RYUREITUHPAZY 18 - Mara Bible RV (BSI)

Mikâ nata Dânâ mo

¹ Cha daihtizy liata cha, Izarei liata abei y leipa ei ta. Cha daihti nota Dânâ pathlazy ta ama pahrâ nawpa ryuto râh tlua ei ta. Cha daihti taihna chata âmo cha Izarei chizy hry liata ryuto râh a hnei mâh leipa ama châ.

² Dânâ pathlazy chata râh mohparu ta a râh yzie a chu awpa ta, ama chi manôh zydua hry liata chyhsa riahphapa papangawh Zôrâh nata Estaw khihpizy tawhta tuah ei ta, ama hnohta “Sie u la, râh kei moh teh u,” tah ei ta. Epharai tlâh râh liata Mikâ o kei tlô ei ta, cha liata a rie ei ta.

³ Mikâ o kiah liata ama y nota, Livai satliapa ao thei ei ta, kei tlei ei ta, a hnohta, “Ahy ma he lâ châ vaw chhi? He su liana he khâpa ma na tao? He liata khâpa rai na hria?” tah ei ta.

⁴ Ano ta ama hnohta, “Mikâ ta he hawhta eina tao: na hrua ta, a theihthaipa ta ei y,” tah ta.

⁵ Âmo ta a hnohta, “Eima lâpi a chhihpa liana heta eima hlao a tloh aw ma tahpa eima pahno thei nawpa ta, ngiachhiepa ta Khazohpa miah hiahripa teh,” tah ei ta.

⁶ Theihthaipa ta ama hnohta, “Thlalôhpa ta sie muh vy. Nama lâpi a chhihpa cha Abeipa ta a cha pahnokhei lymâ ei,” tah ta.

⁷ Chatawhcha chyhsa papangawhzy cha pua ei ta, Laisâh khih tlô ei ta, cha liata chyhsazy cha thlalôh kawpa ta y ei ta, Sidaw mo hawhta sidiapa nata chhôhmohpa ta ama ypa hmô ei ta. A chhâpa cha, ama chô liata bie a hneipa nata khâpa kyh vâta tlyma ama noh a pazao awpa râh liata ama y leipa vâta a châ. Sidaw mo nata chhao a hla kaw ei ta, ahy nata hmah azaona hnei veih ei.

⁸ Chatawhcha Zôrâh nata Estaw liata ama unawhzy lâ za kua ei ta, ama unawhzy ta ama hnohta, “Kheihta ma a châ?” tah ei ta.

⁹ Âmo ta, “Thyu teh u, khy sih la a kaw dyuh ei suh u. Râh cha hmô ha pi ta, moh teh u, râh pha ngaitapa a châ. Namâ chalih thlâh ha aw ma? Râh cha a ngia ta, hnei awpa ta sie awpa pahawh pasâh khah u.

¹⁰ Nama sie tita, chhôhmohpa ta a ypa chyhsazy nama kei hmô aw, a râh chhao a kawh ngaita. Khazohpa ta râh cha a cha pie ha ei, alei liata hmo a ypa khâpa hmah a phahla leina su a châ,” tah ei ta.

¹¹ Chatawhcha Dânâ pathla 600 zy cha, adyuhna chhaichhi a tobipa ta Zôrâh nata Estaw tawhta pua ei ta,

¹² khy ei ta, Zudâh râh Kiriazeri khih liata riehmo paryh ei ta. Chavâta cha su cha tanoh taihta Mahânedâ ama tah thlâh ha chy. Moh teh u, cha su cha Kiriazeri notla lâta a ypa a châ.

¹³ Cha tawhna chata Epharai tlâh râh lâ pangai ei ta, Mikâ o cha kei tlô ei ta.

¹⁴ Laisâh râh mohparu awpa ta chyhsa papangawh a siepazy ta ama unawhzy hnohta, “He ozy liana heta ephaw, terâfi, nothlahpa khaipa nata nothlahpa leihpa zy a y tahpa nama pahno ma? Chavâta khâpa ma nama tao aw tahpa tahmâ pachâ teh u,” tah ei ta.

¹⁵ Cha su liana cha tlei ei ta, Livai satlia o lâ vawh ei ta, cha cha Mikâ o liata châ ta, Livai satlia cha a thâtih hiahri ei ta.

