RYUREITUHPAZY 14 - Mara Bible RV (BSI)

Sâsawna lapinô hneina

¹ Sâsawna cha Timnah khih lâ zu ta, cha liata Philistinâ zuah pakha hmô ta.

² A khy ta, a nô nata a paw chho ta, ama hnohta, “Timnah khih liata Philistinâ zuah pakha ei hmô. Ei lapinô châta na hiapa teh u,” tah ta.

³ A nô nata a paw ta a hnohta, “Na heinawh sawchanôzy hry liata tlyma, eima chiheih zydua hry liata tlyma, chanô y tlâ veih ei ma, khazia chopawtaileipa Philistinâ mo cha lapinô ta na hnei thlâh ha aw?” tah ei ta. Châhrasala Sâsawna ta a paw hnohta, “Na hiapa thlâh ha teh, ei mo nâ dy kawpa chanô a châ,” tah ta.

⁴ A nô nata a paw ta, cha hmo cha Abeipa pachhuahpanohpa a châ tahpa pahno veih ei. Philistinâ mo a dyuh awpa ta Khazohpa ta ryhpaohna a taopa a châ. He daihti he Philistinâ mo ta Izarei chô liata ryu ama rei daihti a châ.

⁵ Chatawhcha Sâsawna cha a nô nata a paw chhaota Timnah khih lâ zu ei ta, Timnah kre sadôzy za tlô ei ta. Chakeibarôhneipa lochopa a vaw rôh laihna chôta ano lâ â vypa hmô ta.

⁶ Abeipa Thlahpa cha a chô liata thlai vaw tlô ta, a ku liata khâpa hmah â chaba leipa chhao ta, chakeibarôhneipa cha mietaw hriechheihpa hawhta a tlawhpoh ta hriechheih ha ta. Châhrasala a hmotaopa cha a paw tlyma, a nô tlyma chho vei.

⁷ Chatawhcha zu ta, chanô cha bie a chho ta, Sâsawna mo a dy kaw ta.

⁸ Daihti khachâ rakha tlyma a khô tawhta, hnei awpa ta zu ta. Chakeibarôhneipa thiruapa kha mo awpa ta tlei ta, moh teh u, chakeibarôhneipa pôhpa cha kheih ta thata vaw by ta, kheithlawh chhao vaw y ha ta.

⁹ Kheithlawh cha lapa ta sie pazao ta, a sie pâ ta nie laih ta. A nô nata paw kô a kei tlô nahta, âmo chhao pie ta, nie hra ei ta. Kheihti cha chakeibarôhneipa thiruapa tawhta a lapa a châpa kyh deikua âmo chho vei.

¹⁰ A paw cha chanô lâ zu ta, cha liata Sâsawna ta kyhchhi tao ta, he he satliazy tao tyhzie a châ.

¹¹ Chyhsazy ta Sâsawna cha ama hmô nahta, ano a tyulâh awpa ta viasa sythôh a vaw chhi ei ta.

¹² Sâsawna ta ama hnohta, “Phôhpa miakha ei châ zua tua aw ei, kyhchhi daihti noh sari chhôh ta pahno u la, eina chho thei khiah ei chi ta cha, lini chysia sythôh nata apatlyna chysia sythôh ei cha pie aw ei.

¹³ Khâ ma a châ tahpa eina chho thei vei khiah ei chi ta deikua cha, lini chysia sythôh nata apatlyna chysia sythôh eina pi aw ei chi,” tah ta. Âmo ta a hnohta, “Na phôhpa cha miah vaw zua teh, eima nathlie aw,” tah ei ta.

¹⁴ Sâsawna ta ama hnohta, “Nietuhpa tawhta nie awpa vaw pua ta, Thatlôpa tawhta hmo thlôhpa a vaw pua,” tah ta. Phôh zuapa cha noh thôh chhôh ta chhopasia thei leipa ei ta.

¹⁵ A noh palihna noh ta, Sâsawna lapinô hnohta, “A phôh zuapa pahno awpa ta na vahpa reipasao la, keimo miah chho teh, chataleipatala nâ nata na paw o he mei ta eima rao aw. Maniah pachhâpakhu awpa ta ma miah nama hrua?” tah ei ta.

¹⁶ Sâsawna lapinô ta a vahpa cha cha thlu ta, a hnohta, “Einâ hao kaw chi he. Kyh na pachâ hmeiseih va chi. Ei chiheihzy phôhpa zua chi ta, khâpa ma a châ tahpa kei chhao na chho khoh chi va,” tah ta. Sâsawna ta a hnohta, “Pachâ teh, ei nô nata ei paw hmah chho veih ei na, khazia nâ cha ei cha chho aw?” tah ta.

¹⁷ Ama kyhchhi noh sari chhôh zydua cha a hmiakô liata cha ngâ thlâh ha ta, a noh sarina noh liata, thata â hawpa vâta chho ha ta. Chatawhcha Sâsawna phôh zuapa cha a lapinô ta a chiheihzy cha chho ta.

¹⁸ A noh sarina noh, noh a tla hlâta, cha khih chyhsazy ta Sâsawna hnohta, “Kheihti hlâta khâpa ma a thlôh via? Chakeibarôhneipa hlâta khâpa ma a thatlô via?” tah ei ta. Sâsawna ta ama hnohta, “Ei viahchao zeinô heta lei palie vei mawh ei chi sala cha, Ei phôh zuapa pahno tiarâh aw veih ei chi,” tah ta.

¹⁹ Abeipa Thlahpa cha a chô liata thlai vaw tlô ta, Askelaw lâ zu ta, chyhsa sythôh thie ta, âmo cha hrao ta, phôh zuapa a chhopasia theipazy hnohta apatlyna chysiazy cha pie ta, hiehâh ngaitana chôta a paw o lâ a lie ta.

²⁰ Sâsawna lapinô cha amâ hnei nota viasa ta â taopa hnohta pie ha ei ta.