ei hraipa parao beih aw va na.

² He râh liata pahrâpazy nata biehrai nama tao awpa châ leipa ta, ama maisâhzy nama parao awpa a châ,’ tah na ta. Châhrasala ei ao nathlie veih ei chi. Khâpa vâta ma he hawhta nama tao?

³ Chavâta tahmâ ei cha chho ei. Âmo cha nama hmiakô tawhta papua khao aw veih ei na. Nama kâzy liata ahloh hawhta cha chhô aw ei ta, ama khazohzy cha nama châta khoheih ama châ aw,” tah ta.

⁴ Cha biezy cha Abeipa vâlyuhchâpa ta Izarei saw zydua hnohta a rei khaipa nahta, zawpizy cha aoh tlili ta cha ei ta.

⁵ Chavâta cha su moh cha Bôkhi tahpa châ ta, cha su liata Abeipa lâta atheihna ama hlâ.

Zawsua thina

⁶ Chatawhcha Zawsua ta zawpizy cha padisa ta. Izarei sawzy cha ama ryuto râh chyu liata pahrâ awpa ta sie ei ta.

⁷ Zawsua hro chhôh zydua nata Zawsua hnôhlâ ta Abeipa ta Izarei châta hmo rônahpa a taopa a hmôpa Izarei machâzy hro chhôh zydua liata, Izarei phopi cha ama zydua ta Abeipa ama chakao lymâ.

⁸ Chatawhcha Nunâ sawchapawpa Zawsua, Abeipa chakaotuhpa cha kô 110 uhtheipa ta thi ta.

⁹ Kâsi Tlâh maw lâ Epharai tlâh râh liata a ryuto râh Timnâhere liata ama pabu.

¹⁰ Cha chhâ chyhsa zydua chhao ama pathlatuhpazy hnohta pahlyhpa ama châ khai ha hra. Âmo hnôhlâ ta, Abeipa a pahno leipa nata Izarei châta Abeipa hmotaopazy a pahno leipa chhâ hropa vaw pua ta.

Izarei ngâchhih leina

¹¹ Izarei sawzy ta Abeipa mohmô liata moleina hmo taopa ta, Bâlâ khazohzy a chhy pathao ei ta.

¹² Abeipa, ama pathlatuhpazy Khazohpa, Izi râh tawhta âmo a kaw chhi papuatuhpa cha a heihsaipa ta, ama chheipâh phopizy khazoh hropazy pazi ei ta, amâ chhy. Chavâta Abeipa hie ama pahâh haw.

¹³ Abeipa a heihsaipa ta, Bâlâ nata Astarô khazohzy tlao ama chakao.

¹⁴ Chavâta Abeipa cha Izarei chô liata a pathi ia ta, hraotuhpazy lâta âmo cha pie ta, ama hrao haw. Ama chheipâh chariahzy ku liata âmo cha zuah ta, ama chariahzy hmiakô liata a duah thei khao veih ei.

¹⁵ Hrâ ama siena maihta, Abeipa ta a reipa nata ama hnohta bie â taihpa hawhta, Abeipa ku tlai ta âmo cha â dyuhpa vâta, pahniepa ama châ lymâ. Chavâta ama pachâ a rôh ngaita.

Abeipa ta ryureituhpazy a padua

¹⁶ Chatawhcha Abeipa ta ryureituhpazy padua ta. Ryureituhpazy chata Izarei sawzy cha âmo a hraotuhpazy ku tawhta ama pachha lymâ.

¹⁷ Chatanachôta ama ryureituhpazy bie nathlie khoh leipa ei ta, khazoh hropazy liata a phei ei ta, khazoh hropazy a chhy ei ta, ama pathlatuhpazy ta Abeipa biepiepazy zyhpa ta a lâpi amâ chhih tyhpa cha thlai ta tleisai ei ta, tao khao veih ei.

¹⁸ Abeipa ta ama châta ryureituhpazy a paduana daihti maihta, Abeipa cha ryureituhpa hnohta y ta, ryureituhpa hro chhôh zydua cha, Abeipa ta ama chariahzy ku tawhta a pachha lymâ tyh ei. Ama chariahzy ta tlybai ei ta, rie ama patheipa vâta, amâ hrôna ao ta Abeipa cha ngiachhiena a pahneisa heih tyh.

¹⁹ Châhrasala ryureituhpa a thipa nahta, hnôh lâ kua ei ta, ama pathlatuhpazy hlâ chhao ta molei viapa ta, khazoh hropazy chakao ei ta amâ chhy ha tyh. Ama tao tyhpa nata ama chhorunazy pathleih hlei veih ei.

²⁰ Chavâta Abeipa pathi cha Izarei chô liata thata ia ta, “He phopi heta ama pathlatuhpazy hnohta bie ei piepa, ei biehrai parao ei ta, ei ao ama nathlie leipa vâta,

²¹ kei chhao ta Zawsua ta a thi hlâta a papua khai hmâ leipa phopizy he papuapa khao aw veih ei na.

²² Ama pathlatuhpazy ta Abeipa lâpi amâ chhih tyhpa hawhna khata, âmo he amâ chhih ma chhih vei ma tahpa pasiana châta phopizy he ei hmâh aw ei,” tah ta.

²³ Chavâta Abeipa ta phopizy cha thlai papua khai leipa ta, pahlôh chy ta, Zawsua ku liata chhao vaw pie khai vei.