RYUREITUHPAZY 13 - Mara Bible RV (BSI)

Sâsawna pina

¹ Izarei sawzy cha Abeipa mohmô ta moleina hmo tao heih ei ta, chavâta Abeipa ta âmo cha Philistinâ mo ku liata kô sypalih paysa ta.

² Zôrâh khih liata Dânâ chi chyhsa pakha, a moh Manôah ama tahpa y ta. A lapinô cha choh ha ta, saw rai phaoh thei leipa ta.

³ Abeipa vâlyuhchâpa cha chanô hnohta a vaw luah ta, a hnohta, “Moh teh, choh ha chi ta, saw rai phaoh thei va chi, châhrasala saw phaoh aw chi ta, sawchapaw na sa aw.

⁴ Chavâta a sohsi teh, kresawhti nata sahma patapa rai doh leipa la, hmo pathaih leipa khâpa hmah na nie awpa châ vei.

⁵ Nathlie teh, saw phaoh aw chi ta, saw­chapaw na sa aw. A luh liata sâ rai ngyu awpa châ vei. Hawti cha chhi liata a y no tawhta Khazohpa châta Nâzarai châ aw ta, ano ta Philistinâ mo ku tawhta Izarei pachhana rai a pathao aw,” tah ta.

⁶ Chanô cha a vy ta, a vahpa hnohta, “Khazohpa chyhsa pakha ei hnohta a vy ta, â lânazie cha Khazohpa vâlyuhchâpa a lâzie lyu ta, chi â chhih ngaita. Khataih lâ chyhsa ma a châ tahpa hiahri leipa na ta, ano ta a moh na chho hra vei.

⁷ Châhrasala ei hnohta, ‘Saw phaoh aw chi ta, sawchapaw na sa aw. Hawti cha chhi liata a y no tawhta a thina taihta Khazohpa châta Nâzarai a châ awpa vâta, kresawhti tlyma, sahma patapa tlyma, na do awpa châ leipa ta, hmo pathaih leipa rai na nie awpa châ vei,’ eina tah,” tah ta.

⁸ Chatawhcha Manôah cha Abeipa lâ thlahchhâ ta, a hnohta, “Hy Abeipa y, ngiachhiepa ta Khazohpa chyhsa na vaw tuapa kha, keimo lâ a vy heih sala, hawti a vaw pih awpa cha kheihta ma eima mohôh aw tahpa miah vaw pachu mawh sy,” tah ta.

⁹ Khazohpa ta Manôah thlahchhâna cha thei ta, chanô cha lyu liata â tyu thlâh ha nota a hnohta Khazohpa vâlyuhchâpa cha a vy heih ta, a vahpa Manôah deikua cha a hnohta y leipa ta.

¹⁰ Chanô cha thlai a râ ta, a vahpa kei chho ta, a hnohta, “Moh tua, zâkhano ta ei hnohta a vypa kha ei hnohta â vaw luah heih,” tah ta.

¹¹ Manôah cha thyu ta, a lapinô cha pazi ta, cha chyhsa cha kei pangai ta, a hnohta, “Chanô hnohta bie a reipa chyhsa kha na châ ma?” tah ta. Ano ta, “Y, ei châ na,” tah ta.

¹² Manôah ta, “Na biereipazy kha a vaw tlô tita, hawti hrozie awpa cha kheihta châ aw ta, khâpa rai ma a hria aw?” tah ta.

¹³ Abeipa vâlyuhchâpa ta Manôah hnohta, “Chanô hnohta ei reipa zydua kha a phapa ta pachâ mawh sy.

¹⁴ Kre zôh tawhta a puapa khâpa hmah a nie awpa châ leipa ta, kresawhti tlyma, sahma patapa tlyma, a do awpa châ hra leipa ta, hmo pathaih leipa khâpa hmah a nie awpa châ vei. Bie ei piepa zydua kha a phapa ta a zyh awpa a châ,” tah ta.

¹⁵ Manôah ta Abeipa vâlyuhchâpa hnohta, “Ngiachhiepa ta cha thlyu aw pi ta, mietaw eima cha thiepa aw,” tah ta.

¹⁶ Abeipa vâlyuhchâpa ta Manôah hnohta, “Na thlyu hra la, na pati la nie aw va na. Châhrasala raopa hlâna a chhuanohpa na châ khiahta deikua cha, Abeipa lâta hlâ mah y,” tah ta. Manôah ta ano cha Abeipa vâlyuhchâpa a châ tahpa pahno leipa ta.

¹⁷ Manôah ta Abeipa vâlyuhchapa hnohta, “Na moh ahy maw, na biereipazy a vaw tlô tita eima cha palyupalih thei nawpa ta?” tah ta.

¹⁸ Abeipa vâlyuhchâpa ta a hnohta, “Hmo noâhchhihpa hmô ha chi ta, khazia ei mo eina hiahri chi?” tah ta.

¹⁹ Chatawhcha Manôah ta mietaw cha niepa hlâna chhaota la ta, lôpanô chô liata Abeipa hmo noâhpa taotuhpa lâ cha hlâ ta. Manôah nata a lapinô cha moh thlâh ha ei ta.

²⁰ Maisâh tawhta meipaleih avâ la a kia ngâ nota, Abeipa vâlyuhchâpa cha maisâh meipaleih hry liata avâ lâ kiah ta. Manôah nata a lapinô ta moh thlâh ha ei ta, alei liata âkhu lâta pao ei ta.

²¹ Cha khai tawhta Abeipa vâlyuhchâpa cha Manôah nata a lapinô hnohta a vaw luah khao vei. Chatanachata Manôah ta ano cha Abeipa vâlyuhchâpa a châ tahpa pahno ha ta.

²² Manôah ta a lapinô hnohta, “Khazohpa hmô ha pi ta, eima thi tlai aw,” tah ta.

²³ Châhrasala a lapinô ta a hnohta, “Abeipa ta thie miah â chhuah khiahta cha, raopa hlâna nata niepa hlânazy kha a pyh aw vei. He hmo zydua he miah pahmôsa leipa aw ta, he hawhpa hmozy chhao he miah chho hra aw vei,” tah ta.

²⁴ Chatawhcha chanô cha sawchapaw sa ta, a moh Sâsawna bi ta. Hawti cha vaw laiseih ta, Abeipa ta ano cha byhnâ pie ta.

²⁵ Zôrâh nata Estaw likawh ta Mahânedâ liata a y nota Abeipa Thlahpa ta a chô liata raihria pathao ta.