RYUREITUHPAZY 11 - Mara Bible RV (BSI)

Zephathâ ta Izarei a pachha

¹ Kilia chyhsa Zephathâ cha pasaipha thatlôpa châ ta, a nô deikua cha âzuahnô a châ. Kilia cha Zephathâ paw a châ.

² Kilia lapinô ta sawchapawzy sapa hra ta. A lapinô sawchapawzy cha ama pitloh nahta, Zephathâ cha papua ei ta, a hnohta, “Nâma la eima paw o liata ryuto hnei aw va chi, chanô hropa saw na châpa vâta,” tah ei ta.

³ Chatanachata Zephathâ cha a unawhzy tawhta a râ ta, Tôbâ râh liata pahrâ ta, chyhsa pha leipazy a hnohta a vy ei ta, Zephathâ cha pazi ei ta.

⁴ Daihti khachâ rakha tlyma a sie nahta, Amawna mo ta Izarei a vaw dyuh ei ta.

⁵ Amawna mo ta Izarei amâ vaw dyuh nahta, Kilia machâzy cha Tôbâ râ tawhta Zephathâ a vaw chhi awpa ta sie ei ta.

⁶ Zephathâ hnohta, “Amawna mo a dyuh awpa ta, a vy la, eima chhituhpa vaw châ mah y,” tah ei ta.

⁷ Zephathâ ta Kilia machâzy hnohta, “Nâ hao ei chi ta, ei paw o tawhta eina papua hapa ei chi kha châ vei ma? Tahmâ nama nôpo leihkâ ta khazia kei lâ namâ vy?” tah ta.

⁸ Kilia machâzy ta Zephathâ hnohta, “Cha vâna tlai chata tahmâ nâma lâ a vaw heihpa eima châ hih, Amawna mo a dyuh awpa ta eima hnohta sie aw chi ta, Kilia râh liata a pahrâpa zydua chô liata eima hyutuhpa na châ aw,” tah ei ta.

⁹ Zephathâ ta Kilia machâzy hnohta, “O lâ eina padisa heih khiah ei chi ta cha, Amawna mo cha a dyuh aw na ta, Abeipa ta âmo cha eina pi khiahta cha, nama hyutuhpa ei châ aw,” tah ta.

¹⁰ Kilia machâzy ta Zephathâ hnohta, “Abeipa cha eima likah liata pahnotuhpa a châ aw. Na reipa hawhta eima tao tlai aw,” tah ei ta.

¹¹ Chatanachata Zephathâ cha Kilia machâzy hnohta sie ta, zawpizy ta ano cha hyutuhpa nata pawhrâh chaipa ta tao ei ta. Zephathâ ta a bie reipazy cha Mizpâ khih liata Abeipa hmiakô ta reih chanei heih ta.

¹² Zephathâ ta Amawna bei hnohta, “Ei chô liata khâpa palôh pha leina ma hnei chi ta, he hawhta ei râh a dyuh awpa ta eina vaw siehnao chi tly?” tahpa ta lyuhchâpa tuah ta.

¹³ Amawna bei ta Zephathâ lyuhchâpazy hnohta, “Izarei ta Izi râh tawhta a kaw pua no kha, Anaw tawhta Zabaw nata Zawdâh taihta ei râh na chhu ta, chavâta tahmâ a pha kawpa ta na vaw pie heih teh,” tah ta.

¹⁴ Zephathâ ta Amawna bei hnohta lyuhchâpa tuah heih ta,

¹⁵ a hnohta, “Zephathâ ta hetana heta a tah: Izarei ta Môabâ râh la leipa ta, Amawna mo râh chhao la hra vei.

¹⁶ Izi râh tawhta ama kaw pua no kha, Izarei cha râhchawhpa chapiapa ta Tilaipi Saihpa taih sie ta, Kâdesâ a vaw tlôpa a châ.

¹⁷ Izarei ta Edômâ bei lâ lyuhchâpa tuah ta, a hnohta, ‘Ngiachhiepa ta na râh chapia awpa ta miah pasai teh,’ tah ta, châhrasala Edômâ bei ta nathlie khoh vei. Cha hawh pyly ta Môabâ bei lâ chhao lyuhchâpa tuah ta, châhrasala paryhsa hra vei. Chavâta Izarei cha Kâdesâ liata vâro tlai a ypa a châ.

¹⁸ “Chatawhcha râhchawhpa chapiapa ta Edômâ râh nata Môabâ râh cha chahlô ei ta, Môabâ râh nochhi lâchhâh liata vaw pua ei ta, Anaw chavah cha Môabâ râhri a châpa vâta, chavah hesâ lâta riehmo paryh ei ta, Môabâ râh a ngia veih ei.

¹⁹ Chatawhcha Izarei ta Hesbaw liata bei ta a ypa Amawri bei Sihaw lâ lyuhchâpa tuah ta, Izarei ta a hnohta, ‘Ei yna su lâ sie awpa ta ngiachhiepa ta na râh chapia miah pasai mah y,’ tah ta.

²⁰ Châhrasala Sihaw ta Izarei cha a râh chapiasa awpa ta ngâ leipa ta. Chavâta Sihaw cha a chyhsa zydua pakhy ta, Zahâ liata riehmo tao ei ta, Izarei cha tlao â dyuh haw.

