RYUREITUHPAZY 15 - Mara Bible RV (BSI)

Sâsawna ta Philistinâ mo a pahnie

¹ Daihti khachâ rakha tlyma a khô nahta, sâh hria daihti liata, Sâsawna cha mietaw phaopa ta a lapinô za tly ta. “Chhôhpadâhpa liata ei lapinô lâ ei kei ngia aw,” tah ta. Châhrasala a paw ta â ngia awpa pasaih leipa ta.

² A paw ta, “A hao kaw khiah chi ma tah na ta, chavâta na viasapa ei vaw pie haw. Ano hlâta a chhithai viapa a nawhtanô a y hih? Ngiachhiepa ta ano he tlao hnei hri teh,” tah ta.

³ Sâsawna ta ama hnohta, “Tahmâ cha Philistinâ mo pasasa hra aw sah la, thailei châ khao aw va na,” tah ta.

⁴ Chatanachata Sâsawna cha changie za thôh kei patu ta, meirei la ta, changiezy cha a bao bao ta ama chaolahmei pazao lymâ ta, ama chaolahmei likawh chyu liata meirei cha soh ta.

⁵ Chatawhcha meireizy cha pakaih ta, changiezy cha sâh hria mâh leipa Philistinâ mo lyu lâ pathlie ta, sapiah nata sâh hria mâh leipazy cha mei ta rao ta, ôli sadôzy chhao mei ta rao khai ta.

⁶ Philistinâ mo ta, “Ahy ma he hmo he a tao?” tah ei ta. Âmo ta, “Timnah chyhsa piahpa Sâsawna taopa a châ hih, a puhpa ta a lapinô chhu ta, a viasapa a pie hapa vâta a châ,” tah ei ta. Chatawhcha Philistinâ mo cha khy ei ta, chanô nata a paw cha mei ta raosao ei ta,

⁷ Sâsawna ta ama hnohta, “He hawhta nama tao khiahta cha, bie ei taih, nama chô liata ei phuh a la ha tua aw na ta, cha khai tawhta cha, tao khao aw va na,” tah ta.

⁸ Âmo cha a dyuh ta, ama byh nata ama pheizy chhawhpa ta thata thie ta, zu ta Etamâ lôpu liata y ta.

⁹ Philistinâ mo cha khy ei ta, Zudâh râh liata riehmo paryh ei ta, Lehi khih siehnao ei ta.

¹⁰ Zudâh chyhsazy ta, “Khazia miah a dyuh awpa ta namâ vy thlâh haw,” tah ei ta. Philistinâ mo ta, “Sâsawna chahry awpa ta eimâ khy, eima chô liata a taopa hawhta ano chô liata tao hra awpa ta,” tah ei ta.

¹¹ Chatawhcha Zudâh chyhsa 3,000 zy cha Etamâ lôpu lâ zu ei ta, Sâsawna hnohta, “Philistinâ mo he eima chô liata ryureituhpazy ama châ tahpa pahno va chi ma? Khazia he hawhpa hmo he eima chô liata na tao?” tah ei ta. Sâsawna ta ama hnohta, “Ei chô liata ama taopa hawhta, ama chô liata ei tao hra,” tah ta.

¹² Âmo ta a hnohta, “Cha chahry ta, Philistinâ mo ku liata cha hlâ awpa ta eimâ zu,” tah ei ta. Sâsawna ta ama hnohta, “Nâmo ku ta na thie lei awpa ta bie nâ taih teh u,” tah ta.

¹³ Âmo ta a hnohta, “Cha thie aw ma pi, a chahry deita ta cha chahry aw pi ta, ama ku liata eima cha hlâ aw, cha thie cheita aw ma pi,” tah ei ta. Chatanachata chaori thiehpa miano ta chahry ei ta, lôpu tawhta a kaw chhi ei ta.

¹⁴ Lehi a tlô nahta, Philistinâ mo cha awh lymâna chôta ta ano lâ a vy ei ta. Abeipa Thlahpa cha a chô liata thlai vaw tlô ta, a bâh chahryna chaorizy cha, lari mei ta a kâ pachhôpa hawhta vaw châ ta, ano chahrynazy cha a kuzy tawhta tla khai ha ta.

¹⁵ Alâ kâh ru thiehpa hmô ta, kei la ta, cha chata chyhsa 1,000 tusao ta.

¹⁶ Chatawhcha Sâsawna ta, “Alâ kâh ru ta, Chahyh lymâ ei na ta; Alâ kâh ru ta, Chyhsa sâh kha ei tusao ei,” tah ta.

¹⁷ Bie a rei khaipa nahta, kâh ru â chabapa cha thy ta, cha su cha Ramâlehi tahpa a châ.

¹⁸ Chatawhcha Sâsawna cha a dâhphi kaw ta, Abeipa pado ta, a hnohta, “Na sei hmâpa ta he pachhana he vaw patlôsa ha chi ta, tahmâ dâhphipa ta thipa ta, chopawtai leipazy ku liata ei pao aw ma?” tah ta.

¹⁹ Khazohpa ta Lehi liata khaohtlô a ypa cha pahy ta, ti vaw pua ta. Ti a do khai nahta, a palôh tha vaw tlô ta, tha thiehpa vaw hnei ha ta. Chavâta cha su moh cha Enhakôre tahpa a châ. Tahmâ taihta Lehi liata a y thlâh haw.

²⁰ Sâsawna cha Philistinâ mo daihti chhôh ta Izarei chô liata kô kih ryureih ta.