¹⁶ Dânâ pathla 600, adyuhna chhaichhi a tobipazy cha thokhy chhikao kiah liata a duah ei ta.

¹⁷ Râh moparuna lâ a khypa chyhsa papangawhzy khata o chhôh lâ a ngia ei ta, nothlahpa khaipa, ephaw, terâfi nata nothlahpa leihpa zy cha la ei ta. Cha nota theihthaipa cha adyuhna chhaichhi atobipa chyhsa 600 zy hry liata thokhy chhikao kiah liata a duah thlâh ha hra ta.

¹⁸ Cha chyhsazy chata Mikâ o liata a ngiapa ta, nothlahpa khaipa, ephaw, terâfi nata nothlahpa leihpa zy ama la hai nota, theihthaipa ta ama hnohta, “Khapa nama tao?” tah ta.

¹⁹ Âmo ta a hnohta, “A chalih teh; na ku ta na hmao kha chahu la, eima hnohta a vy la, paw nata theihthaipa miah châpa teh. Dyh kha deita châta theihthaipa châpa ma na châta a pha via aw, Izarei chi kha nata pho kha pôhpalôhpa châta theihthaipa châpa ma a pha via aw?” tah ei ta.

²⁰ Theihthaipa palôh cha a ly kaw ta, chatanachata ephaw, terâfi nata nothlahpa khaipazy cha la ta, chyhsazy hnoh chata sie ha hra ta.

²¹ Chatawhcha sie ei ta, hawtizy, sahrohzy nata hmobaohzy ama hmia lâta pasiesa ei ta.

²² Mikâ o tawhta vâro ama sie tawhta, Mikâ opazy cha a pahmaohpakhy ei ta, Dânâ pathlazy cha a chadai ei ta, pha ha ei ta.

²³ Dânâ pathlazy cha awsao ei ta, a vaw heih ei ta, Mikâ hnohta, “Khâpa rimâ maw, chyhsa khazie zydua chhaota nâ vy tly?” tah ei ta.

²⁴ Ano ta, “Ei khazoh taopazy nata ei theihthaipa lapa ta, sie syulyu ha ei chi ta, khâpa ma ei hnei khao? Kheihtazieta ma, ‘Khâpa rimâ maw?’ eina tah thlâh ha ei chi?” tah ta.

²⁵ Dânâ pathlazy ta a hnohta, “Eima hry liata na ao thei awpa ta papua khah y, chataleipatala chyhsa pathichhiepazy ta ku cha pathla aw ei ta, na chhôhkhazy hrona a leina liata nâma hrona chhao a lei pâ pathlei aw na,” tah ei ta.

²⁶ Dânâ pathlazy cha ama lâpi liata sie lymâ ei ta, Mikâ ta âmo cha ano châta ama tha a tlô tu hapa a hmô nahta, a lie ta a o lâ a di ha ta.

²⁷ Mikâ taopa khazoh nothlahpa nata a theihthaipa cha Dânâ pathlazy ta la ei ta, sidiapa nata chhôhmohpa ta a ypa Laisâh khih cha tlô ei ta, zaozi ta âmo cha thie ei ta, mei ta khihpi cha rao ei ta.

²⁸ Laisâh khih he Sidaw tawhta â hla kawpa vâta nata a pazaopa rai ama hnei leipa vâta, a pachha awpa y veih ei. He khih he Berehô saikao liata a ypa a châ. Khihpi cha paduapathi ei ta, cha liata pahrâ ei ta.

²⁹ Izarei sawchapawpa Dânâ, âmo pathlatuhpa moh a bi hnâpa ta, a khihpi moh cha Dânâ bi ei ta, cha khihpi moh hmiatuapa cha Laisâh a châ.

³⁰ Dânâ pathlazy ta nothlahpa khaipa cha âmo châta patyu ei ta, Mawsi sawchapawpa Kesao sawchapawpa Zawnathâ nata a sawchapawzy cha, Dânâ pathlazy theihthaipazy châ lymâ ei ta, râh cha sei ta â tâh hlâ zydua cha theihthaipa ama châ lymâ.

³¹ Chatanachata Mikâ taopa nothlahpa khaipa cha, Silô khih liata Khazohpa o a y chhôh zydua cha, cha liata a y lymâ.