²¹ Abeipa, Izarei Khazohpa ta Sihaw nata a chyhsa zydua cha, Izarei ku liata pie ta, âmo cha ama pahnie haw. Chavâta Izarei ta cha râh liata a pahrâpa Amawri mo râh zydua cha a hnei khai hapa a châ.

²² Cha hawhna chata Amawri mo râh zydua, Anaw tawhta Zabaw taihta nata râhchawhpa tawhta Zawdâh taihta ama hnei khai hapa a châ.

²³ Abeipa, Izarei Khazohpa ta ano phopi Izarei hmiakô liata Amawri mo cha ama râh a chhu hapa châ ta, cha râhzy cha nâ ta na hnei nawpa kyh a y ma?

²⁴ Nâ cha na khazoh Khemô ta hnei awpa ta râh a cha piepa kha na hnei awpa tlâ châ vei ma? Keimo deikua cha Abeipa eima Khazohpa ta eima hmiakô liata a chhu hapa râhzy eima hnei lymâ aw.

²⁵ Nâ he Môabâ abei Zipô sawchapawpa Bâlâka hlâta na pha via hlei ma? Ano kha Izarei a dyuhpa ta, Izarei a siehnao beih ma?

²⁶ Izarei cha Hesbaw nata a khichapeihzy liata a pahrâ nota zy, Arôerâ nata a khichapeihzy liata a pahrâ nota zy, Anaw chavah kiah khihpi zydua liata a pahrâ nota zy, he suzy liata kô 300 tlai y ei ta, khazia kha daihtizy liana khata râhzy cha nama la pathi ha vei?

²⁷ Chavâta na chô liata hmo khâpa hmah parao va na, nâma ta einâ dyuhpa vâ chi ta, ei chô liata hmo tlao na parao hih. Abeipa, Ryureituhpa ta tanoh he Izarei sawzy nata Amawna sawzy likah pachia mawh sy,” tahpa ta pachhosa ta.

²⁸ Châhrasala Amawna bei ta Zephathâ bietapa cha nathlie khoh leipa ta.

Zephathâ bietai rarôh ypa

²⁹ Abeipa Thlahpa cha Zephathâ chô liata vaw tlô ta. Chatanachata Kilia nata Manase zy chapiapa ta Kilia liata Mizpâ a ngia ta, Kilia liata Mizpâ tawhta Amawna mo yna lâ sie lymâ ta.

³⁰ Zephathâ ta Abeipa liata bie a taih ta, “Amawna mo he ei ku liata eina pie khiah chi ta cha,

³¹ Amawna mo tawhta thlalôhpa ta ei vaw lie tita, khâpa rai na dy awpa ta ei o chhikaozy tawhta a kaw puapa maih cha Abeipa châta châ aw ta, raopa hlâna ta ei hlâ aw,” tah ta.

³² Zephathâ cha Amawna mo a dyuh awpa ta sie ta, Abeipa ta âmo cha a ku liata pie ta.

³³ Arôerâ tawhta Minia taihta pahnie lymâ ta, khihpi miakih tlai, Abelakerâmi taihta thata a taochhie ei. Cha hawhna chata Amawna mo cha Izarei sawzy hmiakô liata panawhpa ta y ha ei ta.

Zephathâ sawchanô hlâna

³⁴ Zephathâ cha Mizpâ liata a o lâ a lie ta. Moh teh u, a sawchanô vaw pua ta, paotlâzy nata lâpa ta a paw cha vaw dy ta. Ano he a saw matlupa châ ta, ano leipa ta sawchapaw nata sawchanô hropa rai hnei vei.

³⁵ A sawchanô a hmôpa nahta, Zephathâ cha a chysiazy hrie ta, a hnohta, “A pei rimâ cha, ei sawchanô! Ei palôh eina pachhâsazie rimâ cha. Nôpona nâ tlôkheituhpa lâta nâ lie ha he zaw. Abeipa lâ ei pakah â ha nahta, a la pakhua thei awpa châ khao va na,” tah ta.

³⁶ A sawchanô ta a paw hnohta, “Ei pâ y, Abeipa lâ na pakah â ha chi ta, na pakah tawhta a puapa hawhta ei chô liata tao mah y. Abeipa ta na chariahpa Amawna mo chô liata phuh a cha lapa ha hih,” tah ta.

³⁷ Chatawhcha a paw hnohta, “He hmo deikua he tao awpa na pasai mah y: thla no chhôh keima deita ta na paysa la, ei viasazy chhaota tlâhzy liata palao laih aw na ta, ei laihsa kôna he mâchhie ei sapa aw,” tah ta.

³⁸ A paw ta, “Sie mah y,” tah ta. Chatanachata thla no chhôh châta pasiesa ta, a viasazy chhao ta sie ta, a laihsa kôna cha tlâh chôzy liata mâchhiesapa laih ta.

³⁹ Thla no a tloh nahta, a paw o lâ a vaw di ta, a paw ta bietai a vaw tao hapa hawhta, a sawchanô chô liana cha tao ta. Ano he chapaw a pahno mâh leipa châ ta, chavâta ano atheithlâhna hmo chhao Izarei liata tao tyhpa a châ.

⁴⁰ Izarei sawchanôzy ta kô chareih ta noh palih chhôh sie ei ta, Kilia chyhsa Zephathâ sawchanô châta mâchhiesapa ta chaphôh ama tu tyh.